... آسف على الإزعــاج ...
أصعب حاجة في كتابة أي مقال إني لازم اكتب مقدمة تعملك تنويم
مغناطيسي عشان تكمل معايا ولما تبدأ تقرأه تلاقي نفسك وبشكل
لا ارادي بتتحرك بالماوس وتنزل عشان تكمله .. والموضوع ده
على فكره متعب جدا وانا مثلا أهو بقالي نص ساعه بفكر ومش
عارف .. بصوا اعتبروني كتبت كلام جامد اوي ويشد الانتباه
واتفضلوا معانا ونخش في الموضوع ....
قعدت أفكر كتير في موضوع يشد الانتباه ويعمل رجه كبيره ..
موضوع يفرقع يعمل انفجار جامد في دماغ الي يقرأه .. يعني من
الآخر موضوع جديد ومهم وأكتبه بطريقه جديدة وغريبه وعجيبة ومريبه ..
قعدت أفكر وأفكر لقيت مثلا شيخ محدش سائل فيه نفسو يعمل
رجه جامده أوي يقوم سيدنا الشيخ ده بقى يطلعلك في التلفزيون
ويقعد قعدة مشايخ عشان يبقى راجل فاهم شغله وهووووووووب
يقولك السجاير مبتفطرش في رمضان ..
وفي كل حاجه على فكرة الكلام ده مش محصور على فئة معينة من البني آدمين
لأ مثلا في الأغاني .. واحد مؤلف بيفكر يعمل أغنية محصلتش .. ممممممممم يا ترى يعمل ايه ؟؟
عمنا الإور ده بقى يروح يقعد عالمكتب قعدة بشوات والسيجاره
في ايده وكباية الشاي الي ملهوش طعم قدامه حاططها يتفرج عليها
مش اكتر يقوم صاحبنا ده كاتبلك كلام غريب عجيب مريب ملهوش
معنى يكتبلك كلام فيه دلع مش اكتر ...
يعني مثلا الي عاوز يعمل أغنية تهز الدنيا يغني للحمار أو للعنب ..
لكن دول بيبقوا تعبوا وفكروا في كلمات وبتاع ووجع دماغ ودوشه ..
انما بقى الي عاوز ميتعبش نفسه ويعمل أغنية تكسر الدنيا يقوم
حاططلك أغنية من كلمتين ( ألولو .. ألولو ) دول الناس الفاهمه .. الي عارفه شغلها كويس
ومش بعيد بعد يومين تلاته تلاقيهم مستضيفينك في
برنامج تليفزيوني والمذيعة تسألك عن دور الفن في خدمة
المجتمع..وترد وتقولها إن أغنية "ألولو الولو" دي بتدعو الناس
للحوار والبعد عن الاضرابات والاعتصامات..وبتدعو الاسرائليين
والفلسطينيين إلى الحوار ونبذ العنف والعودة إلى طاولة
المفاوضات..وبتدعو إلى حوار أمريكي إيراني تحت مظلة الأمم
المتحدة للالتزام بالشروط الدولية في برنامجها النووي...
ولقيت الموضوع ده في كل حاجه مش بس أغاني وفتاوي ده كمان
في المقالات قلت لماذا لا أكتب موضوع عجيب غريب مريب ؟!!!
قررت فعلا اني أتغير بطريقة كتابتي قررت إني أعمل موضوع
عجيب غريب مريب !!!
بداية من العنوان (( آسف على الإزعاج )) ممكن الناس تقرا
عشان خاطر أحمد حلمي ..وممكن ناس تقول لما نشوف إزعاج
إيه ده اللي من غير صوت..ويمكن الطبيعة البشرية التي تجبر
الفرد على احترام من يعتذر له تكون سببا يخلي الناس تقرا..ولكن
للأسف التجديد والابداع في العنوان هو إن العنوان ملوش أي
علاقة بالمضمون..
ويستمر التجديد الذي هو سر النجاح ليشمل المقدمة..إزاي تنجح
وانت فاشل..قصدي إزاي تكتب مقدمة من غير ما تكتب
مقدمة..إزاي تعمل أغنية ناجحة كل كلماتها ألولو الولو ؟؟ ...
تحية خالصة من قلبي لكل من استمر في القراءة حتى وصل الى هذه الكلمة .. وأتمنى يكون هدفي من الكلام ده وضح .. وفي النهايه أحب أقول : (( آسف على الإزعاج )) ...
بكيبورد / انتــ أحمد ــهينا
جميع الحقوق محفوظه في التلاجة عشان تقدم ساخنة ويمنع النسخ ويسمح بالرقعة :-P
تحياتي للجميع ..
