مخترع الواي فاي مصري يا سادة
الواي فاي اللي العالم كله بيستخدمه يرجع الفضل في اختراعه للعالم المصري الدكتور حاتم زغلول ، و في الواقع و للأسف اعتقد ان اقل من 1% من المصرييين يعرف الدكتور حاتم في الوقت اللي اكبر الجامعات في العالم بتدرس نظرياته و في الوقت اللي المفروض يتصدر المشهد في مصر العلماء و المثقفين .
في الحقيقة انا فخور اني هتكلم في البوست ده عن دكتور حاتم زغلول ( Hatim Zaghloul ) لعل المصريين يتعرفوا على واحد من اعظم العلماء المصريين .
دكتور حاتم زغلول العالم المصري تم اختياره سنه 2000 كواحد من أعظم عشر شخصيات في تاريخ كندا من قبل مجلة MacLean's و حصل على جوائز عالميه كتير جدا لاساهماته العملية .
مين بقى هو الدكتور حاتم و حصل على كل الجوائز دي ليه ، الدكتور حاتم يعزى اليه الفضل في اختراع الواي فاي بفضل اختراعين تم عليهم بناء الواي فاي و هما :
- Wideband Orthogonal Division Multiplexing - WOFDM
- Multi-Code Direct-Sequence Spread Spectrum
الدكتور حاتم خريج تعليم مصري جامعة القاهرة في الهندسة الكهربيه ، حصل على الماجستير و الدكتوراه في الفيزياء من جامعة كالجاري في كندا و كان الرئيس التنفيذي لشركات كتير جدا زي ( Wi-LAN Inc و Cell-Loc Inc و Solutrea و IPL Media Inc ) و غيرهم كتير
الدكتور حاتم حصل على جوائز كتير جدا زي :
- جائزة (The 2000 Fraser Milner Casgrain Pinnacle) لإنجازاته في مجال ريادة الأعمال.
- وصل للتصفيات النهائية على جائزة (The Ernst and Young Entrepreneur of the Year) لرواد الأعمال في العامين 1997 و 1998.
- جائزة كالجاري للمهاجرين المتميزين في إدارة الأعمال من جامعة كالجاري في كندا عام 1998.
- لقب "Technically Excellent Canadian" من مجلة (Canadian Computer Wholesaler) في يوليو 1999.
- جائزة (The Hall of Fame) من شركة (Broadband Solutions) في أبريل 2000، وذلك لمشاركاته في قطاع تكنولوجيا الاتصالات.
- تم اختياره كواحد من 10 كنديين عظماء من قبل مجلة (MacLean's) في يوليو 2000.
و جوائز تانيه كتير غيرها و حقيقي شرف لأي مصري او عربي انتماء الدكتور حاتم زغلول لينا .
اكيد ان لولا سفر دكتور حاتم زغلول لكندا مكنش نجح و كان زمانه دلوقتي دكتور في احدى جامعات مصر و كان زمانه شخصيه مغموره ، بس الأكيد كمان انه شخص ناجح جدا و انه اثبت نفسه بقوه في الغرب ليصبح مثل اعلى يحتذى بيه و شخصيه تستحق الاحترام و حقيقي قصة نجاح دكتور حاتم عظيمة جداً
