لاء بجد برافو عليكى
ارادتك قويه جدا
وعلى فكره كل الى انتى قولتيه ده صح وانا جربته قبل كده
مفيد جدا
اما التمرين ده ماكنتش اعرفه الحقيقه
شكرا عليه
وتسلمى على الموضوع الجميل
بدايه قويه
اولا السلام عليكم وازيكم كلكم يابناتيت وكل سنة وانتو طيبين
اه والله العنوان صحيح انا خسيت من غير رجيم وهقلكو حالا تجربتي مع التخسيس
وكمان هوريكوا صورتي قبل وبعد وانتو احكمو طبعا الوش مطموس يعني هوريكوا هيئة الجسم بس
بصوا بقا اول حاجة انا عملتها بعد ما جربت حاجات كتير اوي رحت اشتريت عيش سن طبعا كلكو عارفينه وصورته اهي
وبدلت العيش العادي بتاعنا اللي كنت باكله ده الرغيف البلدي اياه ده برغيف عيش سن
وبقيت أكل كل حاجة عادي جدا يعني محرمتش نفسي من اي حاجة
يعني باكل رز ومكرونة وطبيخ عادي خلاص بس بقيت شوية بهتم اني اعرف واحسب كمية الأكل اللي كلتها اد ايه يعني مثلا كنت ممكن اكل طبق رز على الغدا وماله مفيش مشاكل لأن كمية السعرات الحرارية فيه حوالي 350 سعر حراري وبقيت اخد بالي كمية الدهون في الاكل اد ايه وبدأت اقللها
وبقول أقللها مش امنعها
وعملت كمان حاجة صغننة كده بقيت بحلي اي حاجة عاوزة اشربها بالعسل وبعد كده اسبتدلت العسل ده بمعلقة سكر واحدة في كوباية الشاي بس خلاص وعارفين خسيت كام كيلو 12 كيلو اه والله 12 وللعلم مزدتش تاني جسمي ثبت على الوزن ده عارفين ليه متخنتش تاني لأني غيرت عاداتي في الاكل مش حرمت نفسي وبعدين رجعت اكل تاني
يعني خطوات الحكاية دي كلها عشان تخسي صح بتتلخص في الاتي :
1- بدلي اي نوع عيش بتاكليه بالعيش السن أو التوست السن
2- بطلي السكر وبدليه بعسل نحل او معلقة سكر واحدة فقط في الكوب اللي انتي هتشربيه حتى العصير اضربيه من غير سكر وبعدين حلي لنفسك انتي كوباية واحدة بمعلقة واحدة او بعسل نحل وللعم هو هو نفس الطعم ولما تبدأي تتعودي على السكر القليل هتقولي لنفسك ايه كل السكر اللي كنت باخده ده
3-تراقبي نفسك كلتي أد ايه في اليوم المفروض انك لو انتي وزنك 86 زي ما كان وزني الاول كده انه بيدخلك حوالي 2000 سعر حراري في اليوم يبقا عشان تخسي وتوصلي ل 75 كيلو مثلا المفروض ان يدخلك في اليوم 1680 سعر حراري ودلوقتي بقا كل حاجة بناكلها مكتوب عليها كمية السعرات الحرارية بتاعتها حتى الشيبسي والكاراتيه بصي على كل حاجة قبل ما تاكليها ولو حسيتي انك زوديتها شوية في يوم معين حاولي تقللي شوية اليوم اللي بعده على فكرة النظام ده هاااااااايل ومتبع في دول كتيرة اوي وبيجيب نتايج هايلة وبيعتمد دايما على عدم الحرمان من اي شيء وجربي وانتي هتشوفي بنفسك
4- تحاولي تبطلي الحاجة الساقعة بصفة عامة اصلا لأنها مضرة جدا طبعا وبتعمل بطن انا عن نفسي بطلتها بعد ما قريت بلاوي عنها وهبقا اعمل موضوع عنها قريب ان شاء الله وان كان ولا بد وبتحبيها ومش قادرة تبطليها اشربي الدايت منها او الزيرو عشان جسمك والسكر الكتير اللي في العادي
5- هوريكو صورة تمرين بسيط اوي بس بجد فرق معايا كتير والتمرين ده هتعملوه وانتو قاعدين في اي حتة وفي اي مكان وحتى وانتو قاعدين على الكمبيوتر وهو التمرين ده والله بيتعمل وانتي قاعدة على الكمبيوتر او على كرسي بتتفرجي على التلفزيون ومش متعب كمان وانا حتى بعمله دلوقت وانا بكتب التوبيك ده وجربي بنفسك
شوية ملحوظات هامة :
1- طبعا انا عارفة ان العيش السن له اضراره برضه بس انا عملت حسابي باكل واحدة زبادي خالي الدسم في اليوم عشان يديني كالسيوم وفي نفس الوقت انا مش باكله كتير عمال على بطال انا عاوزة اقلكو اني بعد فترة جسمي بقا رافض العيش كله واتعودت على اكل اي شيء بالمعلقة وكده احسن بكتييييييير وانتي بعد فترة من عمل النظام ده هتلاقي نفسك بتبعدي عن حاجات كتير وفي حاجات كتير اتغيرت في حياتك وبقيتي تاخدي بالك من جسمك اوي لو زاد سنة بتقوليله ستوب
2-حاولوا بقدر الامكان متاكلوش وتناموا اوعوا تاكلوا وتناموا انا كنت باكل واقعد على اي كرسي احرك رجلي شوية كده زي الصورة اللي فاتت عشان منامش على طول لأن النوم على طول غلط غلط غلط وهو سبب الزيادة في الوزن الكبيرة دي على الاقل تستني ساعتين قبل ما تنامي
3- حاولوا تشربوا شوربة قبل الاكل بتفرق جامد اوي وبتملا المعدة فمبتاكليش كل كمية الاكل اللي انتي متعودة عليها اعملوا اي نوع شوربة شوربة خضار او حتى شوربة لسان عصفور وهتشوفوا ان معدتكو هتتملي ونفسكوا هتتسد شوية ومش هتاكلوا اوي
4- متحرميش نفسك من حاجة ولو نفسك في حاجة كوليها بس لو هي حاجة تقيلة زي البسبوسة وكده كلي قطعة واحدة بس واعملي التمرين اياه وحاولي باقي اليوم تاخدي سعرات حرارية قليلة اوي اوي طبعا في حاجات كتيرة سعراتها الحرارية قليلة زي الخضار وزي الشوربة وبالنسبة للشوربة حاولي تحطي فيها فلفل اسود ياما عشان الفلفل الاسود بيحرق سعرات حرارية الفلفل والشطة بصفة عامة
بس كده انا خلاص خلصت وهوريكو الصور قبل وبعد وانتو احكمو
ادي صورتي قبل
ودي صورتي بعد
معلش انا زهقتكو بس قلت افيدكو بتجربتي وقولولي رأيكو مستنية ردودكو وكمان ارائكو بعد التجربة
التعديل الأخير تم بواسطة ساندرا ; 4 - 10 - 2008 الساعة 12:00 PM
لاء بجد برافو عليكى
ارادتك قويه جدا
وعلى فكره كل الى انتى قولتيه ده صح وانا جربته قبل كده
مفيد جدا
اما التمرين ده ماكنتش اعرفه الحقيقه
شكرا عليه
وتسلمى على الموضوع الجميل
بدايه قويه
بجد موضوعك حلو اوووووووووى
شكرا كتير على الافادة من تجربتك الشخصيه
تسلمي يا رب
يباركلي بقلبك
الذين يشاهدون الموضوع الآن: 2 (0 من الأعضاء و 2 زائر)