حدث في جمهورية بتنجانيا الديكوقراطية (2)

[انتهينا]

حدث في جمهورية بتنجانيا الديكوقراطية (2)

تعريف بالدولة

بتنجانيا هي جمهورية تقع في خيال الكاتب في أعلى قمم جبال أدشوندوتانيا

الذي تكون بفعل ترسبات بركانية من زمان اوي ...

ويجري فيها البحر الأخضر المنقط بالأزرق ونهر بتنجونوليتا المقلم الذي يمتد من

الشمال الى الجنوب محاذيا للفوهات البركانية على جبال أدشوندوتانيا ..

اعتمدت جمهورية بتنجانيا نظام آخر غير الديموقراطية والديكتاتورية

نظام جديد - زي الفل- وأسمته " النظام الديكتاتوقراطي " واختصرته في " النظام الديكوقراطي "

أسس جمهورية بتنجانيا زعيم من الشعوب البتنجانية بعد معارك عدة دارت بينه وبين

زعيم دولة أكشوفانيا الذي هُزم في معركة الكوسة العظمى خلف جبال أدشوندوتانيا ..

سميت دولة بتنجانيا بهذا الاسم لعدم وجود فيها بتنجان على الإطلاق .. ولذلك اضطر

الحاكم لإصدار قرار تسميتها دولة بتنجانيا رأفة بحال شعبه ..

ـــــــــــــــــــــــــ ــــــــــــــــ

استدعى الحاكم يوما من ايام بتنجانيا الي مفيهاش يوم عدل رئيس وزرائه يتسلى عليه شويه ..

دخل رايق افندي وحيا الحاكم ..

رئيس الوزراء : ها خير جنابك ..

الحاكم : والله يا رايق افندي مش عارف اقولك ايه ..

رئيس الوزراء : قول يا سيادة الحاكم .. في ايه ؟

الحاكم : والله يا رايق الشعب ده خانقني ..

رئيس الوزراء : ليه بس جنابك .. ده غلبان اوي وماشي جنب الحيط وبيحب سيادتك ..

الحاكم : مش ده الي غايظني يا واد يا رايق ..

رئيس الوزراء : امال ايه الي غايظ سموك يا فندم ..

الحاكم : الشعب مش لاقي ياكل وبرده معندهوش دم ..

رئيس الوزراء : مش فاهم جنابك ..

الحاكم : انا يا رايق افندي جوعتهم وعطشتهم وسممتلهم البلد كلها وبرده مفيش دم ولسه لازقين في البلد ..

رئيس الوزراء : لألأ ملهمش حق خااالص ..

الحاكم : عارف يا واد يا رايق انا نفسي في ايه ..

رئيس الوزراء : نفسك في ايه يا باشا ..

الحاكم : نفسي أولع في الشعب نفر نفر..

رئيس الوزراء : ليه بس جنابك .. هتولع فيهم ليه ؟؟ ..

الحاكم : أهو حاجه اتسلى فيها وخلاص يا واد يا رايق ..

رئيس الوزراء : طيب ايه رأي فخامتك تتسلى في حاجه تانية احسن ..

الحاكم : حاجه تانية زي ايه .. أولع فيك انت واسيب الشعب ؟؟

رئيس الوزراء : لألألأ يا فندم .. ايه رأي جنابك تكتب مذكراتك .. اهو كمان الشعب هيستفيد منها ..

الحاكم : مذكرات ايه .. انت بتخرف تقول ايه .. انا هفضح نفسي بإيدي .. لألأ شوفلي حاجه تانيه ..

رئيس الوزراء : طيب ايه رأي فخامتك احضرلك الحراس وتطلع تصطاد ..

الحاكم : أصطاد ايه .. انت مش قلتلي أسيب الشعب ..

رئيس الوزراء : لألأ جنابك تصطاد عصافير ..

الحاكم : عصافير ايه .. لألأ دول صغيرين اوي مش هعرف اشوفهم حتى .. لكن الشعب ربنا مديله والواحد منهم زي البغل ..

رئيس الوزراء : خلاص بلاش تصطاد .. ايه رأي جنابك أشغلك التلفزيون ..

الحاكم : لأ يا واد يا رايق أنا مش عاوز أتسلى كده ..

رئيس الوزراء : امال جنابك عاوز تتسلى ازاي ؟؟

الحاكم : عاوز أركب التوك توك والف بيه البلد ..

رئيس الوزراء : لألأ ميصحش سموك تركب توك توك وتلف بيه .. انت تخرج في الموكب المحترم بتاع فخامتك ..

الحاكم : لأ انا عاوز توك توك .. اشمعنى الشعب يركب توك توك وانا لأ ..

رئيس الوزراء : لأ يا باشا هما ناس متخلفين .. نعمل زيهم ..

الحاكم : ما انا قلتلك اولع فيهم قلتلي لأ ..

رئيس الوزراء : لأ يا باشا العلاج ميكونش كده ..

الحاكم : طيب مش مهم مش مهم يا رايق .. المهم انا عاوز توك توك .. اقلبلي البلد عليها واطيها وشوف بيتباع فين ده وهاتلي واحد .. يعني هو الشعب احسن مني ولا احسن مني ..

رئيس الوزراء : لألألأ ميصحش فخامتك .. الشعب يقول عننا ايه ..

الحاكم : طب أعمل إيه ياسيد ما أنا مشلاقي حاجة أعملها وحاسس بملل يا أخي .. خلاص عايز أوقف شعري – سبايكي- بالجل وأبقى واد روش

رئيس الوزراء : لألألألأ دا توك توك أرحم من السبايكي ده يا باشا ..

الحاكم : هو ايه الحكايه يا رايق افندي .. كل حاجه لألأ

رئيس الوزراء : يا باشا ميصحش فخامتك تعمل شعرك سبايكي .. الشعب يقول عننا ايه .. طيب هما روشين .. نعمل احنا زيهم ؟ ..

الحاكم : طيب قولي اعمل ايه في الملل ده .. أولعلكوا في نفسي يعني عشان تنبسطوا ومتلاقوش حد يعرف يحكمكوا ..

رئيس الوزراء : لألأ يا فندم .. ان شاله الشعب كله ومعاليك لأ ..

الحاكم : مقلتلك أولع فيهم قلتلي لأ ..

رئيس الوزراء : بصراحه انا غلبت مع فخامتك ولسه مش عارف عاوز ايه ..

الحاكم : خلاص يا واد يا رايق انا هركب توك توك والف البلد ..

رئيس الوزراء : طيب الي تشوفه فخامتك .. وانا هحضر حرس جامد لسيادتك وأفضي شوارع الجمهوريه كلها ..

الحاكم : لالا يا واد يا رايق انا هنزل انا وانت بس ومش عاوز حرس ولا نيله .. وكمان انا عاوز اشوف احوال الشعب .. اصلي بصراحه قلبي واكلني عليهم اوي .. وانت عارف اد ايه قلبي رهيف ..

رئيس الوزراء : أنا ومعاليك بس هنركب توك توك !!!!!!!!!!

الحاكم : ومش كده وبس وهنجيب عصر قصب من وسط البلد كمان .. عايز حاجه ..

رئيس الوزراء : الي تشوفه فخامتك ..

...........

وصل الحاكم الي وسط البلد هو ورئيس وزرائه رايق افندي

الحاكم : بس يا رايق وقف البتاع ده وخلينا ننزل هنا قدام محل العصير ..

رئيس الوزراء : الي تؤمر بيه معاليك ..

الحاكم متعجبا :

ما شاء الله كل دي ستات في البلد …أومال بتقولوا في أزمة في الستات ليه ؟؟

وقالقني ليه علي الشعب يا واد يا رايق وإنت عارف إن قلبي رهيف ومبستحملش ...

ما الستات كتيرة أهي والحمد لله .. والله كنت هقولك لو مفيش ستات استوردلنا شوية قرود

من عند نسناس افندي الي لسه عاملين معاه اتفاقية سلام الاسبوع الي فات …

اشمعني دي يعني الي مش هنستوردها منهم …

رئيس الوزراء : لأ فيه ستات كتير والحمدلله ...

الحاكم : اومال برضو بتقولوا فيه عنوسه ….. ما الرجالة كتير أهي وزي

البتنجان الاسود……….هما الرجالة إحولت ولا الستات مبتشوفش ولا ايه..

رئيس الوزراء : طيب معاليك تقترح ايه عشان نحل المشكله دي ..

الحاكم : بص يا واد يا رايق إنت و شغل دي معايا ( قالها وهو بيضربه علي القرعة )…

البنات دي معنسه والشباب مش لاقي ياكل .. هو أنا حرامي مثلا ومجوعهم

رئيس الوزراء : حاشا لله يا فندم .. دا انت حنين عليهم اوي .. وبتديهم الي بتقدر عليه ..

تقولش هما الي واخدين عالكسل شويتين كده ..

الحاكم : ياوزير القلقاس انت ركز وفتح دماغك معايا .. الاول روح هاتلي عصير قصب من المحل ده ..

رئيس الوزراء : من العين دي قبل العين دي ..

الحاكم : محسسني انك هتجيب حاجه من جيب ابوك .. مهو كلو من خزينة الدولة الي هي فلوسي ..

اما انت واحد اقرع صحيح ..

رئيس الوزراء: تسلم يا باشا .. اتفضل العصير ..

الحاكم : قولي بقى البنات عنست ليه ؟؟..

رئيس الوزراء : معظمهم يا باشا بيتحججوا بالدراسه والشغل والكلام ده وبيرفضوا

عرسان كتير بتتقدملهم في الفترة دي .. وده بيضيع عليهم فرصتهم في الجواز ..

الحاكم : فرصتهم ليه ؟؟ هو الجواز شاحح من البلد ولا ايه ؟؟

رئيس الوزراء : يافندم العرسان بتدور علي البنات الصغيرة مش الي كبروا وعدوا سن الجواز...

الحاكم : ااااااااااه كده فهمتك يا وزيري .. شكل قرعتك هي سبب زكاءك .. ابقى فكرني احلق عالزيرو ..

طب بس اكيد فيه بنات بتوافق ياوزير القلقاس انت … ليه بقي فيه عنوسه مرتفعة ….

رئيس الوزراء : ياسيادة الحاكم …حتي البنات الي بتوافق …أولياء أمورهم بيطفشوا العرسان …

الحاكم : ليه بقي ياوزيري ؟؟؟… قلي الاول تاخد شوية عصير …انا حاكم ديموقراطي … أحب اعزم علي الوزراء بتوعي ..

رئيس الوزراء : لا شكرا يا فندم مبشربهوش .. أولياء الأمور يافندم بيطلبوا طلبات عجيبة قوي…. وبيعقدوا الشباب من الجواز .. وكمان الشباب مش في استطاعتها تلبي كل طلبات اولياء الامور عشان مفيش فلوس

الحاكم : ايوه ايوه .. طيب قولي والشباب ممعاهاش فلوس ليه .. هما رؤساءهم في الشغل بياكلوا عليهم رواتبهم ولا ايه ..

رئيس الوزراء : ياجناب الحاكم الشباب بصراحة كده بقي مش لاقي يشتغل …..ولا ياكل … وحتى لو اشتغل بالرواتب دي ولا عشرين سنة عشان يجهز للجواز ..

لو عند سيادتك حل قول واحنا علينا التنفيذ والسمع واللهف والنهب والتهليس وبعدين الطاعة…ده لو فاض وغالبا مبيفضش ..

الحاكم : بص يا واد يا اقرع انت .. ايه رأيك اعمل قرار ان أي شاب يتجوز بنت ياخد عليها ( مزتين ) من البنات الي اتدلعوا ورفضوا دول .. وطالما هو لاقي يتجوز وحده .. ليه ميبقوش تلاته .. يعني اتجوز وحده وشيل مزتين هديه .. كده مش هتلاقي عنوسه عند البنات خالص .. مظبوط كده ..

رئيس الوزراء : كده تبقى خربت بيوت الشباب يا فندم ..

الحاكم: خلاص بلاش .. أنا قلت من الاول لازم أولع فيهم

رئيس الوزراء : خلاص ولع فيهم يا فندم على بركة الله ..

ـــــــــــــــــــــــــ ــــــــــــــــــــ

بقلم ( بكيبورد ) / انتـ أحمد ــهينا

[طيف عابر]

لا عنجد
حلقة روعة
فعلا وبتناقش موضوع هام جدااااااا بطريقة كتير محببه وخفيفه
بس برضه الحل دكتاتوري

تسلم احمد
الف شكر لك
منتظرين حلقة كل اسبوع

[انتهينا]

لا عنجد
حلقة روعة
فعلا وبتناقش موضوع هام جدااااااا بطريقة كتير محببه وخفيفه
بس برضه الحل دكتاتوري

تسلم احمد
الف شكر لك
منتظرين حلقة كل اسبوع

نورتي والله يا سمسمة

وميرسي على تشجيعك الجامد ده

بس كده على فكره دماغي كبرت اوي ومش بعيد تخبط في بلكونة الجيران

نورتي والله

تحياتي ليكي

بس ممكن يعني لو مش هيدايقك اعرف عمرك ؟؟

فضولي مش اكتر ورخم في نفس الوقت يعني

[Princess maya]

شكرا لمجهودك الرائع

ومعرفش لية انا حاسة انى فى بتنجانيا

[انتهينا]

شكرا لمجهودك الرائع

ومعرفش لية انا حاسة انى فى بتنجانيا

ما كلنا حاسين نفس احساسك على فكره

نورتي والله

ميرسي لمرورك الرائع واللي في نفس الوقت هيوديكي في داهيه