أنا اليتيم كلمات عصام قمر

[عصام الدين محمد]

أنا اليتيم

أنا اليتيم أبويا مات

عشت معاه سنين في هنا

دلوقت مش لاقي الفتات

وعرفت أيه معني الضنا

بييجي العيد كل اصحابي تلبس جديد

وياخدوا عيدية ملو الجيب وملو الإيد

وألاقي الفرحة مالية عيونهم

وألاقي نفسي حزين ووحيد

فين بابايا.. كان في فرحي وحزني معايا

محتاج حنان يديني..لو كنت حزين يواسيني

وكان يحلالي نداه يوم يناديني

" حبيبي يابني يانور عيني "

كنت أجري عليه في حضن قلبه

كانت كل سعادتي ف وجودي جنبه

كان بيقولي عايزك شاطر

عايزك بين زملائك ظاهر

عايز الناس كلها تشهدلك

بالأخلاق والقلب الطاهر

عايزك تنفع كل الناس

وتعامل الكل بإخلاص

عايزك يابني تبني بلادك

وترجع أمجاد أجدادك

وف يوم فات مكرهتش أده

أبويا مات واتيتمت بعده

إسودت الدنيا ف عنية

ملقيتش إيد تتطبطب عليا

مدقتش بعده طعم الفرحة

ملقيتش قلوب تحس بيا

واللي إتولوا أمري بعده

ياما هانوني وقسيوا عليا

رحت علي قبره وشكيت

وبدمع العين والقلب بكيت

وسألته ليه مات وسابني

لدنيا ولعالم رفضني

وقلت آه وألف آه

واتمنيت لو خادني معاه

****************

من خواطر عصام قمر

[حرف مشتعل]

بوحك وكلماتك ومعانيها
شملت أعذب الاحاسيس
والمشاعر الانسانيه الصادقه .

مشاعر متأججه ومعاني عميقه
المعنى سلمت اناملك الذهبيه .

تحياتي

[عصام الدين محمد]

بوحك وكلماتك ومعانيها
شملت أعذب الاحاسيس
والمشاعر الانسانيه الصادقه .

مشاعر متأججه ومعاني عميقه
المعنى سلمت اناملك الذهبيه .

تحياتي

أختي الغالية حرف مشتعل
وجودك علي صفحتي يثريها بأجمل الكلمات والأحاسيس .... لا حرمنا من طلتك ياغالية
اخوكي عصام قمر