دى حكايتى ببساطة

[المجروحة]

حكايتى بكل بساطة انى عرفت واحد صدفة وكانت اجمل صدفة فى حياتى المهم من يوميها واحنا احسن صدقين
حبنا بدا كدة بصداقة طول سنتين واحنا اعز الاصحاب
وبعد ين من غير ما نحس اتقلب الصداقة لى حب وكان
احلى حب والله مش بكدب عليكو لما اقولكو انى عمرى ما شفت حد زينا ابدا فى حبهم لبعض كنا بنعرف الى جوة
كل واحد فينا من غير ما يتكلم كنا فاهمين بعض لدرجة الناس
كانت بتحسدنا عليها وفضلنا كدة اكتر من سنة رغم بعد المسافة بينا لاكن عمرنا ما حسينا اننا بعاد كان هو كل
حياتى مكنتش شايفة غيرة مكنتش عاوزة غيرة متمنتش
غيرة بس اتمنيت فى زمن ضاعت فية الامانى وزى اى اتنين
بيحبو بعض كنا بنزعل ونتصالح واة من خصمنا لما كنا بنتخاصم كنت ببقى ميتة بكل ما تحملة الكلمة من معنى صدقونى لا كنت باكل ولا بشرب حتى لو انا الى مش مزعلاة
هو الانسان الوحيد الى فى عز حزنى كان بيقدر يخلينى اضحك ومن قلبى بس الظاهر اننا اتحسدنا وبالظبط من سبع شهور فاتو وبدئنا سكة العذاب صدقونى افظع عذاب نتخاصم بالاسابيع ونتصالح بس هما يومين او تلاتة وبعدين نرجع تانى لسكتنا سكة العذاب عتاب ولوم مش هو بصراحة كل مرة الى بيغلط لواحدة انا كنت كتير بغلط بس كنت معتقدة ان الى بينا مش هيتاثر باى حاجة كنت فاهمة غلط وكان من الطبيعى بعد كل الى حصل نتغير ونتصرف تصرفات مش مقصودة واكيد احنا التنين كنا بنمسك لبعض عا الواحدة ودة اكبر غلط من غير ما نعمل حساب للى بينا وكل مرة كنا بنرجع لبعض نتواعد ان دى اخر مرة نزعل فيها بعض بس مكنش دة الى بيحصل
واخر مرة الى هيا من اسبوع عشرة ايام بالكتير رجعنا لبعض وكانت اخر مرة معلش طولت عليكو بس الى جاى دة اهم حاجة فى الموضوع اتعتبنا كالعادة وتصفينا وكل واحد قال للتانى على مزعلة من التانى وهو بصراحة تعطف علية ومنحنى اخر فرصة هقولكو الى قالهولى بالظبط بص دى اخر فرصة انا هدهالك بس بشرط الى هقول علية يتنفذ وطبعا املى علية شروطة وانا قبلتها علشان بحبة من غير ما افكر ان دة جرح لية وكرامتى قولت مش مهم طالما بحبة خلاص ووافقت وانا غبية مكنتش اعرف انة هيستنيلى على غلطة
علشان يبعد فيها مع انة لما رجع كان مشتقلى وقالى اد ايةانتى كنتى واحشانى و وقالى احلى كلام ممكن اتنين بيحبو بعض يقولوة بس كانت فية حاجة غلط كان راجع زى ما يكون غصب عنة ولا اية مش عارفة هما كا العادة 3 ايام وتقلب علية تانى ومش عارفة السبب ومش راضى يقولى هو زعلان من اية منى ولا فى حاجة تانية مزعلاة وفضل اسبوع كدة ولكم انتم ان تتخيلو حالتى عمالة اعذب نفسى واقول انا عملت اية انا زعلتة فى اية واراجع نفسى فى اليوم مليوووووووون مرة ومش عرفة السبب كل الى قالى علية عملتة بالحرف الواحد
متكلميش دة متخرجيش الا لما اعرف وتستاذنينى حتى لو هروح اكشف عند الدكتور كنت بخد اذنة قبل ابوية تخيلو
وفى الاخر يطلع زعلان من حاجة انا معملتهاش وهو كان فاكر عملتها ولانة مش واثق فى كلامى مصدقنيش غير لما اتاكد انى مش بكدب والمفروض سعتها انة كان يعتزرلى على ظنة فية انما ابدا والله فضل زى الاول وانا اتضحلى من بعدة انى فعلا مستنيلى على غلطة انهى واحدة فى الدنيا ترضى تعيش بالوضع دة مهما كانت روحها فية المهم انا سافرت لظروف وبردو رغم كل حاجة وعلشان ابقى قدام نفسى عملت الى علية استاذنتة انما للاسف مهتمش يسئلنى انا مسافرة فين ولية ولا اى حاجة غير تروحى وترجعى بالسلامة بس واسمعو دى بقى قال اية انة كل الى بيعملو معاية دة عادى يعنى اقصد مش متغير ولا حاجة زعل منى اوى لما انا وصلت عند ومكلمتهوش اطمنة انى وصلت كلمت اهلى وهو لاء شفو ازاى
طيب اقولة ازاى زهز متمش يعرف انا مسافرة لية وفين لية
المهم كلمنى وقالى شكرا على انك معرفتنيش انك وصلتى ومعبرتيش بصراحة خرجت عن شعورى وقولتلة حرام الى انت بتعملة دة حرام عليك لية معذبنى ومعذب نفسك كدة لية
هو انا استاهل منك كدة مش فاكرلى اى حاجة عملتها علشانك
ارحمنى انا تعبت ولله تعبت بجد اى حد فيكو لو مكانة هيعمل اية والى بيحبها منهارة قدامة كدا مش ال حاجة هيقولها كلمة تهديها دى ابسط حاجة واضعف الايمان انما كان كل ردة والله ما بكدب عليكو علشان ابان قدمكو انا الى مظلومة قالى كدة بالحرف تعبتى ماشى سلام سلام وقفل السكة فى وشى وبعتلى رسالة بيقولى فيها اربع كلمات بس
.. تعبتى ماشى صدقينى هترتاحى .. دى كلمة معلش الى هان علية يقولهالى بس تعرفو اانا الى غلطانة هو معملش كدة غير لما اتاكد ان مهما حصل هرجعلو تانى رخصت نفسى لحد ما بقى يشترى وبيع فية افتكر دموعى دى ضعف واستغل انى بحبة واتنمرد علية ورغم كل الى حصل مش قادرة اكرهة بس معتش ينفع ارجعلى تانى مينفعش اكمل حياتى كدة مينفعش اعيش مزلزلة باسم الحب دى والله حكايتى بمنتهى الصراحة
وطبعا انا مينفعش اقولكو انا عملت اية علشانة علشان ميبقاش اسمها بعيرة انما انا هقول حاجة واحدة بس
واحنا مع بعض اهلى غصبونى على واحد اتقدملى وكان بصراحة مفهوش عيب ومع كل الضغط حولية واقفت واتحدد ميعاد الشبكة وحجزو القاعة والاستوديو وكل حاجة وعلشان بحبة والله لغيت الخطوبة قبل ميعادها بيومين وتخيلو انتو شكل اهلى قدام الناس بس مقدرتش البس دبلة واحد غيرة فى ايدى ولو يوم واحد وشفت الويل من اهلى بعدها وبصراحة من حقهم
ولو كان عملو اكتر من كدة بردو من حقهم هو مقدرش كدة لية معلش اعزرونى كان لازم اقول حاجة زى دى انا عملتها علشانة علشان تعرفو تحكمو صح بس مش هقول حاجة تانى
انا خت قرار بينى وبين نفسى انى ابعد واحاول انسى وانا لا اول ولا اخر واحدة يحصلها كدة فى الدنيا بس انا حكتلكو علشان صعبت علية نفسى انا كنت بس بتمنى احب واحد ويحبنى ونتجوز ونعمل مع بعض بيت حلو واسرة دا كان كل حلمى والله انا مش بكرة ولا هكرة اصلى بردو عشت معاه اجمل لحظات حب عشتها فى حياتى ولا يمكن انساها ابدا مهما حصل بينا مقدرش انساها ولا اندم عليها دى حكايتى يا جماعة معلش طولت عليكو اوى معلش اتمنى اعرف رايكو بصراحة..........؟؟؟؟؟؟؟

[القبطان]

مفيش حد بينسى الحب اللى بجد بس اكيد كان فية خلل بينكو هو اللى وصلكو لدة

[المجروحة]

ميرسى ليك
قبطان ولهتمامك بس دى قسمة ونصيب
مرورك اسعدنى

[Young DeviL]

بصي هيا قصه زي مانتي قلتي حصلت لبنات كتير انما المفروض متفكريش في الماضي عشان متتحسريش علي ايامك الحلوه ومتفكريش في المستقبل عشان متحزنيش علي نفسك

انتي قولي الحمد لله وعلي رأي المثل الضربه اللي متكسرش تقوي واديكي خدتي ضربه فوقي بقي واستغفري ربنا علي اي حاجه ممكن تكوني عصيتيه فيها واشكريه ان حالك موصلش لاكتر من كدا ياما كتير غيرك حصلهم اكتر بكتير يمكن عشان انتي لسه خارجه من الموضوع بتبصيله بكأبه انما فكري بعقلك شويه وانتي تفهمي ايه اللي حصل ما بينكم خلاكم كده واستفيدي منه.

قولي الحمد لله وادعي وقولي يارب وصدقيني ساعتها بس مش هتخسري ابدا

[الملكة جوجو]

بصى انا واحدة حكايتة زى حكايتك ويمكن تكون مجروحة اكترمنك وزيادة وصلت لدرجة انى دخلت المستشفى شهر وكنت بين الحياة والموت وكمان الى كان مخلينى تعبانة انى مكنتش عارفة اتكلم مع اى حد مش علشان خايفة لا واللة انا كنت صريحة جدا مع اهلى وخاصة امى والسبب انى كان عندى ما يشبة الشلل المؤقت مكنتش بتحرك ودة كلة بسب الزعل والنفسية الى زى الزفت وعدم الاكل وفجاة وقعت وحصل الى حصل وبعد كدة عرفت انى محدش يستاهل ولا دمعة واحدة من عينى

[هيام الشافعي]

كما تدين تدان

اختي المجروحه هسميكي اسم من عندي هقولك المجروحه المؤقته لان الجرح دا هيزول ان شاء الله بالصبر وبالرجوع للنفس بصي يا اختي مفيش عيب في اي حاجه انتي حكيتيها بس فيه ظروف اوقات بتطرا علي الحياه فبتغيرها وانا من انصار موضوع ان الحاجه في اولها بتكون مشدوده اوي بس مع الايام معرفش بيحصل نوع من انواع التعود والروتين والزهق بالذات من جانب الشباب فانا يا اختي كمان مش معاكي انك كل حاجه تعمليها برضاه وبمشورتو وانك تكوني ليك المطيعه في كل حاجه لا دا كلو غلط وبيديلو احساس انك مش ليكي شخصيه وانو مهما عمل فيكي هترجعيلو يعني بمعني اصح رخصتي نفسك ليه انا اسفه طبعا بس هقولك نصيحه الحب كرامه ولا لتهوين الكرامه من اجل الحب

انا اسفه للاطاله اعذروني
تقبلي اختي مروري

[بحر الحنان]

المجروحة على فكرة دي بقت حاجة عادية في الزمن ده دلوقتي وانا والله برضو حاسة بيكي لأننا تقريبا بنمر بنفس القصص الللي زي دي بس حاولي انك تتمالكي أعصابك أكتر من كده لأن انتي اللي تعبتي وباين انه هو ولا مهتم من أصله , وكمان اساسا بصراحة مفيش شاب يتصدق في الوقت ده نادرا جدااااااا ويكون اساسا بيعرفو بعض من الاول زي ماقالولك مفيش قدامك غير انك تقولي الحمدلله وتدعي ربنا وأكيد ربنا مش هيخزلك لأنه عمره ماخزل حد أبد وباذن الله تعالى هتلاقي اللي أحسن منه بمليووون مرة ويسعدك وتحبيه كمان ويقدملك قلبه على طبق من دهب انتي بس حاولي تنسى اللي فات وتفكري فس مستقبلك وماتسيبيش الحزن يسيطر عليكي لان الواحد مجربه وربنا يبعد عننا الحزن دايما انشاءالله

[m.chezoo]

يامجروحة ... فى حاجة للاسف اسمها ملل من الحب .. يعنى من كتر اهتمامك بيه وكلامك معاه .. وان كل حاجة بتبقى سهله وبيعمل كل عمله واختها وانتى ترجعى من غير ماتاخدى موقف
كلها حاجات تخليه يزهق ويمل .. لان الواحد بطبعه بيحب البنت اللى مش سهله فى عواطفها يعنى لو كنتى تقلتى عليه فى اوقات ومنعتى نفسك من حاجات هو كان بيحبها فيكى او عايزها ... مكنش فكر انه يفرط فيكى
انما انتى سهلتى كل حاجة وسهلتى حبك لحد مابقى سهل انه يسيبك ويدور على غيرك ..
لانه عارف انه لما هيشتاقلك بكلمه هيرجعك ... انما انتى لو كنتى منعتى نفسك مرة انك ترجعى وسبتيه كان هو اللى عمل المستحيل عشان رجعلك
ويحافظ عليكى
عموما اتمنى تكونى قادرة انك تاخدى قرار البعد ... ومهما عمل وقال مش ترجعى الا فى حالة واحده ... عايزنى يبقى من بيت اهلى تعالى واطلبنى
وقتها هيبان لو كان عايزك او بيتسلى ....
ومعلش زى ماقولتى مش هتبقى اول ولااخر واخر واحدة اتعذبت من الحب

[salama10]

ياريت يامجروحه تركزى فى الكلام اللى هأقوله كويس

انا حصل لي نفس اللى حصلك مع حبيبك والله

والحمد لله لسه عايش

من طريقة كلامك حسيت انك كنتى بتحبيه بجنون

بس صدقينى هو ما يستاهلكيش لانه لو بيحبك ما كنش فرط فيكى وانتى بتحبيه بالطريقة دى

الفراق صعب بس مش مستحيل صدقينى

هتتعبى شوية وتتعذبى بس مفيش حد بيموت من الفراق

ابعدى عن اى حاجة تفكرك بيه وانسيه لو روحك فيه

حطمى قيودك

من اعمق اعماق قلبى

اريدك ان تحطمى قيودك فقد ولى زمن القيود

لم ترضين ان تبقى فى الهوان وانتى يتمناك اى انسان

حطمى قيودك ولا تظلى اسيرة لتلك الاغلال

ماذا يعنيك من انسان جنى وخان

ماذا يعنيكى من نذل وجبان

ان الله لا يساعد من هو كسلان

حاولى ان تتركى جرحك ليطويه النسيان

طهرى روحك فان الروح خير من الابدان

اتركى له صفة الضياع والهذيان

كونى كالبحر الثائر على الشطأن

كونى كالبركان الذى لا يؤثر به غليان

كونى لى وطنا فانتى خير الاوطان

كونى كما كنتى دائما يشار اليكى بالبنان

لا اريد منك عذرا ولا برهان

حطمى قيودك واتركى عالم الهوان

اسف جدا جدا على الاطالة

[المجروحة]

انا مش عارفة بجد اقولكو اية انا والله فرحانة اوى من ردودكو دى الى حسستنى انى مش لواحدى متشكرة بجد لكل الى رد علية ونصحنى نصيحة ووعد منى ليكو جميعا انى هعمل بنصايحكو دى ميرسى ليكو جميعا بجد
وانتم معايا خلاص
مبقتش مجروحة