البلد دى معدتش محتاجه سياسيين ولا علماء ولا مهندسين .. البلد دى محتاجه صيع المقوله دى أنتشرت أوى فى الشارع المصرى , و طبعاً زى ما كلنا عارفين أن صيع دى جمع صايع, و كلمه صايع على ما اعتقد هى تحريف لكلمه ضايع , و كلمه ضايع هى تحريف لكلمه ضائع , فمفيش حاجه بتبقى على حالها زى ما كلنا شايفين , و من هذا المزنق .. قرر رئيس الجمهوريه انه يقوم بتغيير وزارى شامل كامل كل الوزراء من الصيع .. و نزل الرئيس بذات نفسه شبرا و الضرب الاحمر و الدويقه و الكيلو اربعه و نص و المناطق العشوائيه , عشان ينقى الحاشيه و الوزراء
و شعار المرحله الجايه دى هتبقى الرجول أدب مش هز كتاف بدل الشعار العظيم الرهيب الغريب العبور للمسقبل و البرنامج المهم المفيد السديد البيت بيتك ألى غير أسمه عشان يواكب المرحله الجايه و بقى الغرزه غرزتك
البرنامج أستضاف بعض الوزراء فى الجزء الأول منه .. و وعد بتكمله باقى الحوار
و معاكم المذيع المشهور الترتور محمود سعد

موسيقى البرنامج الممله

وزير الضرائب : المعلم أبو الكاشات

محمود سعد : أزيك يا فندم شرفتنا
أبو الكاشات : أهلاً ياض
محمود سعد : ياض ! ما علينا .. ممكن حضرتك توضح سبب أنفصال مصلحه الضرائب عن وزاره الماليه و تحولها لوزاره لوحدها
أبو الكاشات : أنت مش واخد بالك ولا ايه ؟ فاكر الأعلان القديم بتاع البلد بتتحرك ؟ دلوقتى فيه أعلانات البلد بتترقص ولازم نجارى الزمن .. و الفتره الجايه دى سوده على دمغاتكم كلكم لأنها بتعتمد بالأساس على الضرائب
محمود سعد : ايه الرد الدبلوماسى ده ؟ سوده ليه بس يا أستاذ أبو الكاشات .. هدى نفسك
أبو الكاشات : أنا هادى أهو
محود سعد (على طريقته الشهيره) : أهدى يا أستاذ .. أشرب شاى
أبو الكاشات : أنا عاوز شيشه
محمود سعد (للكنترول) : هاتوله شيشه
أبو الكاشات ( بعد ما جاتله الشيشه) : كرررررررررر المهم .. قولتلى ليه بقى هتبقى فتره سوده .. عشان أنتو فاكرين أن السياحه و قناه السويس دول بيجيبوا فلوس ! دى يا دوبك مصاريف عيالنا .. دى الفلوس الى بتجيلنا من قناه السويس بس يدوبك عشوه فى حته محترمه يا بيه .. كرررررررررر
محمود سعد : طب و حضرتك ناوى تعمل ايه فى الضرايب
أبو الكاشات : زى ما بقى فيه ضرايب على كل حاجه .. و بعد موضوع الضرايب العقاريه ده .. ناويت أعمم الموضوع بشكل أكبر
محمود سعد : بمعنى؟
أبو الكاشات : بمعنى أننا نستفيد بخبرات الحكومه السابقه الأليكترونيه دى و نخليها تعملنا عدادات .. و العدادات دى تتركب فى الرئه و الجهاز التنسفى
محمود سعد : قصد حضرتك الجهاز التنفسى
أبو الكاشات : أأأأأأأأه أنت معندكش خلفيه .. لا ما هما غيروها و خلوها التنسفى .. المهم .. و العدادات دى هتقيس كميه الهواء ألى بتتنفسوها و فيه أخر كل شهر بتاع العداد هيفوت عليكم و يقرأ العداد و يديكم الفاتوره .. فيها حاجه دى
محمود سعد : قصدك هندفع ضرايب على الهواء الى بنتنفسه
أبو الكاشات : أه .. و مش بس كده ده أحنا هنعمل عدادات للجهاز الهضمى كمان و نعرف لمؤخذه كميه ال
محمود سعد ( بيقاطعه) : مفهوم مفهوم .. و ايه كمان
أبو الكاشات : و كمان ضرايب أسمها ضرايب المتعه الزوجيه .. و طبعاً يا بيه عرفت العدادات هتتركب فين؟ كررررررررررر هيع هيع هيع .. و بكده يبقى خدنا ضرايب على المتعه الزوجيه و كمان هنخلى الناس تستخسر تمارس حياتها الزوجيه على الفاضى و على المليان ..و بكده هيبقى حل هايل لتحديد النسل
محمود سعد : بجد واللهى؟ طب ما تركبو عدادات على اللسان عشان ندفع ضرايب على الكلام كمان
أبو الكاشات : واللهى فكره أول ما ارجع مكتبى همضى .. أحم قصدى هبصم على الموضوع ده .. غير الحجر يااااااااااااض .. كرررررررررررر

وزير السياحه : مستر حماراويه

محمود سعد : أزى حضرتك يا مستر حماراويه
حماراويه : فاين ثانك جاد على كل شئ
محمود سعد : يا سلام على أيمان حضرتك
حماراويه : أيمان مين ؟ ما علينا خش فى الحوار
محمود سعد : قولى حضرتك ايه هيا أنجازاتك فى الوزاره من ساعه ما كلفك بيها الريس أو حسب المرحله الجديده دى بقى أسمه البوب الكبير
حماراويه : حضرتك قبل ما أجى أنا الوزاره كان كل يوم بيتسرق حاجه جديده من المتحف المصرى ..و غلبنا حضرتك , كتبنا يافته ع الباب تقول ممنوع دخول أى مسطول و رغم ذلك مفيش فايده .. و كتبنا تحت كل تمثال و تحفه ألى بيسرق بيخش النار و برده الناس معندهاش دم .. بس انا بقى عملت حاجه جديده منعت السرقه دى تماماً
محمود سعد : حقيقى ؟ حضرتك أخيراً حطيت حد للسرقات دى
حماراويه : يس أوف كورس و عهد الله .. أبسلوتلى .. لأنى غيرت أسم المتحف المصرى و خليته المعرض المصرى و طالاما كل حاجه بتتسرق بقى مهما عملنا .. فألى بيعوز حاجه يشتريها و أهو بدل ما تتسرق و تروح منا .. أهى تروح منا بعد ما نطلعلنا بسبوبه
محمود سعد : اللهم لا أعتراض .. على العموم أنا سعيد جداً أنى أستضفت وزير مثقف زى حضرتك و على الاقل لقيت واحد فى الوزاره بيتكلم أنجليش
حماراويه : مش أنجليش بس لا و كمان أنجليزى .. طبعاً أمال ايه مش وزير السياحه بقى
محمود سعد : فى نهايه لقائى معاك .. تحب تشرب شاى
حماراويه : لا أنا عاوز كابشتينو أذا سمحت

وزير الشباب و الرياضه : الحاج زلومه الشايب

محمود سعد : أزيك يا حج .. معلش تعبناك و جبناك المشوار ده كله
زلومه الشايب : كح كح كح .. معلش يا محود شعد يا أبنى متطلبات شغلى بقى
محمود سعد : أشرب بق ميه عشان ترتاح من المشوار ده
زلومه الشايب : مش عاوز ميه .. كتر خيرك يبنى .. كح كح كح
محمود سعد : مش عاوز ميه .. أشرب شاى
زلومه الشايب : يا ريت كوبايه ينشون لو شمحت
محمود سعد (بعد كوبايه الينشون .. قصدى الينسون) : أحكيلنا يا حاج زلومه عن خططك لمستقبل أفضل للشباب
زلومه الشايب : يبنى محش فاهم الشباب أكتر منى .. أشئلنى أنا ..خخخخخخخخخخ أتفووووه
محمود سعد : أيه ده يا عم الحج .. بتف على أرضيه الأستوديو
زلومه الشايب : معلش يا أبنى البلغم عامل زى النار على شدرى
محمود سعد : طب معلش يا والدى أنا أسف .. كمل
زلومه الشايب : أكمل أيه
محمود سعد : ايه يا عم الحج أنت جالك زهايمر ولا ايه
زلومه الشايب : أنت مين .. أنا فين
محمود سعد : أنا محمود سعد يا سياده وزير الشباب و الرياضه .. ها أفتكرت
زلومه الشايب : أيوه .. معلش بقى يا أبنى .. عوامل الشن
محمود سعد : ممكن أعرف يا أستاذ زلومه على أساس أيه أختارك البوب الكبير وزير للشباب و الرياضه
زلومه الشايب : على أشاش الخبره يا أبنى .. أنا من شنين كتييييييره أخترعت الكوره الشراب
محمود سعد : طب ممكن تحكيلنا عن أنجازاتك فى
زلومه الشايب : خخخخخخخخخخخخخ
محمود سعد : ايه ده أنت نمت ولا ايه .. أصحى .. تشرب قهوه .. هاتوله قهوه
زلومه الشايب (بعد ما صحى و شرب القهوه) : شكراً يبنى .. لا لا مش شكراً .. أيه ده .. هيا القهوه دى تقيله على قلبى كده ليه
محمود سعد (و هو قايم من الكرسى) : مالك يا سياده الوزير مالك
زلومه الشايب : أأأأأأأه بلا شياده وزير بلا نيله .. ألحقوووووونى
محمود سعد : أسعاف يا جماعه أسعاف بسرعه .. أستاذ زلومه ؟ طب أشرب شاى طيب

وزير الأسكان و التعمير : الأستاذ فتحى كشك

محمود سعد : أهلاً وسهلاً بحضرتك
فتحى كشك : أهلاً يا خويا
محمود سعد : من الجميل أن وزاره الصيع تضم شاب صايع فى سنك الصغير ده
فتحى كشك : أه ما أحنا غالباً هنعتمد على الشباب بنت ال تيت ألى زيى .. بعد حادثه وزير الشباب و الرياضه أبن ال تيت ده الله يرحمه مطرح ما راح بقى
محمود سعد : طب ممكن الألفاظ شويه يا سياده الوزير .. عشان الراجل بتاع الرقابه هيلاحق على ايه ولا ايه
فتحى كشك : تيت .. أحنا يابا ميهمناش, يلعن تيت أم أى حد .. بلا رقابه بلا تيت على الفاضى
محمود سعد : ما علينا .. طب ممكن حضرتك تقولنا ناوى تعمل ايه فى مشروعات أسكان الشباب
فتحى كشك : أحنا و لمؤخذه عاملين كذا مدينه جديده للشباب جامده تيت و بأسعار رخيصه تيت
محمود سعد : و أسعارها دى تتراوح من كام لكام
فتحى كشك : أن شاء الله من 200 ألف لحد 300 ألف و أنت طالع كده .. أسعار جامده و بنت تيت صح
محمود سعد : طب و دى للشباب أزاى حضرتك ؟ يعنى مش شايفها غاليه شويه
فتحى كشك : تيت .. أنتوا كمان هتتأمروا .. أسعار مواد البناء كل يوم فى العالى .. رجل الأعمال أبن تيت ألى ميتسماش ده بتاع الحديد ولع الأسعار بتاعت مواد البناء خالص .. و ألى مش عجبه بقى بـ تيت أمه يشرب من ميه البحر
محمود سعد : طب هدى أعصابك حضرتك .. أقولك على حاجه ؟ أشرب شاى
فتحى كشك : فيه حشيش عندكم
محمود سعد : لا واللهى
فتحى كشك : ليه كده بس ما هو بقى يتباع فى الأكشاك بفضل وزاره الصيع .. ما علينا .. طب خدلك سيجاره كوكو الضعيف
محمود سعد : لا الحقيقه مبدخنش
فتحى كشك : أحسن وفرت
محمود سعد : طب مفيش بديل بدل ميه البحر ده .. يعنى مثلاً شقق أسعارها أرخص
فتحى كشك : فيه مشروع جديد بنعمله .. أسمه كشك لكل تيت .. هاع هاع .. لكل مواطن يعنى و لمؤخذه
محمود سعد : كشك ؟ عايز شبابنا يسكنوا فى أكشاك
فتحى كشك : و ماله الكشك .. أنا أسمى فتحى كشك .. مش عاجبك أسمى يا ابن تيت و عمال تقولى شاى و مش شاى يا أخى يلعن تيت أمكم كلكم .. أنتوا جايبنى عشان تيت أمى .. تيت أم ده برنامج يا جدع

وزير المواصلات : الأنسه نفوسه العمشه

محمود سعد : أهلاً بحضرتك .. أول وزيره فى وزاره الصيع .. و شئ جميل أنهم يعتمدو على العنصر النسائى المحترم فى الوزاره
نفوسه العمشه : هىىىىى هىىىىىىىى محترم طبعاً .. ده أنت ألى محترم و زى القمر
محمود سعد : أحم أحم .. نرجع لموضعنا .. أيه تعليقك على أعتماد وزاره الصيع على العنصر النسائى
نفوسه العمشه : دول صيع يا باشا .. يعنى لازملهم حته طريه لزوم مجلس الوزراء .. عشان يبقى مجلس طرى .. و طبعاً مش هيلاقوا أطرى من كده .. هىىىىىىىىى هىىىىىىىىى
محمود سعد : ايه سرينه المطافى دى .. ما علينا .. طب حضرتك عملتى ايه فى موضوع المواصلات
نفوسه العمشه : هخلى ألى عايز يركب يركب .. هىىىىىىى هىىىىىىىىى .. أحنا شعب غلبان يا سعاده الباشا و عايزينه يعيش .. و مفيش أحلى من زحمه الأتوبيسات لزوم الصياعه
محمود سعد : يعنى من وجهه نظرك أن زحمه الأتوبيسات مفيده
نفوسه العمشه : طبعاً عشان الشعب يخرج الكبت ألى عنده فى الأتوبيسات
محمود سعد : يا أنسه أحنا شعب محترم .. و فيه ناس محترمه من حقها تركب وسائل مواصلات محترمه
نفوسه العمشه : يعنى انا مش محترمه
محمود سعد : حاشى لله هو انا قولت كده برده
نفوسه العمشه : يا خويا ولا قولت .. يعنى انت جبت الديك من ديله .. هىىىىىى هىىىىىىىى
محمود سعد : أحم .. طب بالنسبه لحوادث القطارات
نفوسه العمشه : يركبو طيارات .. أنتوا هتتأمروا بروح أمكم
محمود سعد (و هو مخضوض) : أيه ده سعادتك بتعملى ايه
نفوسه العمشه : يا خويا بقلع جاكته الترننج عشان الدنيا حر
محمود سعد : حرانه ؟ أشربى عصير لموناده
نفوسه العمشه : هىىىىىىى هىىىىىىىى ليه يا خويا هو أنا عندى أنفلونزا ولا ايه .. أنا عايزه شامبانيا
محمود سعد : شمبانيا فى مبنى الأذاعه و التلفزيون
نفوسه العمشه : أيوه .. و على رأى أستيفان روستى : الشامبانيا مشروب الفتاه المهذبه
محمود سعد : ما علينا .. طب حضرتك ايه تعليقاتك على حوادث البواخر ألى بتنقل الحجاج
نفوسه العمشه : واللهى ألى مش عاجبه يروح يزور أولياء الله الصالحين ولا يروح الحسين و السيده زينب .. هما لازم يحجوا يعنى