قهوتنا على الانترنت
____ __ _
كثيراً ما يكون الصمت أبلغ من الكلام
لو واحد قال لواحده انا معجب بيكي وعاوز اقابل بابا
وتشبك ايديها في بعضها و وشها يجيب ألوان وتبص في الارض و تسكت
تبقى موافقه
لو الاستاذ فضل يشرح في نقطه معينه في درس معين وسأل واحد وقاله
فهمت؟ .. والواد يتنح في الاستاذ و هو بيهرش في شعره و يسكت
يبقى الواد مش فاهم
لو عيل صغير عينه جت في عين ابوه
ولقيه باصصله ورافع حاجب ومنزل التاني وبياكل في بقه و ساكت
يبقى الواد عمل حاجه غلط
لو واحد قاعد في أمان الله الساعه 2 بليل وجرس الباب رن و فتح
لقي بنته شايله ابنها في ايد وفي الايد التانيه شنطة هدوم و ساكته
يبقى ورقة طلاقها هتوصله الصبح
لو المنخب بيلعب في استاد الكليه الحربيه
وتلاقي الجماهير مش طالعلها صوت و ساكته
يبقى المنتخب موكوس
انما لما نلاقي شخصية مهمة بتتعالج على نفقة الدولة لانها شخصية قومية
في الوقت اللي الناس بتموت فيه في طوابير العيش
ولما نلاقي واحد شغال رئيس مجلس ادارة في مؤسسة وعضو من اعضاء الجمعية العمومية في مؤسسة منافسة و عضو مجلس شعب و بيشغل حوالي اربعين وظيفة رسمية غير المشاريع الشخصية
في الوقت اللي فيه ملايين الشباب اللي مش لاقيه شغل
ولما تلاقي فنان بيكسب ملاين من البوم غنائي او لاعب كورة خد كام مليون عشان جاب جون في متش مهم
في الوقت اللي لسه فيه ناس بتاخد 150 جنية راتب شهري
ولما نلاقى شخصية سياسية عندها فيلا في الشروق وشاليه في الساحل الشمالي وسبع شقق عالنيل واربعة في اسكندرية واتنين في الوادي الجديد
في الوقت اللي فيه الاف المواطنين نايمين فوق سطوح عماره آيلة للسقوط وطالعلها قرار ازالة من خمس سنين غير عشرات الالاف اللي قاعدين في عشوائيات غير اللي مش لاقيين ده اصلا
وغيره وغيره وغيره
و ساكتين
يبقى دي قمة البلاغة والحكمة
لأننا كده
يا شعب غلبان و طيب و فـ حالة وراضي بقليله ومش بيبص للقمة غيره
,,
يا شعب ذكي وطموح وصبور ومستني الوقت المناسب عشان يثور
التعديل الأخير تم بواسطة مصراوي كافيه ; 23 - 7 - 2009 الساعة 12:10 AM
الذين يشاهدون الموضوع الآن: 1 (0 من الأعضاء و 1 زائر)
ضوابط المشاركة
رد مع اقتباس