دوله ع الورق

[عفريت أفندى]

بسم الله الرحمن الرحيم

شعر سياسى قريته و عجبنى

يا رب يعجبكوا

دوله ع الورق !!!

كل شىء تمام ،،، بس عَ الورق
الأمن مستتب وسايد النظام ،،، برضه عَ الورق

على الرغيف طوابير
يحـتار فيها الفـقـيـر
وبلـدنا خـيرها كتير
ما شـفـنـا منه بشـير
غير بس فى التقارير وأهـو كله عَ الورق
الناس أكيد سعيدة،،، بس عَ الورق

مدارسـنا مالـيانه
طلاب وزهـقـانه
من بكره قـلقـانه
وأسـاتذه تعـبانه
محـتاجـه لإعـانه
تعـليمنـا بـأمانه ،،، يـدوب على الورق
مدارسـنا دى منـاره ،،، بس عَ الورق

مصـالحـنا موقـوفـه
على رشـوه موصـوفه
تنجـزلك الأعمال
وتصـلّح الأحـوال
وضميـرنا عـال العـال ،،، بس عَ الورق

ظابط ومتظبط
فى الخلق بيربط
ويجرجر الأغـنام
على حفله فى الأقسـام
شـلاليت على أقـلام
تجـيب وراك قـدام
الحُـر ليـه ينضـام ،،، فى الحق لو نطـق
وأهـو كله فى التمام ،،، بس عَ الورق

لعيب وبيطبش
لكنه جاب كام جون ،،، يكبش فلوس بالكوم
ومغنى بيسرسع
واقف بيتمرقع ،،، نعتبره نجـم نجـوم
أما العلوم والأدب
فصاحبها ياللعجـب ،،، يدوب ستراه الهدوم
طاوى المرار جـواه ،،، مدفون وسـط الورق
العـلم هو الجـاه ،،، بس عَ الورق

وعندنا وزارات
مخصوصه للباشوات
مشغوله بالندوات
وصورتها فى الإعلام
انجازها يطلع كام؟
أصـفار ورا أصفار
بانخدها باسـتمرار
أكيد ده أى حـمـار
إذا كان فى يوم يختار
يرفض يكون زينا ،،، لو حتى عَ الورق
والشغل كله تمام ،،، بس عَ الورق

بكره التاريخ هايعدى
من عـندنـا ويهـدى
ويشوف مآسـينا
يكتب ويرثـيـنـا
بجمله واحده يادوب
على صفحـته مكتـوب:
" كان فيه هنـا دوله ،،، بس عَ الورق"

للعلم منقول

تحياتى

[ايسل]

فعلا كله على الورق

مشكور وليد على نقل هذه الكلمات المميزه

[عفريت أفندى]

يسل

فعلا كله على الورق

مشكور وليد على نقل هذه الكلمات المميزه

تسلمى أختى ايسل

تحياتى لتواجدك الرائع

و مشكوره على مشاركتك فى موضوعى