>>>( رسالة إلى بابا حسنى )<<<

**Special Girl** · 4 - 10 - 2010, 08:54 PM

>>(سيدي الرئيس)<<

فى كل مناسبة ليك

كل سنة وانت طيب

واحنا مش طيبين

كل سنة وانت حاكم

واحنا محكومين
واحنا مظلومين
واحنا متهانين

ويا تري يا حبيب الملايين
فاكرنا وللا احنا خلاص منسيين

فاكر المعتقلين
فاكر الجعانين
فاكر المشردين
فاكر اللي ماتو محروقين
فاكر الغرقانين

الله يكون في عونك - ها تفتكر مين وللا مين

في عيد ميلادك الكام وسبعين
بقول لك كلمتين

الأوله
عشيتنا طين

و هل تعلم أن النيل بقي رشاح
و الجو أصبح بيئة والعيشة ولعة
و الشرفا قلوبهم عالبلد والعة
و انت عاملهم مذبحة ولا بتاعة القلعة
و الإقتصاد سداح
و السرقة بقت كفاح
و مصر متاحة بس للسياح
و عرض البلد بقي مستباح

و الثانية
ورتنا الويل

دا الخطوة في عهدك بقت ميل
و الضحك بقي نواح و عويل
و الكوسة
عارف الكوسة
ممكن أقول لك فيها مواويل
و الجامعة بقت يا إما كباريه أو دار مسنين
و الشباب معظمهم من غير خمرة سكرانين
و العلم عز علي المتعلمين
و الأساتذة بقم دجالين
و القادة بقم طبالين
و اديني في الهايف يا حبيب الملايين

و الثالثة
عارف اليابانيين
زمان في سنة اتنين و خمسين

كان عندنا تروماي و كان عندنا علم و متعلمين
و ثقافة و مثقفين
و أدبا و علما و فنانين
و كانو اليابانيين
بالنووي لسه مضروبين
و للصدقة مستحقين

دلوقتي إحنا فين و هما فين
هما فوق و احنا في أسفل سافلين

و الرابعة
أمن بلدنا بقي تنين
و المحاكم اتملت مظالم
و العدالة بقت كمالة
و كلمة الحق في الزبالة
و أصحابها في الزنازين

و الخامسة
القطاع العام....عام
و الفساد.....ساد
وفي جتة بلدنا بيرعي
أفتكر لجنابك إيه و للا إيه
و كل ذكري ليك بدمعة

آآآآآآآآه آآآآآآآآه

أنا كنت حالف ميت يمين
أكملهم لك واحد وعشرين
بس ها كفيهم ورق منين
و كل سنة و انت ............
و احنا طيبين

(ربنا يستر)

**Special Girl** · 4 - 10 - 2010, 11:18 PM

**احمد 2229** · 5 - 10 - 2010, 02:46 AM

على فكرة الريس فى التمانيات عمرة حاجة وتمانين

**ايسل** · 5 - 10 - 2010, 04:31 AM

مهما قولنا ومهما عالينا صوتنا بردوا

مش هيسمع غير دماغه واللى حواليه
يبقى نقول ربنا يطول فى عمره ويخدنا احنا هو ده الحل
تسلمى جوجو حبيبتى على الرساله ياريت تتسمع

**عفريت أفندى** · 5 - 10 - 2010, 07:58 AM

منوره السياسى يا جوجو

و ماتخافيش إن شاء الله ربنا هيستر

طلعى إنتى اللى جواكى

حتى الكلام مش هنطلعه ولا ايه ؟

دووووووسى يا جوجو و لا يهمك

بس يارب بابا حسنى يستلم الرساله و يقراها

تسلم الأيادى

**هشام اللول1** · 5 - 10 - 2010, 10:45 AM

شكرا لكي علي الكلمات الجميله
نورتي القسم السياسي
ورنا يستر فعلا

بارك الله فيكي وحفظك ورعاكي

**Special Girl** · 5 - 10 - 2010, 11:52 PM

ميرسي يا جماعة بس شكلها هتكون اخر مرة انوره
انا مليش فى السياسة
ده بوئين بس كده كانو وقفين هنا
قلت اطلعهم
مبسوطة ان الكلام عجبكو
ويا رب بجد الرسالة توصل
بس مستحيل

الموضوع: >>>( رسالة إلى بابا حسنى )<<<

أدوات الموضوع

>>>( رسالة إلى بابا حسنى )<<<

معلومات الموضوع

الأعضاء الذين يشاهدون هذا الموضوع

الكلمات الدلالية لهذا الموضوع

ضوابط المشاركة