عجبتنى جدا فكرة البرلمان الموازى
و خطرت ف بالى فكره مجنونه
بما إن الشعب مطحون و مش حاسس إنه عايش فى بلده
ممكن الشعب يعيش فى بلد موازيه
كل حاجه فيها تكون موازيه
يعنى مجلس شعب موازى و مجلس شورى موازى و حكومه موازيه و وزراء موازيين
و رئيس وزراء موازى
و صراحه كبرت ف دماغى و قلت يا ريت بالمره نلاقى رئيس موازى
كل الخدمات ف بلدنا الموازيه لازم تكون موازيه
حتى العمله اللى هنتعامل بيها هتبقى الجنيه الموازى
و طبعا بماإننا هنكون فى بلد موازيه لازم نكون شعب موازى
المواطن الموازى ياخد الجنيه الموازى و يروح للفكهانى الموازى يشترى منه طماطم موازيه
كمان يقدر المواطن الموازى يروح للجزار الموازى و يشترى منه لحمه موازيه
هنحل مشكلة العنوسه فى بلدنا الموازيه
يعنى الشاب الموازى يتجوز البنت الموازيه جواز موازى
مشكلة المواصلات ليها حل ف بلدنا الموازيه
المواطن الموازى يركب سياره موازيه او اتوبيس موازى و يمشى بيه فى طرق موازيه منعا للإزدحام و كمان إشارات المرور هتكون موازيه
و بكده هتتحل كل مشاكلنا
بس هتفضل مشكله
لازم ندور على عالم موازى نعيش فيه يكون جيراننا فيه دول موازيه
أعتقد إن دى حلول موازيه لكل مشاكلنا اللى مش عارفين نحلها و اللى السبب فيها هو سكوتنا و صمتنا و خوفنا
و شرط أساسى عشان تكون مواطن موازى فى بلد موازيه إنك تكون لا ترى لا تسمع لا تتكلم
أعتقدإن الشرط متوفر فى السواد الأعظم من شعبنا المطحون
اللى عاوز يخرج من عيشته الموازيه اللى ف الأحلام و اللى بعيد عن الواقع لازم يكسر حاجز الخوف
لازم يطالب بحقوقه
لازم يواجه الفساد
لازم يغضب و يثور على اى اوضاع تمس كرامته و تمس بلده
يا ترى انت ايه رأيك ؟
تفضل مواطن موازى و تعيش ف البلد الموازيه؟
ام تثور و تغضب و تطالب بحقوقك و تعيش إنسان فى بلد حقيقيه و عالم حقيقى ؟؟؟
مواطن موازى يبحث عن بلد موازيه ..!!
رد مع اقتباس
المشاركة الأصلية كتبت بواسطة ايسل
