http://sphotos.ak.fbcdn.net/hphotos-..._3121982_n.jpg
قامت الثوره وكلنا قومنا ساعتها ننادى
أحمد كان نايم لحظتها وأيمن كان قاعد فى النادى
مروه كانت بتذاكر لما أميره طلبتها
وقالت ثوره يامروه تعالى قالتلها عادى
ماهى ثوراتنا كتيره يابنتى وملهاش فايده
طول ما الظلم وكل رموزه فى مصرنا سايده
يقدر حد يقول ظلمونى أو جرحونى
حتى لو النار فى الدار قايده؟!
قالت لأ ياحبيبتى خلاص
المرّادى اتجمّع أحمد..مينا..ولبنى وكل الناس
أصل الظلم كمان زهقّنا وفاض بقى بينا
المرّادى يامروه هنوصل لو كملنا وبإخلاص
قامت مروه ويا أميره على التحرير
ايه ياأميره دا شكل الوضع بجد خطير
قالت فعلا لازم كلنا نعمل حاجه
واحنا فداها يامروه ولازم على ايدنا تدوق التغيير
فجأه اتقلب الحال ولقينا
ناس بسلاحهم هجموا علينا
مروه حبيبتى صابتها رصاصه
بغدر وظلم مأثر فينا
زاد إصرار الكل ساعتها وقالوا هنوصل
هنحارب ونموت ونضحى ومهما هيحصل
احنا فداكى يامصر بروحنا
ودمنا فيه دمك ياحبيبه أصيل ومأصل
قومنا حاربنا..قومنا رفضنا الظلم..عارضنا
بس سلاح الغدر ورانا بجد قاصدنا
ماتوا صحابنا وماتوا خواتنا وكل شهيد
يزيد إصرارنا على التغيير ويعلّى رصيدنا
رمينا الخوف وبدأنا نشوف الدنيا بعينّا مش بعنيهم
مهما عملنا دا شئ لا يخص الظالمين دولا ولا يعنيهم
بس المولى ساندنا قدرنا بعزم وهِمه
نثور ونغيّر مستقبلنا وننسى ماضيهم
واتغيرنا أهو وقررنا وادينا وصلنا
واللى من الناس التانيين غيران مننا يجى يحصّلنا
احنا المصريين أصحاب المجد دا كله
لا يمكن صوت الظلم ف يوم تانى هيكسرنا
