الصحافة والى بتعملة فينا الصحافة
الواحد مش عارف يقول ايه والله....!!!
عالم بتوسعها اوى وتحس من كلامهم اننا عايشين فى دنيا غير الدنيا
يعنى تحسسك ان الدنيا لسا بخير واللحمة رخيصة اوى يا جدع والعيش مش لاقى الى يشتريه ومع انك لسا شاب عندك 25 سنة الا انك متجوز وعندك عيال وفيلة فى الزمالك وشاليه فى الساحل الشمالى ومش عارف تودى الفلوس فين..
والمشكلة انهم عارفين اننا مش هنصدق
علشان حضرتك اول ما بتنزل الشارع والدنيا تديك على قفاك والا تغيب تشتغل طول الشهر ذى الحمار وفى الاخر تاخد 120 جنية الى مش بيكفوك موصلات حتى لشغلك بتعرف ان الكلام دا كلة نتش وهجايس وان الناس دى عايزة تلبسنا العمة.
............................
والناس التانية بقى تحسسك ان الدنيا دى اعوذ بالله جهنم
تكرهك فى البلد وفى الدنيا وفى عيشتك وفى نفسك كمان لدرجة انك بتلعن اليوم الى اشتريت فيه الجرنال دا
وانصحك بلاش تقرى الجرنال دا لأخرة علشان ممكن تولع فى نفسك فى الاخر .
....................................
وياسلام بقى على الجرايد بتاعة الحوادث دى أما عليها شويه صور يا جدع
وشويه منشتات كبيرة بعرض الصفحة وطبعا كلها مغريه خصوصا لو جة اسم الخبر جنب صورة كدا من الى بالك فيها
ولو نشرلك خبر اغتصاب مثلا والا القبض على بيت دعارة بيبقى هاين عليه ينزلك فيلم هدية مع الموضوع
المهم انك تشترى وتتكيف حتى مش مهم تقرى الجرنال
اتفرج انت بس على شويه الصور الى على الغلاف
وابقى قابلنى لو لقيت خبر تصدقة
لدرجة انه ممكن يقولك ان امك ماتت من اسبوعين مع انها فى المطبخ بتعملك العشا.
......................
الى يضحكك بقى يا سيدى ان فيه بعض الصحف تحس من كلامهم انهم ناس عبط
او عالم مبتفكرش خالص
مثلا
جريدة معينة وبلاش ذكر اسماء علشان ربنا يسترها معانا
كتبت وقالت ان التلفزيون المصرى عليه العوض فية
وانة بيعرض مسلسل امريكى اسمة فريندز
الى معظمنا سمعه
والمفروض ان المسلسل دا ميتعرضش على الشاشة المصريه
طب ليه يا جدعان....؟؟؟
قالك انة فية عرى كتير واصوات مثيرة وسفالة وقلة ادب وشذوذ كمان
وان فى حلقة معينة الرقابة حذفت منها 16 مشهد علشان مينفعش يتعرضوا
طب والله كلام جميل والجرنال عداة العيب
بس الى يضحك بقى
ان الجرنال دا حاطط البوستر بتاع المسلسل وفيه كام مذة كدا شبة لبسين من الى قلبك يحبهم يعنى
والمصيبة الاوكس بقى انة كاتب الكلام الى حذفتة الرقابة
طب انت يا بنى أدم بتقول مينفعش نشوف المسلسل كلة والرقابه دى وحشة يا سيدى وعرضت المسلسل
وشوف بقى الوحش لما يعرض وحش ويحذف منه
بيبقى الى حذفة اوحش
جاى انت بقى تنشلرى الجمل المحذوفة
مقدرش اقولك غير
روح الله يكسفك
والله فكرونى بواحد راح لواحد تانى وقله فلان بيشتمك وبيقول عليك (يابن ال .... ويابن ال......)
انا مش عايز اقولك هو قال عليك ايه علشان متعملش مشكلة
طب مانت قولت يا بهيم
جاى تقولى مش عايز تعمل مشكلة.
..................
الواحد خلاص فقد المصدقية فى كل الجرايد
لا بقى يصدق حكومى ولا معارض
حتى فى درجات الحرارة هعتمد على نفسى فى دى كمان
هلبس قميص كم وتحيتة قميص نص كم
الجو كان حر اقلع الكم والبس النص ولو برد اهو الكم معايا البسة تانى
بس المشكلة الواحد يعرف الدنيا ماشية حواليه اذاى
هنا هعمل بحكمة واحد صحبى شكلة كان خابط حجرين
وبصلى كدا وقالى مع انى اعتقد انة مكنش هو عارف بيكلم مين
عليك بالبلكونة
افضل بص منها وهتعرف الناس ماشية اذاى
