يا حاجه مصر

يا حاجه مصر
ابنك بقه مديون
وانذل يا حاجه على كل شكل و لون
غصب عنه قرب يكون مجنون
الاقيش معاك يا حاجه
قد خمسين الف
والله مش طمعان ولا غبى ولا بلف
دا كل اللى محتاجه
ابنى يدوب مكان ينفع يكون مسكون
ما انش عايز تريليون
ولا طمعان فى كام مليون
كل اللى عايزه الستر
يسترنا رب الكون
جيت استلف منك
لقيت حتى التراب مديون
معلش يا حاجه
صعبك مسيره يهون
الله يكون ف العون
وحزنى بقه اضعاف
عشانك بقيت محزون
وانا اللى كنت مبسوط يوم زفافك
شاهد على عقدك مع الماذون
لكن عريسك اللى ما يتسمى
فتحت بفلوسك سجون
اللى يقول عايز فى السجن يرميه
والخير الكبير كله ياخده يخبيه
فى كل بنك شويه
بحساب سرى ويخفيه
مسيره يتعذب
وتبقى كل فلوسه نيران بتكويه
حسبنا الله ونعم الوكيل فيه
بس ادعيلى يا حاجه
اقدر اشوف لى بيت واشتريه
ويحفظنا ويحفظك ربنا ويصون
وبرحمته يرحمك ويرجع فلوسك
من كل اللى كان بيخون
ويفرج عنا ربنا ويفك الديون
يارب فى جمعه
لك ساعه اجابه للدعاء
بندعى يارب دلوقت تكون