في مترو الانفاق بصرف النظر عن الزحمة و الناس اللي غاوية تدوس على جزمك و تحس انه بينشن عليها ...اصعب لحظة هي مرحلة الصراع خصوصا في رمسيس و التحرير ..اول ما المترو هيوصل المحطة تحس انك في فيلم حرب الطروادة " تروي"و الطرفين بيصارعوا على البقاء اللي عايز ينزل و اللي عايز يطلع و البقاء للاقوى المهم ان بعد التخبيط و الشتايم و الخناق بيبقى فيه وقت لحد لما الباب يقفل ...بجد حاجة تحرق الدم
------------------------------------------------
و مازلنا متواصلين من الشارع المصري وبستغرب من كمية المطبات اللي ملهاش لزمة و مش عارف هو المفروض ان السبب من المطب ان العربيات اللي جاية بسرعة تهدي فلازم المطب ده يكون قبل تقاطع...مدرسة...مكان مرور المشاه لكن الظاهر ان اللي بيزفتوا الشارع بيحبوا يعلموا هم وصلوا لفين النهاردة فبيعملوا مطب علشان تاني يوم يكملوا من بعد لان شوية الزفت اللي بيترشوا على الارض مش بيفرقوا في حاجة...بجد حاجة تحرق الدم
----------------------------------------------------
انا كواحد من ابناء الطبقة المتوسطة بركب المواصلات العامة تاكسي - ميكروباص ( زرفييز) و مترو الانفاق و الحقيقة دايما اكتر حاجة بتشدني في مترو الانفاق اني لما اروح اقطع تذكرة الاقي اثنين واقفين في طابور انبسط و اقف معاهم تالت ابص الاقي واحد جي بعدنا و يبص لينا واحد واحد و يروح رايح على الشباك على طول ...اللي هيفرسني بقى هو وقتها بيفتكرنا ايه ؟؟ مثلا ديكور للشباك على اساس انه شباك و يلزمه طابور ...او فراغ مثلا بدل ما نقعد على القهوة قلنا اهو نعمل طابور...بجد حاجة تحرق الدم
---------------------------------------------------------
وياريت اللى عندو حاجات من اللى بتحرق الدم دى يورينا
مستنى ردودكم
