انا اللى بين ايديكى بتوه
وبتخيل كأنى ماكون
معدتش اعرف امبارح
ولا بكرا سنين سارح
خيال احلام
مانيش عارف حروف اسمى
ولا شكلى ولا رسمى
بدوب فيكى فضمينى
وباديكى دى لمينى
مانا اشلاء
ومتوزع على حواء
ومتسول على ابوابهم
ومتشتت على عيونهم
وع الطرقات
كأنى سراب
وضوء خافت
بعيد نازف
ألم وعتاب
ما بين بيضه وبين سمرا
مابين شيشه وبين خمره
وعايش عيشه على جمره
وبتقلب على جروحى
كأنى دبيح
ومستنى ميعاد الشوى
.................
فضمينى على جيدك
ولمينى من شتات نفسى
ودلينى على سكه
اكون فيها ما بين اسمك
وبين رسمك
عبير نازف على كتفك
ومستنى حنان قلبك
مانا من يومى فيكى بتوه
ولا عارف مكان قلبى
فى تكوينى
فدلينى على ابوابك
هكون ف القلب بوابك
وحارس كل اعتابك
هكون نسمه منديه
وغنوة شوق معديه
على جبينك
هكون ف الحب سلطانك
وفارس كل احلامك
فدلينى لباب قلبك
طريقه منين
مانا فى بحورك
غريق تايه
ما بين حرفين
......................
بحبك كل ما املك
وراس مالى
بحبك كلمه فى كيانى
وتكوينى
بحبك قبل ما اشوفك
بحبك قبل ما اتمنى ليالى الحب
وحبك عاد ورجعنى
ومد حبال وطلعنى
مانا عايش ف دوامه
من الحرمان
من الاحزان
وعاد حبك وفوقنى
ورجعنى من سنين يأسى
...............
ياكلمه تايه ف سطورى
انا م اليوم محتاجلك
ومشتاقلك
يا قمره فى سما ليلى تواسينى
تنورلى دروب الخوف
بناديكى لتسقينى
وتروينى من شهود ريقك
فدلينى على طريقك
ونورى سكة العاشقين
ببريقك
