يابدارى يا بلدنا
أفتقدنا الامن فيكى
يا بدارى مش هخبى
مشتاقين ضمت ايديكى
يابدارى يا ضحيه
ليه ورا الموت مداريه
امتى نكتب شعر ليكى
امتى يسكت الرصاص
م البنادق
امتى نصحى نفوق ونخرج
م الخنادق
امتى نمشى ف ضى ليلك
فى امان
من زمان واحنا نحلم
بالسلام
من زمان بنقول يا غاليه
امتى نهزم جهل فيكى
امتى نترك السلاح
امتى نقدر نبتسم
والخوف ماليكى
يابدارى فين رجالك
فين ولادك
فين شيوخك
فينك انتى يابدارى
بين امم وعقول بهيه
يابدارى الخير ماليكى
ليه ولادك يقلعوه
من جدوره
كلمه حق ومداريه
بين صدوره
ليه بقينا يا بلدنا
بين شعوب الناس رزيه
ليه نشوه صوره حلوه
م الخضار والعماره
ليه بايدنا ندوس
على نبع الحضاره
ليه نشتت من قوانا ونفترق
كل واحد فينا رابط
على حدّ حاره
ليه مشاكل كل يوم
بتزيد هموم
وليه بنحجب شمس لينا
بالغيوم
وصوت رصاص
نطلق الرعب بايدينا
وليه نخاف
يا بدارى صرنا فيكى
كالخراف
كل يوم بنجز راس
ومعادشى لينا حتى ديه
ليه نشّيل طفل طيب السلاح
ليه نعلم البراءه الاجتياح
ليه سلاحك مرفوع علينا
وكل ايد ساحبه سلاح
نقتل البسمه ف عنينا
بدون سماح
فين ولادك يا بدارى
وفين ديانتك
فين عاداتك فين رموزك
فين مدينتك
ليه شيطان الانس فينا
بيرتوى من دم لينا
وليه حزينه
وانتى طالقه النار بتشوى
بين ضلوعنا
وانتى طالقه الموت دا فينا
يحش فينا
يا سجينه بين رصاصك
ليه حزينه
طالقه نارك فى خضارك
طالقه سمك ف العقول
يا بدارى مش هخبى لو اقول
ضاع ماضينا
وضاع وددادك ضاع ولادك
ضعنا فيكى وضعتى فينا
ومش غريبه انى بشوفك
يا مدينه اليوم حزينه
القصيده باللهجه الصعيدى
مستوحاه من واقع احداث البدارى
ادعو الله لكل اهلنا بمركز البدارى
ان يجعلهم الله فى امن وامان
وان يصلح احوالهم
وان يعود لهم الهدوء والسلام
مع تحياتى
محسن البدراوى
