حماية الثورة
بقلم إكرام مجاور
إحنا بهرنا الحضاره
والدنيا والأكوان
وقالو مصر الحضارة
وشعبها البستان
طلت لنا الدنيا
طلة شموخ النصر
ونظامنا ضحك وقال
شلة عيال تعبان
*****
دقت أمال الفرح
على كل باب فينا
الكل قلبه انشرح
والحزن جافينا
وقلنا راح العنيد
وقلوبنا اهي ارتاحت
أتاريه بيرمي البلد
في أدين اعادينا
*****
دق الخراب ع البلد
سابها وراح ماشي
وسابها للي مسك
وقال مانيش ماشي
دي فرصه مستنيها
والعمر ايه غير فرص
والقلب فيه من حديد
رحمه.. ما رحماشي
*****
بدأ يعيد الصفوف
وينشر القوه
وعاد ما قبل الثورة
دخل بنا لجوّه
نقوله فين المطالب
يقول مطالب ايه
وكأنه مش م الوطن
وكأنه مش هوّا
*****
طبق نظام الطوارئ
وقال بنحمي البلد
وساب قلوبنا الحوارق
من صبرها بتنجلد
فرق ما بينا الصفوف
ويقولّنا اتحدو
لحد ما اتفرقنا
والكره فينا خلد
*****
نجيب منين قوه
للثورة تحميها
مادام حماة البلد
أعداء لنا فيها
يا كل حابب مصر
مدو إديكو لبعض
دي مصر صرح كبير
بأدينا نبنيها
العاشرة وثلاث دقائق من مساء السبت 17/9/2011
