بحلم كل مصرى يكون علم

بحلم فى كل مصلحه اشوف علم
اشوف بنى ادم محترم
اشوف مصرى بصحيح
بحلم محدش يقصف قلم
بحلم محدش يحس بألم
بحلم كل مصرى يكون علم
بحلم بمسئول يكون همه مصلحه
مش مسئول يفكر لنفسه ف مصلحه
بحلم اشوف نفوس متصلحه
بحلم بكل الارض جوه مصر متفلحه
مزروعه خضره ومصحصحه
مش ارض ميته زى القلوب ومكسحه
ولا ارض مشققه ومجرحه
بحلم باللى يعاتب اخوه يكلمه
مش يموته بسياره متصفحه
بحلم بموظفه تراعى الله فى عملها
مش تمضى وتقول مروحه
بحلم اجيب لى مروحه
عشان اطرى لما تشتد الحراره
وتبدا الشمس فى الصحصحه
نفسى فى كرسى ويكون سليم
اتهز بيه واحس بمرجحه


بحلم بحبه مال
مش كتير
لكن يادوب يمشوا الحال
بحلم اجيب حته لحمه للعيال
واكسى العيال
بحلم اكون مستور
عشان اكيد العزال
بحلم باردب قمح
من سلات الغلال
بحلم بقرشين حلال
لكنه باين شىء محال
والحلم يا رب استحال
وربنا هو الكفيل بيه وبالعيال
قادر ربنا يسترنى ويغنينى عن السؤال
قادر يقوى عزمى لو يوم عزمى مال