فلسفة التحرك بعد الكارثة !!
خيم الحزن على مصر كلها بسسب انهيار جزىء من جبل المقطم....
اللى حصل خلى الشعب يتحد فى مواجهة الكارثة ..
إحناكدة.. بيقولك المصريين جدعان ورجالة وشجعان وقت الشدة..
بس الظاهر ان لازم نستنى الشدة عشان نتحرك ...
مع ان الكارثة توقعها الخبراء من 15 سنة بس كالعادة نستنى الواقعة وبعديين اما نتأكد ان فى ناس ماتت وبقيت كارثة
نبداء نهتم ..
كارثة ..ورا كارثة ..ورا كارثة ...
الشعب ادمن كوارث .. زى ما ادمن طوابير..
الاول كانت العبارة .. استننا لغاية ما غرقت عبارة ..عشان نهتم بتطبيق معايير الامان فى العبارات ..
استننا لغاية ما القطارات خرجت من مسارها او ولعت.. عشان نهتم بالسكة الحديد ..
استننا لغاية ما العماير المبنية من غير ترخيص نزلت على سكنها .. عشان نتحرك ونزيل العماير اللى قابلة للسقوط .. واللى مبنيه من غير اساسات ...
ده حتى فى الرياضة .. لازم نجيب صفر المونديال ..ونجيب مايقرب من الصفر فى الاولومبيات..
لدرجة اما تتوصف انجازات العرب بان هى اقل من انجازات مايكل فليبس ..
ده حتى فى الكورة .. عشق الشعب المصرى .. الحاجة الوحيدة اللى بتهون عليه عشته ..
لازم نتلب 4 من السودان لوز ..عشان الاعب المصرى يسترجل فى الملعب ..
ويبطل يدخل فى نفسه اجوان ..
فلسفة من فلسفات الحكومة المصرية فى الادارة...التحرك بعد الكارثة..فعلا يتكتب لهم الفضل فى ابتكرها ..
تب ايه الحل ؟؟
الحل عند الحكومة ان اى كارثة تحصل يقوموا يعملولها وزارة.. فلسفة بردوا فى الادارة
فى ناس تقولك ده ابتلاء من ربنا فى رمضان .. واختبار لقوة ايمانا..
وفى ناس تقولك ان ده غضب ونقمة من الله بما كسبت ايدينا ..
المهم فى الاخر ان احنا نتعظ من كل الكوارث اللى فاتت ..
نتخلى عن الثقافة اللى جايبانا ورا ..
وندعى ربنا انه يلطف بينا من اللى جاى ..
و ان كل واحد يتقى ربنا فى شغله ومنصبه ومسؤليته ...
يمكن مرة نلحق الكارثة قبل ماتقع ..
يارب الطف بينا ....
