25 يناير ذكرى شهداء الحريه

25 يناير
ذكرى شهداء الحريه
الاحرار والحراير
يافجر نورالامل
فى عيون الضراير
ياروح التمرد ع الفساد
والوضع اللى ساير
يا ثوره ردت الامل
فى قلب مصر
لبستها ثوب جديد
وفردت عليها الضفاير
يا لكمه فى وجه
كل فرعون وكل جاير
بدأتى باعتصام الامل
واشتعلت بيك المساير
يا ثوره للحياه
جات لنا على ايدك بشاير
يا ثوره على ايد كل مصرى
اللى جه راكب
واللى جه طاير
واللى قطع طول السكك
وبحب ساير
ثوره لكل مصرى
30 سنه كان دمه فاير
شهد العالم ثوره
وكان مبهور
وقال يامصرى ثورتك
دى شىء مغاير
نال فيها الشهاده
من ولاد مصر الاعزه
لجل كلنا منعيش اعزه
لجل نخلص
من اوضاع كات مستفزه
لجل نطلع من قلوبنا لمصرنا
كل المحبه والمعزه
عايزين نشوف الشمس
نقوم بقه ونرفع فى الستاير
احنا بشر محنش الات
يشغلونا بالزراير
كل واحد يتق الله ف مصرنا
وربنا هوه اللى اعلم بالسراير
فاتت سنه كات كلها فوضى وضياع
كات شمسنا طالعه
بس مش باين فيها الشعاع
قدامنا الامال
لكننا محسناش معاها باستمتاع
قدامنا جنه الله ف ارضه
لكن العد زياده فى الجياع
مصرنا مجروحه
زى اللى عنده كل شىء
بس محروم م المتاع
لازم نحدد حقنا
بالحكمه مش بالاندفاع
حقك هتاخدهلكن هتغلط
يبقى الحق ضاع
ويبقى تايه مركبك
جوه المحيط
من غير شراع
لازم نحدد بالاتحاد
مش بالصراع
لازم نحدد
لجل نخلص م الصداع
لجل ناكل خير بلدنا
ومن كل شىء
نبدا الانتفاع
لجل نبنى
وكمان نعمر
علشان نعوض من حياتنا
30 سنه العمر اللى ضاع

_________________
عطيه خضرى عطيه
قلين / كفر الشيخ