قلبى على ولدى انفطر وقلب ولدى عليا حجر
دمعة نزلت من عيونى وفين تداوى جرح قلبى
دمعة كاوية دمعتى نازلة بحرقة على الشباب
قلبى خلاص انفطر وانقهر وانجرح واتحرق
ولسة جايين تسألونى انتى مين ؟؟؟
انا الى اسمى انذكر فى كل حتة فى الشوارع وفى البلاد
انا الى فى المدارس درسونى
انا الى على اولادى بيحسدونى
ايوة انا كنت بلد ايوة بلد ينضرب بيها المثل
تتحسد على اهلها وشعبها
بس كنت ايوة كنت فعل ماضى من زمان
من سنة بالتمام وبالكمال ايوة سنة
فجأه اهلى قاموا ثاروا ايوة ثاروا
وقالو هاتو حقنا الى ياما راح علينا
وانبسطت واترفعت فى السما وافتخرت
قولت هما دول ولادى الى اخدوا حق بلادى
ولما نزلوا البلطجية قتلوا فيا ونجثونى
وبعيالى فرحونى بس عليهم حصرونى
بس قولت كله يهون هما راحو بس جاى غيرهم كتير
هما ضاحوا لاجل غيرهم يعرف يعيش
واستمرت المجازر والمواجع
والنهاردة لبسونى السواد
لما شوفت قدام عيونى دمهم وهو رايح وبيتهدر
ولما شوفتهم ولادى بيقتلوا بعضهم
ومهما انادى ولا حد دارى بأمهم
كلهم صدقوا وانقلبوا على بعضهم
وهدوا فيا وعجزونى وبأديهم وبدمائهم موتونى
وكتبوا الوصية والنهاردة اشهدوا شهادة وفاتى
انكتب فيها اول حرف بدم ولادى
ولو استمروا هيكملوا باقى الكلام وتكتمل شهادتى وفاتى
الحقونى يا ولادى قومونى وانقذونى من مماتى
يا ولادى لسة باقى عندى امل
الحقونى قبل ما تكتمل شهادة وفاتى
بقلمى
2/2/2012
