فبراير شهر البشاير
فبراير وقلنا عليه
دا شهر فقراير
ساعات تلاقي فيه
الحظ مش داير
تلقي الهموم حواليك
والقلب نفسه بشاير
وإن كان حبيبك طفش
يرجع إليك ساير
***
وقف التاريخ ف ميدان
رافع وطالب شرط
كفاية ظلم الناس
شربوا السجاير فرط
لموا القروش للفول
ولا داقوا يوم البط
لبسوا الهدوم هلاهيل
ربطوا الحزام ع الوِسط
***
حسني بعت سليمان
واقف يقول في بيان
وناسنا في الميدان
فتحوا قلوب وودان
أغمز لصاحبي وأقوله
يمكن يكون او كان
يقولي إسمع بقي
ربك كريم حنان
***
تخلي عنها وغار
يا ليل طالعله نهار
يا شمس راكبه مدار
ربك شديد جبار
لحكمه فيه أسرار
عقلك يتوه يحتار
الحكم عنده دول
واللي ظلم في النار
***
عادت معانا الذكري
"إرحل" يدوب كات فكرة
أيدها رب الكون
بدعاء قلوب ذاكرة
ونضم إيد ف الإيد
تروق مياهنا العكرة
تلبس بلدنا التوب
وتحني إيدها لبكرة
سامح لطف الله
