عايزين ريس

عايزين ريس يبقى كويس فيه صفتين صدق واخلاص
مش عايش منفوخ ع الفاضى بشوية حاشية وحراس
ويكون مصرى فخور بجدوده يوعد يوفى بكل وعوده
حــاطط ربنا قــدام عينه ومحافــظ عـلـى كــل فـروضه
سنه يكون فــى الأربعينات جد ومالهوش فــى النزوات
ومراته تبقى كفاية عليه مالهاش فى نوادى واجتماعات
تبقى معاه ومــراعياه هــوه مش مكوك من بــرة لجــوة
لـــو حست تقصيرة فـــى بـــلاده بتفوقه وتعاتبه بقـــوة
امــا بقى صفاتة الشخصيه مش محتاجة انــى اوضحها
علشان كـــل المصريين هـــا يحسوهـــا لــمــا اشرحـهـا
هيكون إبن بلد حقانـى مش شعارات وكــلام فــى أغـانى
ولا يوعد يوم ولا يوفيش ويقول شىء يعمل شىء تانى
ويكون متواضع وكــريــم أصله هــايحـكـم شعب عظيم
صاحى وواعى لحقوق شعبه مالهوش فى سياسة التنويم
ويكون راجــل عنده ضمير مــاعــرفش نفاق ولا تـزويـر
عايزة اما امشى فى أيها شارع مالقاش صوره بحجم كبير
دوغرى وفــى الحق ما بيخافش يقدر ع الصعب مايهربش
وان شاف ظلم وجور على شعبه ما يسكتش ويقول معرفش
حبه لمصر بيجرى فــى دمــه وشجاع ومــا فيش حــد يهمه
لــوجــالــه فقير او محتاجله يفتح قلبه ويشكى لــه همه
عــارف انــه مــراعــى بـــلادة وكـــل المصريين اولاده
عــارف ان احنا أمـانة فى إيده مش حاسس ان احنا عبيده
ريسنا هــا يبنى ويعمر كــل مــايكبر احنا بنكبر
مش يتحالف مع اعــداءنا ويخطط ضدنا ويـدبر
وولاده يكونوا مصريين واعيين بهمومنا وحسّين
مالهومش فى إعلام وصحافة ولا للأحزاب منتمين
ورجــالــه يكونوا نـزهـاء أمنا عارفين مشاكلنا وهمومنا
مش يبقوا بيقبضوا ملايين واحنا نــدوّرعلى قــوت يومنا
ده ســؤال ومحيرنـى سنين ده بقى جـــوابــه يــامصريين
عايــزيــن ريسنا يكون أزاى وهنفتكره ومش ناسيين