-عصفورصغيرحزين كان نفسه يبقى حر
ولـــمـــا حـاول يفر ضاعت حياته غدر
كان كـل يوم يسعى م الصبح على رزقه
ولما عـرف صاحبه كــــان مفترى وخنقه
مسكين وخانه الزمن ولاعــاد لأوطـــانـــه
ولا لأهله اللى حزنوا كتير عــلــى شــانــه
وزى ماخلصت فى لحظة حكاية العصفور
خلصت حكاية شاب مصرى بحروف من نور
كـان حــر وجـــدع وأصيل زى الهرم والنيل
ماقدرش يسكت يوم عــلــى الظلم والتضليل
ولا كـــــانش يعرف ساعتها المستخبى إيه
ازاى يشوف الظلم ولا يثورش عليه
ودفــع حياتــة تمن لإهــانــة ومـذله
والحــاكـــم الجبار واقف بيتسلى
كان نفسه يرجع لأمه والليل دخل مارجعش
قالولها ابنك شهيد قــالـت عــايش ما ماتش
ضحى علشان بلدة وحقة مش هايضيع
هابكى عليه من قلبى ومش هتكفى دموع
وربى قادر على فراقة يصبرنى
اصبح شهيد وانا راضيه باللى مقسوملى
وكفايه اصبح مكانه الجنة مع الصالحين
واللى قتل فرحتى هيروح من ربى فين
وعشانه قامت ثورة ع الظلم والطغيان
ومصر مش ناسياه هيعيش فى كل زمان
فاتت سنه ع الشهيد ودمه لسة حى
وبلدنا هتعيش حرة والفجر لسه جاى
