الســـــــلام عليــكم ورحمـة اللـه وبركااته
مش حارمكم من حاجة هخليك رئيس جمهوريه انت وهو
تعالى نتخيل ...يا عم انت حتدفع حاجة من جيبك؟ الحلم ده على حسابى ....غمض عيxxxxxxxxx شوية واحلم انك بقيت رئيس الجمهورية ...
متقولش ازاى .. مش مهم ... زورت الانتخابات ... او قلت للناس انتخبونى احسن ارمى نفسى من فوق البرج فصعبت عليهم قاموا انتخبوك ..
او يكون لك واحد صاحبك امريكاوى بتكلمه على الياهوو وقال لبوش انك ولد عترة ومجدع ورجولة وكفاءة وانك من بتوع العولمة والعوالم والنظام العالمى الجديد لنج ..
ومش من اللى بيصلوا الفجر جماعة...فوافق بوش انك تقعد على...الكرسى ..
المهم انك بقيت دلوقتى رئيس الجمهورية ....
مين قدك يا عم ... حتاكل طعمية مقلية بزيت فرنساوى وربنا هيتوب عليك من طعمية ابو هويدا المقلية بزيت العربيات....
وحتتعالج من انيميا الفول .. الفول الجديد بقه يا عم من غير سوس ..وابقى قابلنى لو لقيت اى مسمار فى العيش ... حتاكل عيش من ابو الرغيف بربع جنيه...سخن وطازة وطرى ..تخيل ..طرى مش ذى العيش اللى انت كنت بتاكله وانت بتشرب كباية ميه ورا كل لقمة علشان تنزل لا لا العيش ابو شلن ده اللى انت كنت بتجيبه من الفرن وعقبال متوصل بيه البيت يبقي بطاطس بدل العيش ...
وتعاقب عليه دوليا لأنه اصبح من اسلحة الدمار الشامل....لا انسى الكلام ده خالص
الاوضاع حتتغير خالص ياعم ... دا انت ربنا حيكرمك خالص والله العظيم .....
طب بص دى ... حتاكل لحمة.. . متبرقش اوى كدة ... مش عارف يعنى ايه لحمة؟
( همة حيقولولك ) وبعدين انته مش كنت بتسمع وانت قاعد على القهوة وحاطط رجل على رجل وصباعك طالع من الجزمة انهم حيستوردوا حاجة كدة من السودان واثيوبيا...آه فاكر ؟ اهى هى دى اللحمة....لا لا مش اللى انته كنت بتاكلها فى العيد بتاعت العيد دى اسمها كرشة...متفضحناش بقه الله يسترك ...
وحيبقى فيه كنكاكى ..متسألش .. دى فراخ يعنى حتودع عم لطفى الفرارجى اللى كان بيبيع لك رجلين الفراخ وانته كنت بتقول له عشان الكلب وكان ساعات يفوت لك حتتين قنصة على حتتين كبدة من بتوع الزباين اللى بيستحموا بصابون اجنبى ..
وحتشرب السيجارة كلها مرة واحدة .. يعنى مفيش تخميس ...وبعدين دى سجاير ستراكى سترايك من بتاعت الست مارى منيب.. جو تانى
بس لما يخدوك علشان تحلف اليمين ...
ياعم دا غير يمين الطلاق اللى انته مصدره فى كل حدوتة تحكيها ... اصحى معايا الله ينجيك ... لما تروح تحلف اليمين اوعى تروح بالبدلة بتاعت جوازك ..انته عارف... دى بقت مكيفة الهواء من كل ناحية ..العربى جوز ام بطة عنده بدلة اخوه باعتهالو من بلاد بره ابقى استلفها منه وإقضى مصلحتك وبعدين رجعهاله ... ماهى الجيران لبعضها امال ايه...
و وحياة رحمة امك يا شيخ متروح بالجزمة بتاعتك ... عشان خاطرى ابقى اشتريلك جوز جزمة من بيع المصنوعات دى رخيصة هناك .... لأن الحدوة اللى انته مركبها فى كعب الجزمة بتعمل صوت .... قلق برضه ..
وبعدين ممكن الجهاز يصفر عليك تبقى حكاية... فاهم ؟...
اول يوم بس وبعدين همه بعد كدة حيتصرفولك فى جوزين جزم مستوردين عشان تقابل بيهم اصحابك بتوع الدول التانية ....
جزمة حلوة وبدلة حلوة واكل حلو .... حاجة على كيفك .. وحتنام على سرير عليه مراتب .. المراتب دى بقه جواها قطن ... ايوة قطن ... والله العظيم قطن .. ايوه تمام زى القطن اللى انته جبته من الاجزخانة للوله حودة ابنك لما الواد شحته ابن ام بيسة لزقه بالطوبة فى نافوخه فتحهاله وجريت بيه على المستشفى قالولك هات لنا قطن وشاش وميكروكروم وصبغة يود وبلاستر وسرنجة وحقنة تيتانوس وكيس دم واقطع تذكرة بخمسة جنيه من شباك العلاج المجانى .... ايوه هو ده القطن .. فهمت ؟
حتحلم احلام نضيفة على السرير دا يا عم الحاج ... افرد طولك ... متخافش رجليك مش حتطلع برة الاوضة .... انته مش فى بيتكم دلوقتى ..افرد افرد ...غمض عيxxxxxxxxx كده .. غمض ... ايه؟ ... انته نمت ؟؟؟؟
اصحى يا عم ... اصحى ... الباب بيخبط ... الحق .. موظفين الكهربا على الباب ... الحق دول جايين يشيلوا العداد علشان بقالك 3 شهور مدفعتش الفاتورة
