ماعملتش الهوم وورك بتاعك يبقى حاتموت يعني حاتموت
حادثة الطفل اسلام اللي اكيد الكل سمع عنها وتابع تفاصيلها
وباختصار شديد طفل 11 سنة ماعملش الهوم وورك المدرس ركله مما ادي لتوقف القلب وتمزقات في الاوعية والموت
اولا عاوزة اول حاجة اتكلم عنها التعليم اللي نتحسد عليه في مصر الله اكبر خمسة وخميسة ده موش ناقص حسد http://v.netlogstatic.com/v3.00/782/.../confused2.gif
ولله الحمد كل اساليب التعليم في مصر عقيمة وستظل عقيمة والوضع محزن وفوق المحزن كمان
المدرسة والمدرسين معظمهم داخلين يفرغوا حالتهم النفسية على الطلاب المساكين وكله مباح حتى النباح ماهو مؤسسة معتقلية الترهيب والقسوة والعنف اساسها اللي داخل موش اخل يتعلم داخل يتدبح
نفسي اعرف ليه لحد دلوقتي مافيش قانون او عقوبة تمنع الضرب في المدارس فين شريعتنا والرسول عليه الصلاة والسلام قال علموهم الصلاة لسبع واضربوهم عليها لعشر ويقصد الضرب الخفيف موش المبرح وبعدين الهدف من الضرب الاصلاح والتقويم ولو جاب نتيجة يبقى حقق هدفه لكن ايه فايدة ان الطفل الضرب بيخليه يعاند اكتر وايه فايدة ان يتعمله عاهة ولا يتحرق ولا يتكسر الضرب للمصلحة والتقويم وعمره ماكان للسطه والاكراه
زي ماحصل للطفل المسكين بدل مايسلموه شهادة تخرجه من الدراسة سلموه شهادة تخرجه من الدنيا كلها
الولد ده ابني وابنك وابن كل اب وام في مصر
انا افتكر اول مادخلت مدرسة ولاقيت فيه ضرب ابدا ابيت ان اكون كالبهائم واخدت موقف عنيف وعليها ممكن الفصل كله يتضرب وانا لا والا فالويل كل الويل ولو كل واحد كان عمل كده كان حقنا رجع ليه كلوا بيسكت ويقبل بالذل مع انه اتولد حر ده ماحتى مايرضيش ربنا
دلوقتي الطالب كل قيمته في التعليم مجرد ياخد شهادة يعرف يشتغل بيها موش مهم المعرفة موش مهم الابتكار ولا مهم الفهم قيمة التعليم عندنا قيمة مقنعة وموش حقيقية العلم غاية وليس وسيلة وللاسف الوزارة دايما بتسلطنا وتدخله في مخنا ومن اول سنة كي جي ون حضانة واحنا بنسمع ذاكر عشان تاخد شهادة وتنجح ذاكر عشان اجيبلك حاجة حلوة
عمرنا ماسمعنا ذاكر عشان تفهم ولا ذاكر عشان تعرف
نقطة تانية وهيا تعيين المدرسين ايه العشوائية اللي بيعينوا بيها دي وهوا كل من عنده عقده نفسية ولا توتر عصبي وبيفقد اعصابه يرموا في وزارة التعليم
ده المفروض يخضعوا لامتحان قيادي ونفسي عشان يبقى قد مسؤلية التربية والتعليم كاد المعلم ان يكون رسولا
زماننا ده فين المعلم الرسول اللي بيبلغ رسالة سامية دلوقتي عندنا المدرس السفاح نسمع المدرس المادي السفاف المدرس رايق جدا ماشفناش في وقتنا ده المدرس اللي كاد ان يكون رسولا وانعدم احترام التلميذ لمعلمه
واستبدل بيت الشعر اللي بيقول قم للمعلم وفه التبجيلا كاد المعلم ان يكون رسولا ب
قم للمعلم وفه التلطيشا كاد المعلم ان يكون شاويشا
يعني الموضوع كان حايبقى اهدى شوية لو ان ياعيني المسكين الصغير اللي مات كان هزق المدرس ولا ضربه كنا حانقول يستاهل الحرق عيب عليه
لكن كله يخلي باله من هوم ووركه وياخد العبرة والا فالويل كل الويل
يارب صبر اهله والهمهم الصبر والسلوان واخلفهم خيرا وهون عليهم ولا اله الا الله
واسترها على كل المسلمين يارب
