ولا أم من بعدك يا مصر
يوم ييجى عيدها
هيقدمولها ايه ولادها
غير حبسة الدم ف وريدها
غير ذلة الاخوان لناسها
وجبهة الانقاذ عنادها
ايه اللى زادها
غير نقص زادها
الشهرده بيقولوا عيدها
والهديه من ولادها
كسر ايدها
والمسابقه مين يقيدها
ويستبيح حرمة عبيدها
مين اللى راح يقدر يبيدها
وفى النهايه يبقى سيدها
هل ياترى
جبهة الانقاذ تفوز
ولامرشد ليه نفوذ
ولامصرى بلطجى
ضاب له بوز
ولاصهيون اللئيم
والامريكان يمكن يجوز
ولامصرى مش لاقى الامان
ولاحتى ضل بيه يلوذ
ولا أم من بعدك يا مصر
ولو تكونى حتى عِشَّه
راح تفضلى فى عيون حبايبك
احلى من فيلاَّوقصر
استحملى يا ام الهرم
يا ام المصر المحترم
ع العناد
وظلم الولاد
راح ييجى نصر
معلش يا امه
بيشفوكى مبهدله
وساكته يامه
عشان ولادك
راضيه المرض متذلله
كان زمان
فى الوقت ده
تبقى سعيده
بالزهور متكلله
العيال بيضيعوكى
بصى يا امه
خليكى عارفه
جوه القلوب المنزله
قومى انهضى علشان ولادك
وكسَّريها السلسله
دا انتى الصبيَّه
وانتى العفيَّه
وانتى الابيَّه
اصل وحسب متأصِّله
قومى كسَّريها المقصله
مكفايه يا امه البهدله
وكفايه فوضى وهرجله
جمَّعى كل الولاد
جمَّعيهم
واحضنيهم
فهِّميهم
همَّ بيكى
وانتى بيهم
ممكننحل المسأله
مش مُعضِله
والله ِيا مه
دى مهزله
قومى يامه
اتزينى
واتعطَّرى
دانتى اللى مِسكك عنبرى
وانتى اللى صانعه
المبخره والمكحله
بس انا عاتب عليكى
انتى السبب
الولاد ولاحد فيهم
كان يصلى
اللى صلح انصلح
واللى فجر
واللى هجر
واللى صبح تافه تمللى
وف بعدهمعن ربنا
نشفت قلوبهم
ولاعدش خُبز
لمرارة الايام يِحّلِّى
اصغر ما فيهم مُفترى
عمَّال يِكسَّر
مش يِعَلَّى
معلش يا امه
اللسان خاننى ف كلامى
انا جاى اقولك
مليون سنه
وانت دايما طيبه
وانا جاى ابعت لك سلامى
انا جاى ابوس ترابك
يمكن اقدم احترامى
بالله عليكى اتبسمى
اشربى من عذب نيلك
وشمِّى ريحة
الهرم واتنسِّمى
دانتى ف عيونك
مرسمى
وانتى دوايه وبلسمى
قومى احلمى
اتكلمى
نبهى قلب العيال
اصله عِمِّى
الغُمَّه يا امه
راح تزول
واللى يطغى
مسيره يبدأ ف النزول
ومسيسرها
سطرة المرشد تزول
واللى عامل نجمه عالى
هيجيله يوم
ويبدأ ف الافول
وكل ظالم ليه نهايه
مالاخوان
من جبهة الانقاذ
اوحتى م الفلول
