بالمزاد العلنى .. بحرقة القلب ودمع العين .. يااارب قرب يومنا قبل ما نكره بلدنا

نبدأ المزاد .. ..
وبإشراف من إدارة الهجرة وتطفيش المواطني بوزارة القوي العاطلة ..

المواد المطروحة للبيع
جنسية مصرية بحالة جيدة ،، إستهلاك 22 سنة من العيار الخفيف ..
ملحق بيها بطاقة للرقم القومي إنتاج 1952 .. وإسم مدرج على قوائم التموين من سنة 2008 ..
صاحب الجنسية على كامل استعداده للتنازل عن فترة تجنيده (إن وجدت) لمن يرغب فى الحياة العسكرية الهادئة ..
أسباب قرار (المواطن) صاحب الجنسية :
لظروف سفره بالخارج .. وانتقاله من بنها الي كفر الدوار ..

خبر جديد ممكن تقروه فى الجرايد ودي حاجة مش غريبة ومش هنستغربلها فى وضعنا الحالي
وبالمناسبة ..
(المواطن) صاحب الجنسية : اللي ناوي يتنازل عنها كلكوا تعرفوه .. أو يمكن اللي بيقروا الموضوع دلوقتي بيعرفوه ؟ او هيعرفوه ؟ او كانوا يتمنوا انهم يعرفوه ؟ او ماصدقوا انهم مش هيعرفوه ..
لكن الاكيد ان فيه فى القضية معرفة
والمعرفة هي اّخر حاجة كلمة مدرجة فى قواميس دولته

--------

-----------------------------------------

المواطن صاحب الجنسية : متنازل وبكامل ادارته و حريته و هو فى كامل قواه العقلية عن جنسيته المصرية لصاحب الثمن الاعلي
والبيع و الشراء مش هيكون بالفلوس ..
صاحب الجنسية هيتنازل مقابل حقوق المواطنة و الحياة الكريمة ..
وهيتنازل عنها وبالمجان لتعيس الحظ اللي هيشتري لان البيعة خسرانه و اللي هيشتري هيخسر دم قلبه فيها
والبايع كسبان ..

المواطن صاحب الجنسية : ماقررش انه يتنازل لانه ليه ابن عام اتقتل فى ليبيا .. ولا بنت خالة اشتغلت خدامة فى بيوت السعوديين .. ولا عسكري من زمايله فى الجيش اتقتل على الحدود مع بتوع حماس و غزة و رفح و طفح .. ولا خاله اتقتل على ايد الامريكان فى قناة السويس اللي جري فيها دم جدوده فى حفرها قبل مايجري فيها مية البحرين الاحمر و الابيض ..

المواطن صاحب الجنسية : ماقررش انه يتنازل لان واحد من اخواته اتحبس ظلم ، ولا اتاخد فى قضية أمن دولة بالعافية .. ولا ظابط عذبه .. ولا أمين شرطه هزقه وشتمه بأهله .. ولا عسكري مرور خده مخالفات علشان ماطلعلوش سيجارة او 10 جنيه ..

المواطن صاحب الجنسية : ماقررش انه يتنازل لانه حس ان فيه من المسئولين عن حماية دينه اللي بيتلاعبوا بيه و بيفصلوه جلابية على قدهم .. وعلى قد اللي معيننينهم ..
ماقررش انه يتنازل لان حس ان اللي المفروض يحموا دينه و معتقداته والمفروض انهم السلطة الاعلي دينيا فى بلده بيغيروا أرائهم و بيحللوا الحرام وبيحللوا الحلال و بيحللوا الربا و يحرموا الرزق الكريم

المواطن صاحب الجنسية : ماقررش انه يتنازل لان حس انه كمواطن مهان ورخيص وسلعة رخيصة فى بلده وبره بلده .. الكل مضطهده وكارهه .. أكيد مش لعقدة نفسية جواه بتحسسه ان الكل كارهه .. انما لان فعلا الكل كارهه ..

المواطن صاحب الجنسية : ماقررش انه يتنازل علشان حس ان فيه فى بلده اللي بياكلوا الباتون ساليه والسيمون فيميه على الافطار وفيه فى بلده اللي مايعرفوش يعني ايه وجبة الافطار من اساسه

المواطن صاحب الجنسية : ماقررش انه يتنازل لان فيه من أهل بلده اللي بيهربوا الدقيق اللي بياكلوا الغلابة و بيخفوه .. ولا قرر انه يتنازل علشان نفس العيش اللي بيتعمل من نفس الدقيق ده مليان مسامير و خشب و حديد من اللي محتكره المواطن أحمد عز ..

المواطن صاحب الجنسية : ماقررش انه يتنازل علشان البلطجة انتشرت فى بلده و مابقاش اّمن لا علي ولاده ولا على نفسه ولا على أي شيء ..
والحاجة الوحيدة الي اصبح مؤمن بوجودها فى أمان هي جنسيته ..

المواطن صاحب الجنسية : ماقررش انه يتنازل لان فيه بطالة بتقتل اخواته من الشباب و فيه عنوسة بتنسف احلام اخواته من البنات .. وفيه مخدرات بتنتشر فى بلده و زنا بقت لغته الرسمية الحرية ..

المواطن صاحب الجنسية : ماقررش انه يتنازل علشان فيه فى بلده اللي بيجعل التهرب من الخدمة العسكرية شرف و التهرب من الضرائب كرامة و التهرب من الزكاة فهلوة و التهرب من الصلاة مشغوليات و التهرب من الدين حرية و ليبرالية ..

المواطن صاحب الجنسية : ماقررش انه يتنازل علشان في بلده اللي بياخد حقوق غيرهم لمجرد ان فيه ليهم وسايط و محسوبيات ..

المواطن صاحب الجنسية : ماقررش انه يتنازل علشان أي حاجة من اللي فوق دي موجودة فى مجتمعه ..
لا علشان هيخسر دينه
ولا دنيته
ولا ولاده
ولا اهله
ولا جيرانه
ولا تعليمه
و تعليم ولاده
ومستقبله
ومستقبل ولاده
وأمنه وأمانه و أمان ولاده
ورزقه ولقمة عيشه

كل مشكلته انه مواطن .. جاحد بالجنسية ..
ومن شدة النعيم اللي هو فيه قرر انه يتنازل عنه ومجانا
واللي مايشتري يتفرج
وهنفتح المزاد الجنسية بكل مميزاتها بالعيش فى المجتمع المثالي ده .. وبالمجان