مصر مفيهاش راس تترفه جتنا نيله..
المدعوق اللى اسمه فرانك ايناشتين ده طلع مبيفهمش حاجه خالص ...
تخيلوا المفترى قال " لكل فعل رد فعل "
وللاسف لاننا ناس طيبيين وغلابه بنصدق
اه متستغربوش .... الراجل ده كداب ومنافق ومدعى ... عايزين دليل !!! انا اقولكم !!
نحن المصريين اتثبتنا بالدليل القاطع والبرهان الساطع ان مش شرط ان يكون لكل فعل رد فعل ...
يعنى مثلا احنا عمالين نشتكى إن الحياه بقت نار والبلد حالها واقف وشلة الانس يعيثون خرابا فى مصر طولا وعرضا وكيلو العدس بقى ب 14 جنيه والاخوان بيتحاكموا محاكمه عسكريه وايمن نور لسه مسجون ووزراء الاعلام العرب قرروا خنق الاعلام العربى وغيروا وغيروا
تخيلوا بعد كل ده وفى ظل الازمات الحاده اللى بنعيشها مشفتش مثلا ان المصرين قرروا انهم يستغنوا عن الكماليات المستفذه او ان مبيعات السجاير والمحول قلو او اى حاجه من اللى بيعملوها الشعوب اللى بتمر بأزمات عملوها .
انا مش شايف اى تغيير غير ان كلام الامتعاض والشكوى بقى اكتر فقط ... لسه ذى ما احنا الحياه ذى الفل والاتصالات بميلودى تريكس بتزيد علشان يكسبوا فلوس كتيره مله ولسه الشباب بيشتروا الكليوباترا ويحطوها فى علبة مارلبوروا لزوم الفشخره ولسه برده مقتنعين ان ...???.. هو الامان لمصر وإن احسن من غيره واللى جاى الله اعلم هيكون عامل اذاى .
جتنا نيله والله فعلا جتنا نيله شعب لا نحترم فقرنا ومصرين نمثل دور المواطن مهيطل المتخلف
لسه بنتخانق وزعلانيين ومتغاظين ان اذاى عصام الحضرى ساب الاهلى ومشى ..وبتستنكروا اللى عمله متسائلين فين الاخلاق وفين القيم !!.
حتى فتحى سرور ندد بهروب الاهلى من مصر اه يا كسفتى يانى
قيم ايه يا شعب ... قيم ايه واحنا اساسا لا نحترم واقعنا تفتكروا هنحترم اى شئ تانى .
قيم ايه وانتوا بتتابعوا بشغف ستار اكاديمى ويتنفعلوا وتبعتوا مسجات علشان خاطر عيون شاهيناز اللى لازم نقف وراها بكل قوه علشان ترفع راس مصر
مصر ملهاش راس يا محترمين .
دا من جملة الهطل والتخلف والبلاده اننا تفهمنا ان حسام غالى ساب منتخب مصر ومشى لكن اذاى عصام يسيب الاهلى ويمشى .
من جملة الهطل كمان ان واحد هينفض للموضوع وكل اللى هيشد انتباهه ان موضوع الحضرى غير حسام غالى تماما .
لسه ذى ما احنا بندخل افلام السنما وعادى جدا فى اسبوعين فيلم يحقق 10 مليون جنيه من جيوب المتفرجيين اللى المفروض هما من الشعب اللى بيعانى
حد يقولى؛ يمكن اكون غلطان فيه حاجه اتغيرت ؛ لسه احنا اهتماتنا وهبلنا وهيافتنا متغيرتش لسه ذى ما احنا شعب فاقد الوعى رغم ان اللى بنمر بيه ببساطه يهد جبال لكن لاننا شعب فقدنا الاحساس بالمسؤليه وجتتنا " نحست " بقينا لا نعى ولا نفقه شئ من حولينا
اّه يا بلد ... بلد " السبوبه " اه والله فعلا بلد السبوبه سبوبة الكوره مثلا خد عندك خمس قنوات مفتوحه تعيد وتزيد وناس جايه تاخد الافات علشان تحلل ماتشات اسمها ماتشات الدورى العام وكاست ومصوريين وخرجيين وجمهور بيتفرج بشغف .
حاجه تكسف والله ..
روحوا دوروا فى الكتب واقروا شوفوا دول ذى اليايان والمانيا الشعوب عملت ايه لما حست ان بلدهم بتعانى من ازمات .
انتوا بس اقروا قد ايه احنا لينا تاريخ عظيم وقارنوا ؛ هتكتشفوا قد ايه الحال بقى غير الحال
عايشين فى اوهام ونجرى ورا كل شئ خايب متخيليين ان ده بيرفع راس مصر لكن مصر ملهاش رأس يا رجاله علشان تترفع
فوقوا بقه واحترموا فقركوا وتعايشوا مع بلدكم ؛ بطلوا تشكوا ولو مره فى حياتكم اعملوا خطوه صح بقه .
ومتسألنيش اذاى ؟
انا متأكد انك تعرف اذاى !!
ولو اصرينا نفضل كده يبقى للاسف مقدميش غير اقول : تستاهلوا اللى انتوا فيه
