واللى يقطع عيش خِواته يبقى ندل

بقه مبسوطين
احرقوها وولَّعو
حطموها وقطَّعو
استعبطوها اتدلَّعو
لو يوم هتزرع قلَّعو
ولاعُمركم راح تشبعوا
لكن بحب اقولكم
انتوا عايشين فى الخيال
واللحظه دى جات بافتعال
راح تندموا ع الانفعال
والحاله دايماعُمرها
ماهتبقى عال
ولَّعُوا معاها العِيال
ولَّعوا فى الامهات
وف كل عم وكل خال
ولعوا وفى كل اب
م الالم وضعه استحال
اصل الحياة صبحت مُحال
ولاعادش راح ينفع مجال
ولاعُمركم هتشوفوا راحه
ولاف ضمير ولا حتى بال
بس اوعوا تانى تولولوا
وتصوتوا وتهللو
وترجعوا وتضربوا
على راسكوا
بالطين والنِّعال
والتاريخ هيقول عيال
هيقول عليها
ثورة الاندال
ماهو اللى يحرق
قلب أُمه يبقى ندل
واللى يقطع عيش خِواته
يبقى ندل
واللى يخرب يوم
فى بلده يبقى ندل
واللى ميرضاش بعدل
يبقى ندل
واللى معدوم الرجوله
والبلطجه عنده بطوله
ولاعنده ذره من كرامه
ولاحتى فضل
يبقى ندل
والف ندل
خلاص ما صبحت ع الحديده
كل الصحاب والخوات
والمعارف
سابوكوا تاكلوا ف لحمها
وصبحت وحيده
ولا عُمرها هتعود جديده
مهما عليها تدمَّعوا
بقه مبسوطين
احرقوها وولَّعو
حطموها وقطَّعو
استعبطوها اتدلَّعو
لو يوم هتزرع قلَّعو
ولاعُمركم راح تشبعوا
============
عطيه الخضرى
=====
قلين /كفر الشيخ