حوار بين مصرى مغترب وشرطى سعودى

فى السعوديه
يقول مصرى وأنا راجع
ومن عملى لحد البيت
صادفنى نقطه للتفتيش
ويسألنى وأنا رديت
فين الاقامه والهويه
وبص بشوق على الجنسيه
ويتنهد ويسألنى
ويبدأنى بكيفها مصر
أقوله بخير
ويسألنى ومن أمته هنا عايش
ورديته فوق العشرين
ويسألنى
ما زرتش مصر ولا مره
ومستحلى القُعاد برَّه
أنا رديت
لا والله
اخر مره وكات من عام
وراح ضاحك ومتبسم
ويسألنى من الاكتر
وبتحبه ومن قلبك
سعوديه
بالله عليك أومصر
ورديته بدون احراج
الفرق عندى ما بينهم
مابين الام والزوجه
الزوجه انته اللى تختارها
لكن امك تكون اصلك
ومن غيرها ولا هتكون
ف يوم موجود
ولو ابعد فى يوم عنها
انا منها
انا اصلى ف تكوينها
ورد وتانى يسألنى
وضيق العيش
مخلاكشى
تكون كاره
ورديته أنا أكره
ومين ميحبش الدنيا
دا مصر لى هى الدنيا
ومين يكره ف يوم قلبه
ومين يكره ف يوم روحه
أنا ف الغربه والله
لكن بحسبها بالثانيه
أنا عاشق سعوديه
لكن حبى لامى مصر
دا نوع تانى وحاجه تانيه
رد كمان بيسالنى
متوصفها
عشان انته اللى عارفها
عارف نيلها وصفصافها
عارف ناسها واطيافها
وقلت امى ما هيش شقرا
لكن برتاح بنظرة عينى لعنيها
بموت فيها
تشوف ترتاح
تحس دنيتك بيها
ولا عنيها كانت زرقه
لكن قلبى بيطمن
واحس براحه
انا فيها
تبص لها
تقول تشعر
ومهما تقول فى اوراقك
ولا شعرك
وفوق شعرك
دواوين اللى قالوا الشعر
ومهما يوصفوا فيها
ولاتقدرمحيطاتها
بحار الدنيا
اوصافها تكفِّها
ملابسها يادوب ع القد
لكن الوجه ربانى
بحمرة خد
وخُصلاتها سنابل قمح
وخير ربك
مابين خُصلاتها
ما يتعد
ولو تضحك ورب الكون
يبان الماس
ف اسنانها
وتلقى شموس
فى لمعانها
ياما سرقوا معادنها
وياما كتفوا ايدينها
كان الفرعون
وكان حسنى ومن بعده
كانوا والله سارقينها
لكن فاضله
وراح تفضل
ولاحدش ف يوم يقدر
يهين دينها
عشان احنا اللى عارفينها
عشان احنا اللى حاسينها
ولحم كتافنا من طينها
ويوم ما تنادى
يا اولادى
هنتحول كرات نار
عشان نحرق عدوينها
ويوم ما تمشى مراكبها
ويعدل اللى ماسكينها
هيتصلح مساكينها
وتتفتح دكاكينها
ونتحول كرات دم
عشان تجرى ف شراينها
ونتحول سماد للخير
وهنعمر صحاريها وبساتينها
ويعجب ويتسائل
ورد بحب يتفائل
انا مبسوط عشان مصرك
وبدعى ربنا يعينها
أنا اعرفها م الاعلام
ورديته ولك شكرى
ولوتفتح ف يوم قلبى
هتلقى مصر
خريطتها ف احشائى
ونيلها يجرى ف دمائى
ورد يقول
ياريت يفضل
كتير وافيين
وكمان انته
تكون وافى لسعوديه
كما توفى لبلدك مصر
وانا بثقتى برد عليه
أنا متربى من امى ومتعلم
اصول الحب
ومتعلم اكون وافى
واكون مخلص
ولو تسمع عن الناس اللى حارقينها
وعن ظلم اللى حاكمينها
ولومرة تشوف مصرى
ماهوش مخلص ماهوش منها
يسلمنى لاوراقى
ويحضُنِّى
ويدعى ربنا يحميلنا مصر ويعينها
دا مصر اخت السعوديه ونور عينها