الفقر معناه إيه بالنسبة لك؟ كلم عنه صُناع القرار
مسابقة في التعبير عن فقر الأطفال .."كيف تراه؟"
إيه اللي بيخطر علي بالك لما بتفكر في فقر الأطفال؟
تفتكر الفقير بس هو اللي ما عندوش فلوس كتير؟
و الا الفقر في رأيك هو إن الواحد ما يروحش المدرسة؟
و الا إن العيلة كلها تعيش في بيت صغيرمفيهوش غير أودة واحدة؟
و الا إن الواحد يتعود إنه ينام كل ليلة من الجوع؟
و الا إنه يكون عيان وما يلاقيش فلوس يجيب بيها الدوا؟
إنت شايف الفقر إزاي؟
يهمنا نسمع ونشوف وجهة نظرك في فقر الأطفال... كيف تراه؟
جميل... لكن الكلام ده معناه إيه؟
الحكومة المصرية بالتعاون مع منظمة اليونيسف عاملين مسابقة للأطفال والشباب عشان يعبروا عن رأيهم في الفقر. المسابقة دي جزء من مؤتمر "فقر الأطفال والتفاوت في مستوي معيشتهم؛ السياسات العامة لتحقيق العدالة الاجتماعية" الذي هيتعمل في يناير 2009.
إذا فُزت، هتتعرض أعمالك علي مجموعة كبيرة من صُناع القرار، والسياسيين، والأكاديميين، والطلبة، ورجال الإعلام اللي مشاركين في المؤتمر. وطبعاً دي مش الجايزة الوحيدة.
رائع... إزاي أقدر أشترك؟
إذا كان سنك ما بين 10 و18 سنة تقدر تشترك، كمان ممكن تشترك لوحدك أو تعمل فريق عمل إنت وأصاحبك وتشتركوا كلكم.
طيب ... وإيه المطلوب؟
أختار قسم أو أكتر من التلت أقسام دول عشان تعبر بيه عن رأيك في فقر الأطفال:
1. قصة حقيقية أو مقالة مكتوبة باللغة العربية ما تزيدش عن 2500 كلمة.
2. قصة مصورة صور ثابتة أو مرسومة ما تزيدش عن 20 كادر.
3. فيلم فيديو قصير ما يزيدش عن دقيقة واحدة.
طبعاً ممكن تشترك في التلت أقسام.
لكن... إزاي أقدر أكسب؟
تقدر تكسب إذا حاولت علي قد ما تقدر إن العمل اللي إنت هتقدمه يكون فيه إبداع وكمان يكون فيه نقد وتحليل لوضع الأطفال دول لأننا بندور علي عمل إبداعي نشوفه أو نقراه وفي نفس الوقت يقول لنا قصة واقعية ليها تأثير. وهيستمتع بعملك الإبداعي ده مجموعة من الأطفال والشباب في نفس سنك عشان يقرروا مين الفائز.
1. بالنسبة للقصة أو المقالة إحنا بندور علي عمل إبداعي من الواقع يعني حقيقي مش خيالي،ويكون بيحلل الموضوع مش بس مجموعة آراء مش مترابطة عن الموضوع. ممكن تكتب عن تجربتك الشخصية مع الفقر، أو تدور عن معاناة أطفال تانيين مع الفقر. المهم أنك توضح لنا أنك فكرت في الموضوع كويس وانك مش بس بتسجل مجموعة من الآراء عن الموضوع. إذا كتبت قصة طفل تاني لازم تراعي أن القصة تكون واقعية ومش هنقبل القصص الخيالية.
2. بالنسبة للقصة المصورة أو المرسومة بندور علي قصة تصور خبرات الأطفال مع الفقر. مجموعة الصور لازم في النهاية أن تكون بتحكي قصة كل كادر فيها بيصور حدث من أحداث القصة دي. الصور والرسوم ممكن تكون بالأبيض والأسود أو بالألوان. ممكن كمان تكون ديجيتال أو علي ورق.
3. بالنسبة لفيلم الفيديو القصير بردوا بندور علي فيلم عن حياة الأطفال مع الفقر.كل اللي يهمنا هو أن تكون العروض دي مستواها الفني جيد، وكمان فيها نقد وتحليل لأوضاع الأطفال الفقراء، سواء كانت حية أو رسوم متحركة، بصوت أو صامتة.
قولي بصراحة... إيه هي الجايزة؟
الموضوعات اللي هتفوز، زي ما قلنا قبل كده، هتتعرض في المؤتمر وعلي صفحة كلام في المفيد الإلكترونية. كمان اللي هيفوز هياخد شهادة تقدير من المجلس القومي للطفولة والأمومة، ومركز المعلومات ودعم اتخاذ القرار، واليونيسف.
ممتاز... التقديم إمتي وفين؟
آخر ميعاد لتقديم الموضوعات هو 16 نوفمبر 2008. إبعت موضوعك علي البريد الإلكتروني:
[email protected]
أو علي العنوان ده: 87 طريق مصر حلوان الزراعي، المعادي، القاهرة.
استني... بلغ أصحابك بالمسابقة دي.
