ملف شامل عن الاستعداد لرمضان إيمانيا ودعويا ومنزليا

كل سنة وانتو طيبين خلاص شهر شعبان خلص
يعني العد التنازلي على رمضان بدأ خلاص
فانا فكرت اني اعمل موضوع شامل عن الاستعداد لرمضان
لأن انتو عارفين إن رمضان شهر مش زي أي شهر
ربنا وضع فيه من المنح والأجور مالم يضعه في شهر آخر
يبقى احنا كمان لازم يكون استقبالنا له مختلف...
والرسول صلى الله عليه وسلم (ماتصلوا عليه منك ليها هههههههههه) قال: " رغم انف امريء ادرك رمضان ولم يغفر له"
انا مش هاطول عليكم كتير
انا عملت الموضوع دة عشان انا عاوزة استعد لرمضان من نواحي كتير فقلت أجمعها مع بعض عشان نستعد سوا ونشجع بعض
بداية كدة الاستعداد لرمضان بيكون في 3نواحي:
1.استعداد ايماني
2.استعداد دعوي
3.استعداد منزلي.


هانمسك بند بند ونقول هانعمل فيه ايه باختصار
وهاخلي الاستعداد المنزلي آخر حاجة عشان انا عارفة انه اكتر حاجة بتشغل بالنا وكمان وقتنا
وان شاء الله لما نطبق سوا الموضوع دة هاتحس\ي بجد برمضان مختلف زي مانا حسيته قبل كدة

نبدأ على طووووول على بركة الله مستعينين بالله وحده

ونقول بسم الله

أولا :الاستعداد الإيماني:
ودة أهم حاجة عشان مايبدأش رمضان وآجي أدور على قلبي ملقيهوش..وتلاقي الواحد\ة مننا عاملة جدول راااااااااائع من العبادات ولكن...فين قلبه\ا؟؟!

عشان كدة لالازم ننضف قلبنا ف الاول...طيب ازاااااااي؟؟




هما حاجتين هاتركز\ي عليهم وشوف\ي النتيجة

أولهم :الاستغفار
طب نعمل ايه يعني؟
اولا هاتلزمي الاستغفار..احنا أهوبيخلص شهر شعبان ..يعني معاناش تقريبا الا كام يوم
كل يوم هانستغفر على الاقل 1000مرة (ألف مرة)
واوعا\ي تقول\ي كتير ...انتي لو بعد كل صلاه هاتستغفر\ي 200مرة ودول مش بياخدوا 3دقايق على بعض هاتجيبي ال ألف مرة ف اليوم كله
وياريت تكون\ي مركز\ة وانتي بتستغفر\ي على ذنوبك...بس افتكرها\افتكريها..وشوف\ي احساسك بالاستغفار هايكون ازاي
تاني حاجة التوبة

واحد\ة بي\تقول واتوب من ايه يعني انا مش بعمل حاجة عشان اتوب منها ...ياااااااااا
لو تعرفوا احنا قد ايه مخطئين في حق الله وفي حق انفسنا والله نبكي ليل نهار على حالنا
يكفينا والله اننا نتوب من الغفلة وتضييع الوقت..ومن الغيبة كل يوم ف الموبايل مع صحبتك\صاحبك ولا قريبتك\قريبك ومن تضييع الوقت طول اليوم ع النت
محتاجين نتوب من تقصيرنا مع ولادنا وبيتنا وأهلنا محتاجين نتوب من تأخير الصلاة ...........انت\ي بس فكر\ي كويس هتلاقينا بنعمل بلاوي ومش داريانين.
فاضل كمان حاجة صغنونة هاتزودها مع الاستغفار والتوبة في شهر شعبان وهي جدول صغير هانمشي عليه سوا من باب تحفيز الهمة كأنه تسخين كدة استعدادا لرمضان
وبكدة يبقى نضفنا قلبنا بالتوبة والاستغفار ودربنا جوارحنا على الطاعة
وآآآآآآآآآدي الجدول:

1.سبحان الله وبحمده 100مرة
2.استغفار 1000مرة
3.لا اله الا الله وحده لاشريك له له الملك وله الحمد وهو على كل شيء قدير100مرة
4.الصلاة على النبي 100مرة
5.أذكار الصباح والمساء
6.صلاة الضحى (ركعتين على الاقل)
7.القيام ولو بركعتين قبل النوم مع الدعاء
8.ورد القرآن بحد أدنى حزب (نص جزء)وبحد أقصى 10اجزاء يوميا
9.قراءة سورة الملك
10.السنن النوافل وعددهم اجمالا 12ركعة
11.ربع ساعة خلوة مع الله (تبتل) ودة اكيد لما عيالك وجوزك\مراتك يناموا
12.التحلي بالاخلاق الحميدة في كل تعاملاتك

وكدة يبقى خلصنا الاستعداد الايماني وفاضلنا الاستعداد الدعوي و المنزلي

ثانيا : الاستعداد الدعوي:
يعني ايه اصلا استعداد دعوي؟؟!
يعني عشان همتك تعلى ف رمضان لالالالالازم تأمن\ي على عبادتك يعني تصحصح\ي اللي حواليك\ي للعبادة عشان همتك ماتفترش
بلاش تبخل\ي بمعلومة عرفتها وبلغها لغيرك ..عشان زي ماهاتستعد\ي لرمضان غيرك كمان يستعد زيك وانت\ي تاخد\ي حسنات مضاعفة
ازاااااااااي؟؟
1.. ذك\ري الناس بالابتعاد عن التليفزيون والمسلسلات لأنه خرااااااااب للوقت كمان المسلسلات السنة دي مركزة جدا على تشويه الاسلام والملتزمين بشكل بشع...واوعي واحدة تقولك انا بتفرج تسالي بس لالالالا قوليلها كل اللي بتشوفه عقلك بيتأثر بيه وبيخزنه ومع الوقت بيقتنع بيه وبيأثر سلبا عليكي
2. انشري أي مادة بتتكلم عن الاستعداد لرمضان ..درس لشيخ او فيديو ع النت ...مطوية صغيرة توزعها ف الترام ولا المترو ولا مكان شغلك ولا بين جيرانك ...ذكر\ي الناس على الفيس (ممكن تنسخ\ي من الموضوع دة وانشرها على الفيس بتاعك



فاضل التقيل بقى هههههههههههه الاستعداد المنزلي

ثالثا : الاستعداد المنزلي واظن ده للستات بس الرجالة تتكلف الفلوس بس
نيجي بقى للاستعداد المنزلي ودة مهم جدااااااااا وانا هاقسمه ل4جوانب صغيرة بس مهمة جدا جدا :
1.تجهيز الفريزر 2.تنفيض البيت 3.تزيين البيت بزينة رمضان 4.شراء مستلزمات مهمة.


1.تجهيز الفريزر: انا عن نفسي دة من أهم استعداداتي لرمضان عشان أقلل النزول ف الصيام وأوفر وقتي
طيب هانجهزه بإيه؟
*البصل :هاتي كمية وافرميها ف الكبة وشوحيها زي بتاعة الطبيخ وقسميها على كياس على قد الاكلات( اعملي كتير وهاتنفعك قبل وبعد رمضان كمان)


*الملوخية: هاتي ملوخية وقطفيها واغسليها وسيبيها تنشف وشيليها ف كياس وع الفريزر عدل كدة وهي ورق...اه والله الطريقة دي ممتازة جدا ربنا يبارك ف اللي علمتهالي وساعة الاستخدام تكون الشوربة ع النار بتغلي ..طلعي كيس الملوخية وبسررررعة ع الكبة قبل مالورق بتاعها يفك ولفي الكبة هاتتكسر حتت صغيرة خالص قومي ساقطاها ف الشوربة وكلي أحلى ملوخية وادعيلي وادعي لصاحبة الفكرة اكتر


*الطماطم انا عن نفسي هاستنى لما ترخص شوية وأخزن والا ...هاشتري صلصة لحد ماربنا يكرم والطماطم سعرها يتعدل


*انواع خضار مختلفة :زي الفاصوليا والبامية ..شوفي انتي بتحبي ايه وخزنيه


*لحمة مفرومة ودي هاتحتاجيها ف حاجات ياما ...وممكن تشيليها متبلة بالبصل أو متعصجة جاهزة


*صدور بانيه متبلة وع القلي أو متقطعة للشاورمة.


*بطاطس وقطعيها صوابع واسلقيها دقايق (يادوب غلوة ) وشيليها ف كياس وتطلع ع القلي برضه تبقى زي فارم فريتس


*ورق عنب ودة له كذا طريقة ف التخزين وكل واحدة ليها طريقتها(انا باخده غلوة اقل من دقيقة وانشله من المية واشيله ف كياس


*خلطة المحشي: الخضرة والبصل والطماطم والمله والبهار وف الكبة وعن الاستخدام تطلعيها تفك وتضيفي عليها الرز وتحشي بالهنا

ملحوظة الطريقة دي للناس اللي بتعمل المحشي ني ف ني والله بيكون طعمه تحفة وأخف من المسبك


2. تنفيض البيت :

لازم نستقبل الشهر الفضيل وبيوتنا منورة وزي الفل لأن دة أكرم ضيف بيجيلنا يبقى لازم احنا كمان نحسن استقباله
شوفي التنفيض بياخد منك كام يوم مثلا 3 ايام يبقى تنفضي قبل رمضان ب 5 ايام
..اعمل ايه ف البيت؟
دلوقتي هاتعملي الحاجات المستخبية زي أدراج البوفيه والسراحة ودواليب المطبخ واوضة النوم والاخيرة دي ان شاء الله هتلاقيها مترتبة لأننا كنا لسة مطلعين الهدوم الصيفي فيها
وبكدة هايفضلك ساعة التنفيض الحاجات الخفيفة اللي فوق الوش

3. تزيين البيت بزينة رمضان:
ودي لازم جدا جدا عشان عيالنا يحسوا بحاجة مختلفة ..زي مابيفرحوا بقدوم العيد لازم نحببهم ف قدوم رمضان
طيب هانعمل ايه؟؟
انا عن نفسي عندي ورق أعمال هاقصقصه على شكل فوانيس وألضمه ف حبل وأعلقه ف أوضتهم
وياسلام لو تكتبي على الفوانيس عبارات زي : اهلا رمضان –شهر الصيام-شهر الطاعة –وهكذا..........
وكمان في لمبة فيشة كدة (سهارة او وناسة اسمها)بتكون على شكل هلال ونجوم هاتيها هايفرحوا بيها.

4.شراء مستلزمات مهمة:
ربنا يرضى عنك بلاش تضيعي وقتك ف رمضان ف السوق...هدوم العيد ممكن تتجاب اليومين دول
ولو انتي عندك امكانية وبتحبي تشتري حاجات جديدة للبيت ملايات وستاير وكدة برضه اشتري قبل رمضان
يعني هاتي ورقة واكتبي فيها كللللللللل احتياجاتك من السوق عشان ماتشتريش حاجة ف رمضان ومهم جدا ترتبي أولوياتك عشان الميزانية ماتبوظش ههههههههه

انا كدة خلصت الحمد لله
عاوزة اقولك انك لو ماستعنتيش بالله ف اللي هاتعمليه مش هاتنجزي أي حاجة
كمان الموضوع لو تلاحظي فيه شراء كتير وتجهيزات للفريزر وكل دة لو مصاريفه ..صدقيني ربنا هايبارك وهاتجيبي كل حاجتك وكل واحدة ادرى بظروفها وظروف زوجها ..اشتري على قدر طاقتك من غير ماتجهدي نفسك
مافاضلش غير اني افكرك بحاجة مهمة جدا
وهو التقييم
احتسبي انك لو قيمتي الموضوع بسببك انتي هايتثبت وغيرك يقراه ويبقى في ميزان حسناتك انتي عشان قيمتي
انا نفسي الموضوع يتقيم النهاردة لغاية آخر يوم ف شعبان عشان الكل يشوفوه
تحياتي لأحلى أخوات ف الدنيا كلها
أسأل الله العلي القدير أن يفتح لي قلوب عباده ويرزقني الصدق آمين يارب

:)

:)

:)

يلا كل سنة وانتو طيبين يلا يجماعة كلو يقيم ويقرا الموضوع عشان نفسى يتثبت ب;)

بارك الله فيك وجعل كل حرف خطته يداك فى ميزان حسناتك يوم لا ينفع مال ولا بنون

كل سنه وانت طيبه ياسمسم

موضوع راق ورائع ومفيد
جزاك الله خيرااا على تواجدك
ونفعك الله كما نفعتنا

صبااحك مساءك طهر ونقاء
ورضى من الرحمن


منى رشدى

بارك الله لكم على هذه المعلومات وجعلها فىميزان حسناتكم