-
مستحيل عشرين مليون مصري
شوفت اعلان لموبينيل بس عجبني اوي وفكرته ان موبينيل بفتخر ان عدد المشتركيين وصل ل20 مليون مشترك
فكرة الاعلان ان بيسأل لو عشرين مليون مصري اجمعوا يقدروا يعملوا ايه ؟
و تسمع الاجابة من ناس كتير زي :
يقدروا يحفروا قناة السويس في شهر تقريبا
يقدروا يزرعوا مصر كلها في شهرين
لو كل واحد شال ورقة الشوارع تنضف في ربع ساعة
لو مسكوا ايد بعض هيكملوا لفة حولين الكورة الارضية
تخيل لو نزلوا الصبح مبتسمين شكل الشارع هيكون ايه
وفي الاخر يروح طالع واحد بصوت هاديء و رخيم و يقولك
إقتباس:
عشرين مليون مشترك في موبينيل تخيل يقدروا يعملوا ايه
فكرة الاعلان جميلة و عجبتني جدا بس سرحت كدة معاها وفكرت يا تري لو عشرين مليون مصري قرروا يعملوا حاجة مع بعض ممكن يعملوا ايه
طبعا اكيد اكتر من عشرين مليون بيجمعوا وقت ماتشات الكورة
و بتمني ان العدد ده يكون بيجمع في وقت الصلاة غير الجمعة طبعا
بس خلونا نتخيل كدة ممكن يعملوا ايه تاني
خلونا نشوف ايجابيات الاول مهما تكون هايفة و صغيرة :
لو كل واحد فيهم شال ورقة ممكن فعلا البلد تنضف
لو كل واحد فيهم اتبرع بالي يقدر عليه ممكن نلم كام و نعمل بلفلوس ايه
لو كلهم في وقت واحد دعوا ربنا بصدق واخلاص ممكن يحصل ايه
لو كلهم لمدة يوم واحد اشتغلوا بضمير حقيقي ممكن ننجز شغل قد ايه
اعتقد لو في عدو دخل البلد و طلعوا عليه مرة واحدة اكيد هيعيط علي اليوم الي عتب فيه مصر
لو كلهم انضموا للمعارضة اكيد هيغيروا اي حاجة
لو كلهم وقفوا قدام اي ظالم اكيد هيرتدع
نيجي بقي للسلبيات
لو كلهم رموا زبالة في الشارع انتوا عارفين الشوارع عندنا شكلها ايه
لو كلهم مراعوش ضميرهم في الشغل هيكون حالنا زي دلوقتي
لو كلهم اصبحوا اعضاء في الحزب الوطني ................................حذفت بأمر الرقابة
افتكاسات و تهييس
لو كلهم دخلوا مصراوي كافيه مرة واحدة السيرفر هيقع
تخيلوا لو كلهم بيكلموا في وقت واحد ازاز الشبابيك هيكسر
لو كلهم راحوا يشتروا عيش من الافران البلدي حتي القمح ابو علف مش هيكفي
لو كل واحد جاب عربية هنلغي الشوارع و نحولها مواقف
لو كلهم مركبوش عربية الصبح و استخدموا الموصلات محدش هيعرف يروح حتة
لو كلهم سافروا يشتغلوا بره .................. متهيألي النقطة دي تتحط في الايجابيات
ويا تري انت شايف ايه
لو عشرين مليون مصري اتجمعوا سوا ممكن يعملوا ايه
مرورك وحدة مش كفاية
شارك بتخيلاتك
-
