رُباعيات من وحي الأمثال الشعبية / رضا محمود
إمشي طريقَك عِدِلْ.. يحتار عـدُوّك فيكْ
ياللّي غويت الجَدَلْ..ذِكـر الإلـه يكـفيكْ
إسمع كلام النَبي في حالتنا دي بالذّاتْ
بُعدَك عن الشُبهَاتْ..من كُل سُوء يعفيكْ
************
لو سَقف بيتك قِزازْ..ما ترمنيش بالطُوبْ
إجعل سكُوتَك مَلاذ..تداري فيـه العيُـوبْ
كُل ابن آدَم ضَعيفْ..ومفيش بَشَر معصُومْ
لو الضَميرمَعدَومْ.. يبقى الأسَاس معـيُوبْ!!
*********
لو الكلام من فَضَةْ..يبقى السكُوت من دَهَبْ
الصّبر وَقت الشدّة..يطفي لهيب الغَضَـبْ
أصل الرجَال أفعَالْ..والوَزن بالأحمَالْ
والضَهر لوحَمّالْ..بيهون عليه التَعَـبْ
*************
جيبتك أكيد العوازِلْ...كِدت بيـك رُوحي
عرفت مَعنى التنازُلْ..حَتّى عن رُوحي
عَصرت عُمري.. سقيتك شَهد باستمرَارْ
شِربت فيك المَرارْ..ورجعت بجرُوحي
************
عتاب النَدل إجتنابُه..وحضُورُه زي الغيَابْ
يضحك في وشّك بنَابُهْ..والقَلب لون الغُرابْ
لا بيعرف المَعـرُوفْ..ولا ينجد الملهُـوفْ
واللّي يعيش بيشُوفْ..ولكُـل شيئ أسبَـابْ
***************
الواطي مهمَا عِلِي..أصلُه يـرُدّ عليهْ
والعَقل لومُبتَلِي..الجَهل يسكُـن فيـهْ
الرك عـ الأخلاقْ..والقَلب بيت الدّاءْ
واللّي اتعجَن بغبَاءْ..مفيش دوا يشفيهْ
**************
لكُل جَـرح دواهْ..ولكُل بَاب (مُـفتَاحْ)
سيب الأمور للهْ..قلبَك يعيش مِرتَاحْ
إجعل كفاحَك سببْ..دا الرزق مش بالتَعَبْ
من إمتى عود العِنَبْ..كان يطرح التفّاحْ؟!!
**********
الصَبر طيّب يا قلبي..والنَصيب غَـلاّبْ
والحِكمَة من فَضل ربّي..والزَمَن قَـلاّبْ
مهما يطُول الليلْ..الفَجرلُه مَواعِيدْ
وبُكرة صُبح جديدْ..يفتح علينا البَـابْ
***********
إن مال عليك الزمَنْ..ميّـل على دراعَكْ
مَفيش غَريب مُؤتمَنْ..لو القريب بَاعَـكْ
الدنياعايزة القوي..زي الجَبل في الرّيحْ
كُترالعتَاب تبَاريحْ..بيزيد في أوجَاعَكْ
**********
