نزلت الشارع النهاردة لقيت البلد عبارة عن
يافطات
شكر ... تأييد ... بالروح .. بالدم .. الخ
ايوووووه .. ده النهارده انتخابات مجلس الشعب
ده اليوم باين عليه من أوله
احسن حاجة أروح الشغل وخليني في حالي
كفاية اللي حصل الانتخابات اللي فاتت
وصلت الشغل بس متأخر كعادتي ولقيت كل
زمايلى راجعين من اللجان
إحنا رحنا انتخبنا -
...
بس أنا مش شايف أي آثار انتخاب خالص -
قصدك العلامة الحمرا ؟-
اه طبعا .. اثار انتخاب ... ضربة شومة .. لطشة -
مطوه .. علامة مميزة
لا لالا مفيش الكلام ده خالص احنا رحنا انتخبنا -
والناس هناك ذوق جدا جدا
معقول بتتكلم بجد ؟ -
والله -
...
خرجت من الشغل وأنا مش مصدق ولا كلمة من
اللي قالها زميلي قلت أكيد ده حد ضرب لغاية ما
بقى يخرف
قلت في نفسى طب ما أشوف بعينيّا
رحت للجنة بتاعتى اللي في مدرسة الهرم
الثانوية اللي جنب بيتنا
ياه نفس المدرسة بالظبط من الانتخابات اللي
فاتت
مفيش حاجة اتغيرت
نفس السور المكسر .. نفس الدهانات مفيش
حاجة اتغيرت
لا فيه حاجة اتغيرت ؟ إيه هيه ؟؟
يا خبببببببببببببببببببببببب بر
فين الدبابات ؟
....
والبوكس الأزرق ؟
مش ممكن الحاجات دى اختفت ولا إيه
المدرسة عادي خالص ناس طالعة فرحانة وناس
داخلة عادي خالص
مفيش أي مشكلة
حاولت اقرص نفسى ده حلم ولا إيه يا جماعة
دخلت اللجنة.. رحت أشوف أسمي في القوايم
اللي قدامى .. ياااه كل دى أسماء
لقيت عسكري أمّور ورايا
كلم الباشا -
اه.. انا قلت الموضوع فيه حاجة
مش قلتلكوا ... أنا كنت حاسس ان الموضوع
مقلب
رحت للضابط وأيدي على قفايا بفتكر اللي حصل
ليّا في الانتخابات اللي فاتت
والله يا باشا انا آسف انى جيت انتخب -
انا بكرر أسفي ومعترف بغلطتي
لقيت الظابط محترم جدا وقالي بكل ذوق
آسف على ايه؟ انا عاوز أقولك متعبش نفسك -
وتدوّر على اسمك
خش على طول انتخب بالبطاقة الشخصية
وقعت ع الأرض ... مش مصدق اللي بيحصل
مش معقول
...
دخلت اللجنة لقيت واحد قاعد وشه زي القمر ..
قابلني بابتسامة رقيقة
إيه الحلاوة دى
.
مش ابو لهب بتاع المرة اللي فاتت
البطاقة بعد إذنك يا أفندم -
بصيت ورايا .. مين أفندم ده ؟
حضرتك -
اتفضل حضرتك الورقة دى بأسماء المرشحين
واختار اللى يعجبك براحتك
نعم... ؟؟ حضرتك ... اختار .. وبراحتك إيه الألفاظ
الغريبة اللي بسمعها دى
انت بتهزّر ..أختار بجد اللي أنا عاوزه ؟ -
طبعا يا افندم ده صوتك -
انا مش مصدق مش معقول دى مصر يا جدعان
ولا أنا غلطت في العنوان ؟
اخترت اللى فيه النصيب
....
بعد كام يوم بافتح القناة الأولى لقيت الخبر ده
:
فوز المعارضة بنسبة 70 % من مقاعد البرلمان
حصول الحزب الوطني على 22 % فقط
معقووووووول يا جدعان
طفيت التليفزيون كذا مرة وولعته تانى .. يمكن
يكون بيخرف
اتأكدت إن دى القناة الأولى مش
space toon
المذيع
:
كلمة مرشح سابق من الحزب الوطني
:
إحنا بنشكر كل الناس اللي ادونا صوتهم واللي ما
ادوناش وأنا مش زعلان عشان ما كسبتش المهم
مصلحة مصر والشعب اختار اللي هوه عاوزه
وبنتمنى للمعارضة اللي كسبت إن ربنا يوفقها
في مهمتها
لا أنا مش في مصر
أنا اتجننت
