بتخلي المسنود فرعون ...... يتفرعن فين مهما يكون
وتخلي الجاهل أستــــاذ ...... والأعرج لاعب جمبـاز
وتخلي الأحــــول هداف ...... والكوره الآوت فـ الجون
للكوسه ف بلادي شئون
لو تعرف واحد ف الشرطه ...... راح تخرج من أجدع ورطه
والراجل اللي انت ظلمتـــه ...... تلاقيه متلقـح مسجـــــون
أو تعرف شخصيه كبيــــره ...... شغاله فـ البنــــــك مديره
راح تاخد من غير ضمانات ...... كام قرض بمليون مليون
وهروبك طبعا مضمون
للكوسة في بلادي شؤون
ويا عيني لو تعرف نايــب ...... فـ المجلس ومش بعيد
راح تبني أبراج وهميـــه ...... أوراقها مظبوطه أكيد
وفلوس الناس المهريـــه ...... حتجيلك م الجيب للإيد
بعديها تروح المستشفــى ...... وتقيد نفسك مجنــــون
أحكامك تسقط ف ساعتها ...... بعديها ترجع موزون
ويا عيني لو تعرف شيخ ....... فجنابك طاهر علطول
وصيامك طبعا مقبول
للكوسة في بلادي شؤون
وإذا فرضا حبيت تتجــــــوز ...... تتجوز من غير مأذون
وإذا ساكن فـ عماره جديده ..... وحبيبك راجل مسئول
فسيادتك من غير ما تقول ...... يركب لك فورا تليفون
ولو انت عندك عربيـــــــه ....... ونمرها سوده بنسرين
حتعدي من أجدعهــا كمين ...... وحتكسر أوضحها إشاره
ماهو نمرك سوده جباره ...... ولا تعرف أيتها قانون
ولو انت بتعـرف فـران ...... أو واحد بياع جرنان
راح تاخد طلبك وحتمشي ...... من غير دوشه ولا دور
والناس الغلبانه حتاخد ...... طلباتها بعدك وتغور
ماهو كله غيرك بيهون
ولو انت زميل الحلاق ...... راح تحلق اولها زبون
وإذا كنت بتعرف دكتور ...... حتعيش متطمن مسرور
وحتسلك ف لجان الشفوي ...... ومجال تعيينك موفور
وحتطلع فالتليفزيـــون ...... بالبدله وفيها الببيــون
تتكلم وبكل بساطه ...... عن شرف المهنه المدفون
لكن لو شاعر غلبان ...... قال اللي ف نفسه علطول
حيقولو مين قال لك قول ..... ويهاجمك مليون إنسان
والتهمه أنك فنان ..... مش برضه كلامي يا جدعان
حسيينـــــه ...... ولا أنا غلطــــان
