رسالة حب من الحكومة لإبنها المواطن..
عزيزى المواطن بتاع النضال
يا راكب دماغك و غاوي الحلال
نصيحة يا صاحبي بلاش الخيال
و غمض عيونك و ربي العيال
بلاش المناكفة و لايم و عيش
هتتعب معانا و سهمك يطيش
نلفق لأهلك قضية حشيش
و تصبح حكاية و نكتة و مثال:
تعالى و هاودنا و عدّي الامور
و عيش فى الطراوة و خش الطابور
لكن لو هتزعل و دمك يفور
هنشهد نهايتك فى بحر الرمال
هتصبح حرامي هتصبح أمير
هتصبح حرامي و ندل و أجير
و نقدر نلخبط فى أصلك كتيير
و جدك شحاتة هيصبح شحال
هنحلف إن الحبايب شافوك
بتقبض يا خاين و تقتل أخوك
ساعتها مراتك هتلعن أبوك
و تلطم و تنعى أحط الرجال
مالكش انت دعوة مين اللي ضاع
و مين اللي شاري و مين اللي باع
و مين اللي كيل و مين اللي شال
فحب الحكومة و حب السلام
و علم ولادك يشدوا الحزام
علشان همه بكرة هياكلو الحمام
و ينسوا الأسية و ينسوا الهزال
فلازم يا صاحبي تغمض عنيك
و طنش علينا نطنش عليك
و إياك تشاور نقطع إيديك
و تصبح مواطن ما يسواش ريال
عزيزي المواطن بتاع النضال
يا راكب دماغك و غاوي الحلال
نصيحة يا صاحبى بلاش الخيالhttp://www.arabia4all.com/vb/images/smilies/nono.gif
