مالقتلهاش عنوان .. للاستاذ عبد الرحمن الابنودى
قصيده للاستاذ الكبير (( عبد الرحمن الابنودى )) .. قصيده جديدة فى جريده الدستور ..
مالقتلهاش عنوان ..
هل يمكن لمن أنجب إن يعجز عن تسميه مولوده ؟ أنا عجزت _ رغم الاعتصار و طول الانتظار _ أن أهب القصيدة اسما
كلما عثرت على اسم أحسست انه سوف يؤذيها .
هل منكم من يهبني اسما دون اعتداء عليها .. ؟
مالقتلهاش عنوان
ولحد ما تنشف منابعها البترولية
و تجف ربوع أراضيها الزراعية
و ينام الموت .. يتطمع في البرد و في الشرد
وتعود كل البنايات العالية للأرض
بالجوز و الفرد
و ينطفى في خدود صباياها لهيب الورد
و لحد أما يموتوا
كل ملوكها و رؤساءها و أمراءها
و ولاد أولاد
كل ملوكها و رؤساءها و أمراءها
ولا يفضل منهم حد
لحد ما الكتره ما تصبح قلة
و لحد ما قصور الامرا
ما تتلطع على واجهاتها الجلة
و لحد ما الشمس ما تطلع من الغرب
و لحد ما تضنى _ من غير حرب _
كل جيوشنا و عساكرنا الانية
و جيوش و عساكر كل الأجيال الجايه
و كل الخلق ف كامل إرجاء الامه
أصحاب ضميرها
وقلالات الذمة
الاغنيا و الفقرا
سراق المال و الاجرا
محتكرى الصحه و اصحاب العله
كلنا مله مله
حنموت و ولادنا تموت
ولاد أولاد أولادنا تموت
و إحنا لسه بنقول عنها ..
(( الأرض المحتلة ))
