لو كنت فاكر ان بعادك هدنى.. وانى فى يوم هركع وانحنى
وأقولك سامحنى ياعينى قلبى انكسر..واقولك انت الحبيب المنتظر
اللى ماليش غيره فى عالم كداب.. ان بعدك بعدك رمانى فى عذاب
وقمر الليالى ياعينى بعدك غاب..والدمع فى عينى بيك سال
وكل الجرح اللى فى قلبى داب..وان الحياه مابقتش هيه
وان حياتى خلاص منهيه..وان كلامك اثر فيا
وهرجعلك واقولك اسفه..انا من غيرك حياتى تافهه
وان خيانتك وغدرك ذكريات صافيه..وان احضان الشوك كانت دافيه
وعيونى فى ليالى خيانتك كانت غافيه..وهرجعلك تبقى ياعينى غلبان
فاكرنى هنسى كل اللى كان.. وابتسملك واقولك الله على النسيان
وافتكر ان قلبى عمره ماكان فى حاله غليان.. واقول اهى غلطه زى الست
وافضل مركونه جنبك على الخط..وانسى واقولك خلاص نفضت
وابقى زى كتير مروا عليك على الخط.. منهم عاشقين ومنهم خاينين ومنهم اللى يعلم بيه الرب
لأ مش انا اللى أرجع عن موقف اخدته..واتراجع عن قرار فى يوم قررته
أو انا اللى تبكى على قلب باعها من غير سبب.. تقدر تقولى مكسوف دلوقتى ليه
ساكت زى واحد مغضوب عليه.. لسانك ده اللى قال بحبك
دلوقتى معقود ساكت خايف.. مش قادر ولا عايز يتحرك
عارف انه مش بالصدق اتحرك..وانه قال كتير كدب
وانه ياما قال كتير اللى ماكنش حق..خلانى اتوهم انه فى حاله حب
أغانى يسمعهانى وقصه يعيشهانى.. ودلوقتى عينك وانت واقف فى الارض
مش هخليك فى وضعك كتير.. ان كنت قسيت فأنا مش هقسى
أمشى ومش عايزه اشوفك تانى.. صورتك هحرقها وقلبى هقتله
و أغانيك هنساها.. وكلامك هكدبه
