حتى فى عز الحر,مفيش دفا

زمان وانا صغيره
كان كل امنيتى انى اكبر
اعرف انزل من بيتنا لوحدى
اشترى هدومى لوحدى من غير ما ماما تشترى هدوم ما بطقش الوانها
اكل الاكل اللى بحبه,من غير ما ماما تقولى
لا مش مفيد ,لا التسوس ,لا الانيميا
وتفضل تأكلنى حاجات مش بحبها
اروح الجامعه والبس حاجات غير المريلة او اليونيفورم الغتت
اشتغل ويبقى معايا فلوس
ومحدش يقدر يفتح بقه معايا
و..........
و................

كانت احلام صغيرة اوى
بس وقتها كانت بالنسبة ليه
كانت كل الدنيا


دلوقتى ببص ورايا
بعد ما كبرت
وخرجت واكلت ولبست
واشتغلت واتعلمت

وبقول لنفسى
ينفع ارجع تانى؟؟؟

لايام اكبر همى فيها
ماما هتدينى سندوتش مربى ولا جبنه ؟؟

ايام الدفا
الدفا اللى بجد

ايام فاكراها بكل تفاصيلها

اطفال العيله كلهم ملمومين فى بيت واحد
وفجأة النور يقطع
نتكوم كلنا فى حتة واحده
وعشان ما نخفش تيجى ام قلب كبير وحنين حنيه الدنيا
تلمنا حوالينا
وتحكى الحواديت
اينعم كلها كانت رعب وعفاريت وبلاوى
بس كنا مدفين بصوتها
صوت جدتى

ايام ارجع من المدرسة
وانا فى منتهى السعادة عشان اصحابى اختارونى رئيسة الفصل
والاقى والدى فرحته بيه اكتر من فرحتى بنفسى
ويقعد معايا يحكيلى عن ايام دراستة
والمدارس ايامها كانت ازاى
ويحكى ويحكى
وانا حاسة بالدفا
منتهى الدفا
اينعم كانت غربان بطنى بتزععععععععععق
وهموت واكل
بس الدفا وقتها كان طعمه احلى من اى اكلة

دلوقتى فى عز الحر
مفيش دفا

مش عارفه اقول ايه ولا انا عاوزاه اقول ايه
بس يمكن اللى عاوزاه اقوله
لو جنبك انسان بتحس مع بالدفا
خليك معاه اكبر وقت

لان بعده صعب تحس بدا تانى

مش عارفه
حاساه انى نكدت عليكوا
بس ماليش غيركوا افضفض معاه
فسامحونىhttp://www.haridy.com/ib/images/smilies/give_rose.gif