مصر عبارة عن ايه ؟ ايه ؟ ...هه ! ايه؟

http://i23.tinypic.com/t680v4.gif

اولا : دايما الاقي ناس بتتسأل : انت بتحب مصر ليه ؟ قولي حاجه حلوه في مصر ؟
دايما نعيب اسم (مصر) و كونها بلد مش تمام .. بس تعالوا هنا اما اسألكوا سؤال صغنن

مصر عباره عن ايه !
سؤال غريب ..؟ يعني ايه مصر عباره عن ايه!

انا من وجهه نظري المتواضعه ... مصر تنقسم الي جزئين ..

1- شعب .... اللي هو احنا ...انا و انت و عم سماعين و ام سحلول و كل طبقات الشعب الكادحه و الغنيه و المتوسطه

2- الارض اللي عايشين فيها !وفوقيها وتحتيها

طيب لما نيجي نقول مصر فيها عيوب كتير ...
هل تقصد بذلك اخي او اختي العزيزه شعبها؟
ام تقصد ارضها ؟

هل العيب في الارض الصلبه اللي مالهاش حس .. ولا الشعب !
كل بلد في الدينا عباره عن ناس ! ما ينفعش بلد من غير ناس
يعني تخيل لو مصر مافيهاش شعب .. هل حتقول عليها ساعتها وحشه! لا طبعا الانها حتكون حته ارض فاضيه..
طيب.........
هه بتقول إيه ياكابتن.. ايوة ..انا سامعه واحد بيقولي ... طيب انتي بتقويل كل الكلام ده ليه! عاوزين نفهم يا عم الأموره !
حاضر حقول اهو..

العيب مش في مصر ...كونها اسم الارض اللي احنا عايشين فيها... العيب في الناس ... اللي همه احنا.. اللي هو الشعب ( خلاص فهمنا يا حاجه !)
لما تكون البلد وحشه ده كونها اننا احنا اللي مبوظينها اخلاقنا راحت في علبة كانز ..وساندوتش شاورما
حتقولوا طيب ياخويا الشعب المصري جدع و ابن بلد .. و الخ الخ من الكلام بتاع المسلسلات المصري

حقول عندكوا حق ... بس كام نسبه الناس الكويسه ...؟ مممممممممم

نقول مثلا افتراضيا10% ؟؟ حلوين ..؟

بلاااااااااااااش خليهم 15 % علشان الحبايب ... طيب الباقي ...؟ ال 85% دول ؟؟ اين ذهبوا ؟
طيب انا حصنف الناس الوحشه دي الي اقسام من وجهه نظري المتواضعه و الشخصيه ...

1- منهم اللي بيعاملوا السياح بطريقه نصب و نهب .. و الهف يا عم علي قد ما تقدر منهم و الحاجه ام ربع جنيه يعملوها ب 200 جنيه

2- معامله المصريين لبعض بقت مش تمام! و ماحدش يقولي لأ بقي !

3- ماحدش دلوقتي ليه دعوه بالتاني .. يعني لو حد ضايق بنت في الشارع ... بيصادف انه ظابط بيعاكسها طب هي تلجئ لمين لما تكون الجهه اللي المفروض تدافع عنها هي الجاااااااااني ..؟

4- هجاصين قوي في الكلام ...

5- اخر شعب يتصرف و يحل المشاكل !

6- مهما ننصح و نوعي في الناس بوسائل الاعلام و الراديو و النت .. برضه مش محوق ! ده دليل ان الفول لعب في دماغنا بطريقه شديدة ...

7- قرأت هذه الجملة للدكتور أحمد خالد توفيق "

النفوس صارت أضيق من أن يتسع بعضنا لبعض ..

في اسباب كتير بس الاسف الشديد مش قادره افتكرها ! بس نكتفي بدول ... حلوين دول نرغي فيهم لحد 100 سنه جايه

كل اللي انا عاوزه اقوله ... ان الشعب المصري تحول في السنوات السابقه الي شئ غريب !
شباب غير متحمل للمسؤليه و بنات هايفه و دايما متمسكين بالماضي و احنا بنينا الهرم ..هرم إيه ده اللى بنيتوا ياروح خالتك
(معلش ياكابتن أصلك برده بتقول كلام مستفز يعنى) طيب و بعدين !
ها دلوقتي في ظل التطور الرهيب اي دوله تقدر تبني هرم الجيزه ! دول كتير مالهمش تاريخ زينا.. بس ليهم مستقبل و تطور

لكن انا اعتقد اننا حنفضل زي ما احنا ... و برضه احب اختم كلامي بحاجه ...
انك لما تيجي تسال نفسك ... طيب انا المفروض احب مصر ليه و انتا عمال تسود الدنيا في وشنا !
اقولك فكر في حاجه واحده... اهم حاجه انك حر في بلدك ... مش حر بمعني الفوضوي انا اقصد انك بتمارس حياتك بطريقه طبيعيه بتروح جامعه و بتتعلم و بتتخانق مع صحابك .. شوفت بنت حلوه عاكستها ...موزة بيضة حلوة ثبتها
عايش حر .. مش مثلا زي دول تانيه تلاقي قنبله نازله ترف فوق دماغك..! او مش عارف تروح جامعتك علشان القوات عامله حظر تجول !
اهم حاجه فكر فيها انك اه عايش في بلد ممكن مش تكون زي اي دوله بره .. بس الحمد الله اهو عايش فيها من غير قنابل ولا قصف جوي و لا بيت سقفك وقع فوق دماغك ...!

اتمني يكون رأيي ما زعلش اي حد بس انا حبيت اوضح وجهه نظري تجاه الناس اللي بتقول ( احب مصر ليه !)

وكمان ثوااااانى كده انتا جربت تغنيلها طب ماشربتش من نيلها .....
أيه ده ياعمونا إنتا مابتسمعش شريييييين ولا إيييييييييييييه ؟

http://i21.tinypic.com/2ef6qmw.gif

طب وبعدين بقي؟؟
فضيت انا علي اد مواضيعك الشديدة دي ولا ايه؟؟؟
المهم
مصر دي بقي الواحد بيبقي مخنوق منها
عايز الارض تنشق ويلاقي نفسه في اي بلد تانية
الواحد بيبقي مخنوق من كل حاجة
من الزبالة اللي في الشوارع
من الزحمة اللي في الطريق
من البشر ذات نفسهم
وكل احلامه انه يطفش من البلد دي
بس والله
مجرد ما تطلع برة مصر
لو مثلاً يعني ربنا كرمك يعني وروحت بلد اجنبي نضيفة
اخر الواحد مننا شهر
اتنين
سنة
ويلاقي نفسه يموت ويرجع مصر
ليه؟؟
الله اعلم
يبقي امنية حياته انه يرجع ارض الوطن ويبوس ترابها- حتة وطني اوي دي:D- بس دي الحقيقة
كل اللي فات ده بنتكلم في العنوان-ياااااه يا سراج ده انت باين عليك فاضي ورغاي مووووووت:D-اللي فعلا من وجهة نظري دي مصر
وعادي وجهات نظر برده

بالنسبة للموضوع بقي
يا نهار مش فايت الواد قعد ساعة في العنوان امال الموضوع ها يقول فيه ايه؟؟
لاء بسرعة باذن الله
لو تلاحظي
الحكاية بتاع الشعب اللي بقي مش زي الاول ده
انتشرت بعد حرب اكتوبر1973
وبدات تكبر
وتنتشر
وتزحف
وتتوغل
وتستمر وتستمر وتستمر:Dبس فعلاً احنا في حاجة غلط حصلت لينا بعد 73
ايه هي؟؟
الله اعلم
رغم ان الحرب دي مش من كذا قرن يعني
دي مش كملت 40سنة
بس فعلاً كل حاجة فينا اتغيرت
اخلاقنا
طباعنا
صفاتنا
كل حاجة
مش هو ده شعب مصر اللي حارب بجد والله
شباب الفانكي بانكي-واحنا منهم برده- اللي موجود دلوقتي مظنش انه يقدر يحرر قرية صغيرة من شوية بلطجية
الشباب فعلاً اللي هايبقوا في يوم من الايام اباء بقي فيهم حاجة غريبة وغلط
بس من اللي بيشوفوه
قنوات اغاني
مخدرات
بطالة
اغلب الحاجات اللي المفروض ان الحكومة هي اللي تسأل عنها
بس احنا مش كل حاجة حكومة
ما الحكومة دي احنا
ها تدور ها تلاقي عمك موظف كبير
خالك عضو مجلس شعب او شوري
ابوك وزير-مش اوي كدة يا حاج-الحكومة دي من الشعب
واحد لقي نفسه بقي وزير
بقي غفير
اهو كله حكومة
بس برده الحكومة في الاول من الشعب
يعني الغلط منين دلوقتي؟؟؟
مش عارف بصراحة
تسلمي مريومة بجد ع الموضوع التحفة ده
=D>=D>=D>

الله يخليك وتسلم لمرورك المميز وردك الجميل
عجبني اوي ردك وشباب الفانكي مانكي دي ههههههههه
بصراحه العيب مش فينا العيب في الارض هههههههههه
تسلم يا جميل علي المرور المميز

شكراً ياروللى الموضوع جميل
كمان إضافة سراج جامدة موت
"فانكى بانكى"زى مابيقول
لكن أحب أوضح إن الغلط اللى حصل بعد 73
إن ولاد البلد الصح اللى كانوا مفروض
أنهم يبنوا البلد ويأسسوا البنية التحتية
"حلوة البنية التحتية دى"
ببساطة هربوا من البلد لدول الخليج
أو أى خرابة يكون فيها فلوس كتيرة وخلاص
وسابو البلد للحرمية اللى أسسوا فيها
قواعد النصب والسرقة
وفجأة لقينا علمائنا وأعمدتنا اتحولو
أمريكان -انجليز-أسبان......إلخ

والمسلسل دة لسة ماشى لحد دلوقت
وربنا يسترها علينا وعلى ولايانا

مطولش عليكم بقى لتناموا منى

وكل سنة وانتو طيبين وسنة سعيدة عليكو
والسنة الجاية تكونوا فى أى حتة

هههههههههههههههههه
وانت طيب يا جميل
وان شاء الله حنقضيها برضو هنا في بلدنا
وتسلم علي المرور الكريم

السلام قبل الكلام
واحد ابن حلال ادانى الموضوع عشان اقراه اتورطت فى تسجيل ومشاركة
حلو الموضوع وبصراحة الردود كمان مميزة اوى وعجبتنى جدا
بصى يا مريومة مفيش اختلاف على ان كل انسان سوى بيحب بلده بس احنا المصريين زى ما بيقولوا فعلا يا سراج مهما بنبعد بنحن لبلدنا الظاهر عمل معمولنا فى مية النيل وشربنا منه كلنا
بس يا جماعة ميختلفش اتنين على ان الجوع والبرد والظلم يخرج أسوأ ما فى الأنسان واذا كنتى بتتكلمى عن اللى بيروحوا الجامعة فى امان
يابنتى افتكرى اللى متعلموش خالص
اللى فى العشوائيات
لا كهربا ولا مية صالحة ولا حتى غير صالحة ولا تعليم ملايين بالشكل دة
انتى بتتكلمى عننا احنا اللى اتربينا فى ظروف معقولة بعضنا مستور وبعضنا ربنا موسع عليه وبعضنا وارثين
اللهم لا حسد
احنا معظم اللى بيدخل المنتديات وبيتكلم يا جماعة لا جاع ولا اتبهدل ولا شاف مرارة أطفال الشوارع
دول زهور اليوم المظلومة ومجرمين المستقبل المتهومة
ونااس كتير بتنظرلهم بكل أسف بعين احتقار تلاقى الهانم بتبص للولد من دول وتقوله روح استحمى
ياى ريحتك تقرف مش بتحط برفان ليه
انزلوا المستشفيات اتفرجوا وقولوا للناس حبوا مصر
ادخلوا السجون وقولوا للى فيها حبوا مصر
امشوا فى الشوارع جنب المطاعم وقولى لواحد جعان مكلش من كام يوم ولا ولاده اكلوا وقولوله حب مصر
اه احنا بنحب مصر
وقرينا اشعار وكتبناها فحب مصر
و أنا بحب مصر
بس بحب الحق
بحب احس باللى حوالية ومكونش ظالمة واحط نفسى مكان اللى قدامى واشوف هيبقى رد فعلى ايه ودام انا مجعتش ومتبهدلتش ومتعذبتش فى سجن من سجونها
يبقى لالالالالالالالازم كل دة يتغير واقول للناس حبوا مصر زى ما بحبها
مع تحياتى طولت عليكو انا اصلا رغاية ادعوا على سراج هو اللى جابنى

منورة الموضوع ياروز
وردك جامد شوية على مصر
مصر اللى هي أنا وانتى وجيراننا وقرايبنا وكل حبايبنا
مش عيب فى حق مصر ان اللى ماسكها شوية حرامية
العيب فينا إحنا اللى خلينا الحرامية دول يفضلو فى مكانهم
فى أمان من غير مايحسو بلحظة خوف واحدة
أكيد انتى برده بتحبى مصر اللى إحنا بنحبها
وبعدين أهلاً بيكى فى المنتدى
وياريت دى ماتكونش أخر مشاركة وتنورينا علطزل بمواضيعك الجامدة
وأنتهز الفرصة وأشكر حبيب قلبى سراج
أنه عرفك بالمنتدى وزود المنتدى نجم جديد
طبعاً هتقولى كفاياك رغى
مع إنى مش رغاى والله
على العموم أهلاً وسهلاً بيكى معانا
=D>=D>

العيب مش في الارض طبعا ولا العيب في الشعب انما الشعب اتحطله حاجه زي منوم من خلال شاشات التليفزيون والنت وغيره وغيره وبدل ما نعترض علي الحاجات دي احنا بنايدها ودا ادي الاوربيون الفرصه انها بدل ما يهزمو المصريين بعلمهم واسلحتهم يخلونا احنا نهزم نفسنا لحد ما كل الي بنيناه زمان هيتهد علي دماغنا ان شاء الله ومره علي مره نسيبنا ديننا ونسيبنا اخلاقنا وعاداتنا وتقاليدنا ودلوقتي عايزين نسيب ارضنا يبقا هما خلاص خدو الي هما عايزينه وفعلا اثبتو ان المصريين محدش يقدر يهزمهم غير نفسهم وهما ادولنا الي احنا عايزينه بقت البنت ماشيه تقريبا عريانه وسوري علي كلامي دا والولد ماشي مسقط البنطلون بمنظر يقرف والراجل الكبير بيترمي في اي دار مسنين ويعيشو هما حياتهم والبنت بقت ترمي ابنها عشان غلطه فعلا العيب ولا فينا ولا في الارض العيب في الي قبل ان الحاجات دي تحصل في بلده من الاول