عارفين الشعور ده
عارف لما تسمع اغنيه كده
تلاقى نفسك بتبتسم من غير سبب
بس جواك حزين اوووى
و تلاقى شعور بدأ يدخل جواك
انت مش فاهمه
و تحاول تفهم ايه ده
وفى الاخر متفهمش
طيب والاحساس ده
لما تروح تقف على البحر كده
وتاخد نفس عمييييق
بعديها تلاقى نفسك بتبتسم
بس جواك حاجه مش قادره تخرج
حاجه يمكن بتقطعك من جوه
و مش عارف تتخلص منها
بتبقى نفسك ترمى نفسك فى حضن البحر
عارفين الشعور ده
طيب عارف
لما تبقى لسه صاحى من النوم
لسه مبدأش اليوم
وتلاقى نفسك على السرير
و غصب عنك تنزل دمعه
ممكن تفضل ساعتين تعيط على المخده
المخده اللى تعبت مننا كل يوم
كل يوم يتحس بينا
قبل ما ننام
و تقوم من على السرير
و محدش يعرف حاجه.
عارفين الشعور ده....
لما تكونوا اصحاب متجمعين فى يوم كده
و كلكوا مهيسين و بتضحكوا
و اللى يشوفكوا من بعيد لبعيد
يقول الناس دى رايقه
موش شايلين هم حاجه ولا بيزعلوا من حاجه
و انتوا اصلا بتضحكوا بدل ما تعيطوا
و محدش حاسس بحاجه
و محدش فاهم حاجه
محدش هيقدر اصلاً
انو لا يفهم ولا يحس اللى جواكوا
طيب عارفين الشعور ده....
لما تكون راجع من يوم سبيشيل اووووووى بالنسبه ليك
و ترجع..متحكيش لحد من اللى فى البيت على اللى حصل
و يمكن متحكيش لحد خالص
و يمكن اصلا محدش يسالك
ولا يقولك تعالى يا حبيبى
عملت ايه
احكيلى ابسطنى معاك
تبقى عايز حد جنبك اووووى يفرح معاك كده
بس متلاقيش
و تروح قبل ما تنام تراجع اليوم ده كده
لقطات بسيطه
و انت جاى تنام...تقعد تعيط
مع ان فى ناس كتييير يحسدوك على اليوم ده
