هى مش كلمة صايع كانت شتيمة زمان؟؟!

حذرنا الكبار – واحنا لسة عيال – من خطورة أن نصبح ((عيال صايعة )) فعندما تتأخر فى العودة إلى المنزل بعد المدرسة يتم أستقبالك بسؤال ((كنت فين يا صايع لحد دلوقتى ؟)) وعندما يكون الزرار العلوى للقميص مفتوحاً ((ماتفتحش صدرك زى العيال الصايعة )) وكان هناك ارتباطاً وثيقاً بين الصياعة والتدخين والوقوف على النواصى ومعاكسة البنات ووضع الايدى فى الجيوب أثناء الكلام مع الاب وشرب القهوة ومتابعة المشاهد الساخنة فى الافلام والكلام فى التليفون بالساعات والرد على الكبار بأسلوب غير مهذب والتزويغ من المدرسة والرسوب فى نهاية العام وأرتداء القميص على اللحم .

وكأن لقب ((صايع)) لقباً مخيفاً نهرب منه (( وهو الواحد اية غير سمعة وشوية حاجات فوق بعض )) وكنا نحرص على الابتعاد عن أى شخص يحمل لقب ((صايع)) علشان الواحد ما ((يتشبهش)) .ولكن بمرور الوقت حدثت طفرة لم تعد كلمة صايع شتيمة بل اصبحت وساماً يضعه الاخرون على صدر كل من يحوز إعجابهم ولم يعد الصايع هو الشخص ((اللى مش متربى قليل الادب اللى بيسقط دايماً وقاعد طول النهار على النت وبيعلى صوتة على أهلة وبيسرق فلوس من ورا أهله علشان يجيب سجاير )) هذا الشخص مابقاش أسمة صايع بقى اسمة ((مغفل)).وأصبح الشخص الصايع هو الشخص الناجح القادر على أثارة إعجاب الناس من حوله الشخص القادر على أنتزاع تصفيقهم وأصبح ((الصايع)) هو النموذج والقدوة والمثل الاعلى أحيانا .ولقب ((صايع )) لم يعد أيضاً مقصوراً على الاشخاص فقط فهناك أشياء كثيرة ممكن تقول عليها صايعة جهاز الموبايل اللى فية كل الامكانيات اللى محتاجها واللى بتحلم بيها .. يبقى موبايل صايع .

ممكن تلاقى جون ((صايع)) عبارة عن جمله بين 3 لاعبين سريعة ورشيقة وغير متوقعة .

ممكن تلاقى بوستر لألبوم لمطرب متصمم بطريقة صايعة ومحطوط فى حتة صايعة .

ممكن تشوف فيلم نهايته غير متوقعة ولما تمر فى خيالك تبقى نهاية صايعة والسيناريست اللى كتب الفيلم سيناريست صايع.

وممكن تلاقى بلد يتقال عليها ((بلد صايعة)) زى الصين اللى قدرت إنها تخترق مصر بمنتجاتها ويبقالها فى كل بيت مصرى 20 منتجاً على الاقل وبالتالى يمكنك أن تقول إن
((الصين دول صايعيين قوى )).

لم يعد لقب صايع مزعجاً مثل لقب ((عنده إيدز )) ولكن صايع أصبح وسام شرف مساو فى قوتة لوسام ال "iso 9001 "

ولا اعرف ماذا حدث بالضبط وغير سمعة الكلمة 180 درجة .. غالباً هى دى الصياعة !أستطيع الان وأنا ضميرى مستريح أن أشجعك على أن تكون ((صايع )) بالمعنى الجديد للكلمة .. للصياعة بمفهومها الجديد

أداب يجب الالتزام بها حتى تستحق اللقب


1 . الصايع عمره مايقول على نفسة أنا صايع عمرك شفت واحد ذكى ماشى يقول للناس ((أنا ذكى يا جماعة )) ؟

2 . الصايع يكرة الفهلوة لان الفهلوة سرقة ومجرد أستغفال للناس , الصايع يحترم ذكاء الاخرين .

3 . الصياعة تعتمد على الثقافة العامة فى كل المجالات يكفيك أن تعرف
((حاجة عن كل حاجة )).

4 . الحظ قد يقودك إلى القمة والصياعة أن تحافظ عليها .

5 . الصياعة أن بالك يبقى طويل وماتبدأش بالغلط وماتردش على اللى بيستفزك إنك تسامح الشخص اللى تقدر تنتقم منه بسهولة .

6 . الصياعة إنك ماتكررش نفس الغلطة مرتين .

7 . الصياعة إنك تدى كل واحد حقة وتعرف قيمة اللى قدامك بالضبط .

8 . الصياعة أنك تبقى فاهم كويس إنه

- مش مهم إنك تغير الكون .. المهم إنك تخلى الكون ما يغيركش .

- الحب اللى بيجى بسرعة لازم يروح بسرعة .

- الاحمق هو الشخص اللى لسانة أسرع من عقلة .

- أستمتع بالحاجات الصغيرة بكرة هتعرف إنها كانت كبيرة .

- اتعلم تضحك على مشاكلك وأنت عمرك ما هتبطل ضحك .

- الخط المستقيم أقصر طريق بين نقطتين والابتسامة أقصر طريق بين شخصيين .

- الصبر .. هو الحاجة الوحيدة اللى لازم تستعجل وأنت بتتعلمها .

- وجودك فى الحياة هدية ماحدش يقدر يقدمهالك غير ربنا وفية ناس كتير بتيجى لهم هدايا قيمة الشاطر هو اللى يعرف يستفيد من الهدية اللى جت له .

- كل حاجة فى الدنيا فيها شئ جميل بس مش أى حد يقدر يشوفة .

- مش كل مرة تتعب فيها هتوصل للى أنت عايزة بس عمرك ماهتوصل للى انت عايزة من غير ما تتعب .

- الفهلوة سرقة .. خد بالك مفيش طريق مختصر للمكان اللى يستحق إن الواحد يروحه .

- حياتك فيلم واللى حواليك بيلعبوا أدوار الأب والأم والجار والصديق بس أنت بطل الفيلم .. حاول دايماً تتصرف زى الابطال.

- أخطر عيب فى البنى أدم إنه ما يشوفش فى الناس غير عيوبهم .

- الصديق الجيد هو الهدية الوحيدة اللى الواحد بيقدمها لنفسه بنفسه .

- الصديق الكويس هو اللى يبقى عارف كل عيوبك ومع ذلك بيحبك .

- أول خطوة فى النجاح إنك تعرف إنت عايز إية .

- ابتسامتك فى وش أى حد هتخليه صعب إنه يكرهك .

- مش مهم أن الناس بتحبك المهم أنك تحب كل الناس .

- عمرك ما هتعرف قيمة الميه من غير ما تعطش وعمرك ما هتعرف الصح من غير ما تغلط .

- مش أى هدية ينفع تقبلها .

- ماتسيبش الريموت كنترول فى إيد حد إلا لو كنت بتثق فيه.

- ماتصدقش اللى يقولك ((هى كده)) أو ((هى ما تتعملش غير كده )) كل الحاجات ينفع تفكر فيها من أول وجديد حتى لو قالوا لك دى ثوابت .. وخليك فاكر أن السباحة لو كانت بتخسس – زى ما بيقولوا – كان الحوت بقى سمكة زينة من زمااااان.

- مافيش حاجة اسمها حظ والمحظوظ هو مجرد شخص عارف هو عايز إيه وبيقدر يستغل كل الحاجات اللى بتقابله فى السكة لمصلحة الحاجة اللى هو عايزها .

- أوحش حاجة إنك تكون مابتعملش حاجة لأنة هيبقى صعب تعرف هتخلص أمتى .

- الوقت اللى هتضيعة فى التفكير فى الحاجات اللى نقصاك المفروض تديه للتفكير فى الحاجات اللى عندك .

- الخبرة هى الحاجة الوحيدة المفيدة فى الفشل .

- العقل زى الباراشوت .. مابيشتغلشى غير لما يتفتح .

كلامك صحيح ماهى الدنيا تتغير بمرور الزمن وما كان يصلح فى الماضى لم يعد يصلح هذه الايام

ولا تدرى ماذا سيكون غدا 00 عموما تشكر على المجهود وبلغة هذه الايام فأنت صايع قوى

7

7

7

http://img147.imageshack.us/img147/7766/198ab6.gif

ايه الكلام الحكيم ده بجد انا مبهوره والله كلامك مرتب ومثير
للاعجاب فعلا بارك الله فيك فعلا حاجات كتير محتاجه مننا
وقفات لازم نشغل عقلنا لازم نصبر لازم نبتسم فى وجه الاخريم
لازم نكون ابطال لازم فعلا ربنا يخليك وتتحفنا بمواضيع جميله دائما تعليق واحد بس متستعملش اللون اللبنى ده تانى عشان
كنت هحول بليزززززززززههههههههه

فعلا ماسمان كل شيء عم يتغير بطريقه غريبه فظيعه وصرنا ننبسط بالقاب كانت زمان معايرة وعيب يعنى متل مجنونة متلا --صارت البنت عادى تفرح وهي بتحكى انا مجنونة

او متلا عنا بالاردن كلمة منتشرة كتير وهى ---فايع او فايعه ---نفس معنى صايع وفعلا صاروا يتتبادلوها بفخر

متلا جبتلك شي اخر فياعه

للاسف واحد بينشرها بين الشباب فبتصير نمط بيمشي عليه بلد باكملها
شكرا ماسمان

+

وربنا يا عم انت صايع ع الموضوع الصايع ده يا صايع:D
ويايت تبقي تغير الفونت الصايع ده
وقغعدت ادور علي فونت صايع مش لقيت[-(:D
تسلم يا صايع

هههههههههههههه

والله فعلا ايام زمان
لما الواحد يقول صايع لحد
كان يقلب الدنيا ويزعل
وتبقي مهرجان
دلوقتي لما يكون واحد لافف الدنيا بقي يقلولو ياصايع
بقت مديح

تسلم يا جميل علي الموضوع الجامد ده

شوف يا صايع انت ..

موضوعك فى قمة الصياعه بجد ..

تعرف وانا بقرا حسيت ان انت واحد صينى وبيدينى حكم ..

بجد موضعك فى قمة الصياعه ويارب كل الناس تشوفه ..
علشان يعرفوا معنى كلمة الصياعه ..



وعلى راى الشارع المصرى ..
الياعه ادب مش هز اكتاف ..

ميرسى اخى علموضوعك

تغير معنى الكلمه يوضح خطوره التعود..ف الاول كلنا بنعرف ان الكلمه معناها مش كويس ولكن صارنا نلصق بها صفات كويسه ساعد ف دا الاعلام متمثل ف الافلام اللى اغلبنا للاسف متابع ليها وبيأخذ وبيبنى حياته متأثرا بالبطل -اللى ديما صايع واللى غالبا فهلوى ومعجبانى:(-ومع استخدم صفات حسنه مع الكلمه اعتاد العقل الباطن لنا ع ربط الصفه الحسنه بالكلمه .. الى ان وصلنا ف النهايه الى ان الكلمه اصبحت تحمل معانى -صايعه بجد:)- يعنى معانى جميله وكويسه ..احب اكون بصفات دى ولكن ما اكونش برضه صايع:(
شكرا ليك يا حبيبى قلبى :*