اشعار( صلاح جاهين)
السيد الأستاذ بديع البدع
أشكو إليك عملك بكل احترام
بكل إجلال الذليل الوضيع
أبراج من الآلام في صدر تقام
الدق شغال بانتظام
ومهندسين إنشاء
ومهندسين إجرام
" بهدلتوا سكان القبور يا جماعة "
ما يبصوليش.. ويبصوا في الساعة
حبيبي عريان م الكفن
حبة تراب وعضام
متبعترين في زبالة المشروع
أصرخ وأقول ليه تبنوا في الممنوع؟!
هنا منطقة أحزان
مليانة بالسكان
حبة خشا
وكرامة للإنسان
- أستاذ.. حبيبي.. إشتكى في القسم
- أنا مش بتاع أقسام.
ح ابعت جواب رسمي إلى الرحمن
السيد الأستاذ بديع الوجود
بعد التحية والسجود
الظبط والربط اللي في السموات
مفيش هنا في الأرض منه كتير
واسأل محمد جاد بتاع العصير
علقني ع الدكان فاسوخة آلام
سحلية من غير ديل في حالة وضع
تولد وتفقس في جلال.. أيتام
السيد الأستاذ بديع الشجن
أشهدك على إيه وإيه يا شجي
آدي العجل شاهد على العربجي
آدي فانوس سهران في حالة هيام
بيوحدك تحت السحب والغمام
وآدي فار أعمى الجناح بيطير
بيمص دم النور بنشوة نبي
حالة تلبس بارتكاب الأثام
وأنت.. بكل جلال صموت بسام
شاهد على المذبحة
وبتفرك المسبحة
وكإن خالتي مديحة جالها زكام
استغفرك يا رب وأسجد لك
بكل ذلك وحب واستسلام
اغفر لعبد مريض دواه الكلام
ده كله من غلبي
حالة تعدي صريحة على قلبي
حفر ومكن بيدق طول البرج
ح يبنوا أبراج السلام
مشروع سياحي وانفتاحي عظيم
لكن في قلبي أليم
وكل دقة بآه.. بصرخة جنون
أشكو إليك يا حنون
وتفضلوا بقبول حزين السلام
