عنوان عادي جدا . . . وربما قديييم ومستهلك و ناس كتير اتكلمت فيه وقالت كتير , و ناس تانية كتير طنشت و دخلت من ودن و طلعت من التانية.
هنا مش هتكلم عن الناس الكبيرة . . . ربنا يسامحهم و يهديهم , دي ناس خلاص الفطرة اللي فيهم اختفت . . . أصبحوا منقادين وراء شعارات و كلام الناس ومش عارف مين بيقول ايه و تفاهات و هراءات و كلام تلفزيون و مجلات , وجزمة الموسم و هلم جرا. اعتقد اللي هتكلم فيه , حاجة ليا معرفة فيها اكتر , الأطفال , وخصوصا السن الصغير خالص.
عندي عادة حلوة خالص , سعات لما ببقى مكتئب و مخنوق بروح محل لبس أطفال , تقريبا للسن تحت 5 سنوات , هناك بقعد اتفرج على اللبس و انواعه و موديلاته و افكاره , واتفرج على الاطفال اللي رايحين و اللي جايين , تقريبا بقعد قرابة الساعة .
ازعم إن عندي خبرة في الموضوع دا , بالإضافة إلى إني عملت ديفيله للأطفال قبل كدا.
ايه بقا الموضوع ؟؟؟
دلوقت . . . إحنا داخلين على الصيف و الجو حر , و معظم لبس البناتيت قصير طبقا لتقاليد الغرب و تقاليد افلام الكارتون , اما الاسلام بيقول ايه , يا شييخ كبر .
ولما تيجي تكلم حد يقولك دي لسا صغيرة خليها تلبس اللي هي عاوزاه.
المهم إن اللي هي عاوازه دا عبارة عن إختيارنا إحنا الناس الكبيرة و اللي احنا شايفن انها لازم تلبسه و النونو الصغير مالوش رأي في الموضوع , لأنه بيقلد اللي احنا بنعمله , واللي بيشوفه مننا لأننا مثله الاعلى. احكيلكم حدوته : بمشي في الشارع (ودي حاجة طبيعية) بس بمشي كتير , وبلاحظ الاطفال اللي رايحين و اللي جايين.
في ذات مرة (كنت قاعد باكل) شوفت نونو تقريبا 5 سنوات زي القمر (اسمها نوارة) لابسة فستان اسمر تحفة قصير فوق الركبة . . . ماما كانت واقفة معاها و لفت نظري الحديث اللي دار بينهم :
نوارة : ماما أنا بردانة كنت عاوزة البس حاجة طويلة.
ماما : بس انت كدا شكلك حلو.
نوارة : بس أنا بردانة كنت عاوزة البس حاجة طويلة.
ماما : دلوقت بابا هيجي و هنركب العربية الدافية.
نوارة : يوووه . . . يعني عاجبك امشي كدا في الشارع , كنت عاوزة البس حاجة طويلة.
ماما : خلاص بقى . . . ما هو الفستان شكله حلو.
نوارة : يوووه . . . ماليش دعوا أنا بردانة.
ماما : هش خالص . . مش عاوزة ولا كلمة . . . اهو بابا جه.
على فكرة ماما محجبة و محترمة.
كل واحد بيتولد على الفطرة , الفطرة السليمة بتحرك الواحد ناحية الصح , وبالتالي هتدفع الواحد انه يغطي جسمه , مش يكشفه للرايح و الجاي بدعوى انه شكله حلو , فيه قاعدة بتقول , ما حل نظره حل لمسه.
ولأن الاطفال الصغيرين ما زالوا محتفظين بفطرتهم سليمة لم تلوث , مش بيفهموا الحاجات الغريبة اللي بيقولها الكبار من ناحية موضه و شكله حلو ودا استايل . . . الأطفال على الفطرة و بيتحركوا على أساسها , حتى نمحيها منهم.
نقطة مهمة جدا جدا جدا جدا و محورية . . . الحياء
حبيبنا النبي قال (إنَّ الله حيي سِتِّير يحب الستر والحياء) - سنن أبي داود والنسائي.
وقال برضه (إنَّ لكل دين خلقاً ، وخلق الإسلام الحياء) - موطأ مالك ، وسنن ابن ماجه.
الاخلاق الحلوة زي الحياء و الأمانة و الصدق و احترام الغير و التواضع , بتنزرع كلها جوا البني آدم من و هو صغير بتكبر جواه جزء جزء لحد ما تبقى احد ركائزه و صفاته الاساسية اللي يضحي عشانها بأي حاجة.
إزاي نتوقع ونتخيل إن بنت صغيرة كل لبسها فاضح و مكشوف وقصير حتى سن البلوغ , يعني 11 أو 12 سنة , يتربى جواها خلق الحياء.
إزاي نتوقع منها إنها تلتزم في تعاملتها و لبسها و متلبسش لبس ضيق يصف و يشف و يظهر كل مفاتنها , وهي من صغرها اتعودت واتعلمت و اتربت انها تلاقي استحسان و اعجاب الناس اللي حواليها كلهم على استايلات اللبس اللي هي لابساه ومدى حلاوته و طعامته و هلم جرا. . .
تعتقدوا إن محاولة التأثير عليها , و جعلها إنسانة مسلمة كويسة ممكن تنجح ؟
إحنا ممكن ننجح لكن بشكل صعب جدا , وقد يحدث انتكاسات لأن هي متربتش على حاجة زي دي و ما اتزرعتش جواها.
و في الاخر نقول البت دي قليلة الادب . . . البت دي مش بتسمع الكلام . . . البت دي على حل شعرها دايرة.
نيجي للسبب الرئيسي . . . الكبار شايفين إنها كدا حلوة , بيختاروا ليها اللبس اللي هما عاوزينه , أصل البت لسا صغيرة , مفيش مانع إنها تكشف اللي هي عاوزه من جسمها (اللي هما الكبار عاوزينه) , ويقولوا :
خليها تلبس اللي هي عوازاه أمال هتلبسه أمتا
خليها تنبسط و تعيش حياتها كلها كام سنة و مش هتعرف تعمل حاجة.
كلمة "أمال هتلبسه امتا" دي مصيبة بتزرع جوا دماغ النونو حاجتين , إن اللي هي لابساه دا حلو وصح و إنها في عصر نور و حاجات حلوة و الدنيا ربيع , فلازم تستغله.
إما بعد كدا هتخش على عصر ضلما و سواد وخنقة و غطي نفسك يا بنية , وعيب و مينفعش , بس بعد ايه خلاص الفاس وقعت في الراس, و البنوتة الحلوة اتعودت و اتربت على اسلوب الحياة اللي ربيناها عليه. دايما لما بنيجي نربي ولادنا مش بنفكر فيهم , بنفكر بس في نفسنا , في راحة نفسنا , في شكل نفسنا ,من أول الاسم لحد التعاملات , مش بنرضى نتعب شوية عشان نعلمهم حاجة.
محدش بيحس اننا كدا بنعمل ازدواجية في التفكير عند النونو خصوصا لو كانت الماما ملتزمة وبتلبس النونو الحاجات دي.
عمرنا ما بنديهم حقهم في التربية , و القدوة و السلوكيات الصح , لأننا بنرفض نغير سلوكياتنا للصح عشانهم.
لازم بنتي تكون احلى واحدة , عشان كل الطنتات و الصحبات و الخالات , يعرفوا إن البنوتة بتاعتي احلى واحدة , و مدى جمال الفستان او التايير الحليوة اللي هي لابساه و حلاوة الحاجات اللي هي كاشفاها . . . . أمااال دي بنتي حبيبتي.
احكيلكم حدوتة حلوة.
بنت أحد الصحابة (أم كلثوم بنت جعفر بن أبي طالب) عندها خمس سنين , لسا نونو صغنونه , كانت رايحة عند أمير المؤمنين عمر بن الخطاب عشان كانت محتاجة منه حاجة , كانت لابسة عباية طويلة مجرجراها وراها تقريبا شبر , فسيدنا عمر بيهزر معاها فرفع ثوبها حتى بدت قدماها , فراحت قايلة "مه" يعني (سيبه ملكش دعوا) أما انك لو لم تكن أمير المؤمنين لضربت وجهك.
شوفوا بنت خمس سنين ايه اللي مزروع جواها ؟ ؟ ؟ وقارنوا و شوفوا بنت خمس سنين دلوقت بتعمل ايه.
طفلة زي دي هي الأم اللي طلعت الرجالة اللي عملوا الحضارة الاسلامية. ولادنا حقهم علينا نربيهم ونزرع جواهم الأخلاق الكويسة , واولها و أهمها الحياء , خصوصا في العصر الزبالة اللي احنا فيه.
الخلق دا بالذات لازم يتزرع جوا الطفل وهو صغير عشان يبقا احد خصائصه , لأنه لو كبر و معندوش الخلق دا هنتعب معاه اوي . . . و هيرتكب مخالفات بالجملة لأنه مش عارف , و لأنه بيعتقد إن دا عادي وكل دا لييه . . . لأن بابا وماما معرفوش يربوه صح و فضلوا المظاهر الدنيوية الزائلة على حاجة تدخل النونو بتاعنا الجنة .
إمامنا الغزالي قال كلمة حلوة في الموضوع دا : (الصبي أمانة عند والديه ، وقلبه الطاهر جوهرة ساذجة خالية من كل نقش وصورة ، وهو قابل لكل ما نقش وسائل إلى كل ما يمال به إليه ، فإن عود الخير وعلمه نشأ عليه ، و سعد في الدنيا والآخرة كل معلم له ومؤدب ، وإن عود الشر وأهمل إهمال البهائم شقي وهلك ، وكان الوزر في رقبة القيم عليه والوالي له).
ركزوا قال إيه أهمل إهمال البهائم , يعني كان كل هم ماما وبابا يأكلوه و يشربوه ويلبسوه و يلعبوه و يفسحوه .
اعتقد إن الموضوع ميستاهلش كل العند دا , لأنه برضه موجود لبس كويس و محترم وشكله جميل جدا للأطفال سواء ولد أو بنت و هيبقى النونو شكله حلو , وفي نفس الوقت بيحافظ على فطرته السليمة , اللي بنقتلها جواه عن عمد. خير خير خير
الخير موجود بس الناس سعات عميانة عنه او في معظم الاحيان تتجاهله
محدش عارف الخير فين
يارب الهداية
