الأفندي
ـــــــــــــــــــــــــ ــــــ
عمرك حسيت إنك مالكش لازمة؟
أنا حسيتها وقريتها في عيون كتير من الناس.. أنا عبد المقصود أفندي عبد المقصود.. وأفندي ده مش لقب.. ده نص اسمي .. عبد المقصود أفندي.. الله يرحمه والدي كان فاكر إنه لما يحطه جنب اسمي حبقى وجيه من يومي.. والناس حتناديني وأنا طفل بلقب رجل كبير محترم.. يبقى لما أكبر حبقى أكيد باشا مفيش كلام..
ولكن......" تاتي الرياح بما لا تشتهي السفن".
من يومي وأنا بقيت مادة خام ولانج للتريقة.. وفين طربوشك يا سيدنا الأفندي؟ في زمن بقى الطربوش فيه أضحوكة وعفوا مسخرة.. الله يرحمك يا والدي.. لا الزمن زمانك ولا فكره كان في دماغك.. محدش دلوقتي بيحب الافندية.. كله بيحب التنطيط.. لو كان اسمي ابو النطيط كان زماني ريس كبير ولي هيلمان في الرقص والضحك على العقول..
ما علينا .. نرجع مرجوعنا..
مرديتش على سؤالي: حسيت إنك فعلا كده؟
صفرعلى الشمال.. أو الصفر نفسه له قيمة عنك؟
كتير حسيت كده.. لأني على حد القول: جبل جليدي قديم.. عقلي من كتر التخبيط مليان حفر.. وجواه مصنع طوب وزلط .. وإن سيادتي عايش في كوكب تاني.. وإن العقد والكلاكيع اللي اسمها بيت وأسرة وعواميد يتبني عليها البيت والأسرة.. هي اللي طفشت البنات من وشي العكر.. وهي سبب وحدتي اللي بتجري زي الصاروخ وبتاكل عمري وياها.. وإني كان لازم اتروشن وأركب قطر العصر.. وأحط جيل وأبقى روش.. وبلاش خطب عصماء وأحلام مكلكعة.. وكأني ماسك بندقية في قلب الميدان.. احنا مش في حرب يا أفندينا.. ولا سيادتك اللي حتصلح الكون.. خليك في أرشيفك وأقفل على نفسك قبل ما البلدية تيجي تحطك في المتحف.. مكانك مش هنا يا عبدالمقصود أفندي.. أنت خلصت من زمان.. والزمان فات عليه زمان.. وبلاش خوته ووجع قلب.. اللي زيك مالوش هنا مكان.
__________________
