الفساد الذى ساد و ازداد,,,
بسم الله الرحمن الرحيم
السلام عليكم اولا
الفســــــاد
هل تعتقد اننا نعيش فى مجتمع فاسد ؟؟؟
فى قول بيقول اذا اردت ان تعرف مدى فساد المجتمع فأنظر الى جرائمة
فهل الجريمه هى الاكبر !!
طيب هل دة يعتير الدليل الوحيد على ان مجتمعنا اصبح اكثر فسادا
لأ طبعا فى دلائل كثيرة
و أكيد كل واحد فينا مر بتجربة اثبتت لة ان مجتمعنا اصبح اكثر فسادا
يعنى على سبيل المثال و لو انة مثال قد يكون بسيط جدا
فى طريقى من العمل الى المنزل بركب ميكروباص و الطبيعى ان اجرة الميكروباص دى 75 قرش
لكن بيحصل ان السواقين بيستغلوا الفرصة فى بعض اوقات الزحمة
و يرفعوا الاجرة الى جنية و ربع هى زيادة قد تكون بسيطة ولكن فيها نوع من الاستغلال
و دة نوع من انواع الفساد
و ساعتها مابيكونش فى ايدينا غير اننا نقول
اللهى يرزقك بأمين شرطة ياخد رخصك و ياخد منك الاجرة كلها:D
على طريقة اللهم اهلك الفسدين بالفاسدين
فساد برضو
احد الكتاب قال فى احد مقالاتة ان الفساد فى مجتعنا اصبح ركن اساسى من اركان المجتمع بمعنى اننا لو قضينا على الفساد ممكن المجتمع ينهار و قال ان الحل اننا نحاول نخفف الفساد شوية
و قال كلمة ساخرة
لية تفسد اكتر لما ممكن تفسد اقل
فى كل مجتمع فى فساد اكيد لأن المجتمعات المثالية ليست موجودة الا عند افلاطون فقط
بس المشكلة اننا فسادنا فساد مستحكم
من الكبير الى الصغير
من الوزير الى الغفير;)
يعنى منين ماتروح هتلاقية وراك و قدامك
فى احدى حلقات برنامج دارك كان الضيف هو الممثل خالد ابو النجا
و كان بيحكى عن مشروع تخرجة من كلية الهندسة قسم الاتصالات ( الجامعة الامريكية ) و
كان مشروع تخرجة حاجة بسيطة جدا وهى قمر صناعى
و كان بيحكى عن طريقة صناعتة و ارسالة القمر الصناعى دة الى الفضاء بصورة بسيطة كأنة
مثلا كان بيطير طيارة ورق
و بالقدر بعدها بيوم قابلت صديق ليا مهندس اتصالات برضو بس جامعة القاهرة و حكيت له و
سألتة عن مشروع تخرجة و قالى لأ دة كان حاجة بسيطة شوية اسلاك مع بعضها و حركات كدة
قولتلة اااااااااااه عرفتك
انت اللى اخترعت اختراع كوبايتين الزبادى و الخيط بتاع زمان
فساد برضو بس فى التعليم
قمر صناعى و كوبايتين زبادى
مجتمعات فاسدة تشعرك بعدم الامان و عد الثقة و اليأس من بكرة
كم من خريج يجلس الان بدون عمل ليس لعدم كفائتة و لكن لعدم وجود واسطة او كارت توصية
و بعد كل دة بيسألوا عن الانتماء
كيف اشعر بإنتماء لمجتمع يحرمنى من ابسط حقوقى ليس لعدم كفائتى و لكن لعدم قدرتى
على دفع المعلوم
كيف اشعر بإنتماء لمجتمع كهذا
لقد افسدتم حياتنا بفسادكم
بصراحة بستغرب من بجاحة البعض فى التهليل لما د/ أحمد زويل حصل على جائزة نوبل
طب و هو انتو كنتو فين من الاول يعنى الراجل طفش منكم و فى الاخر جايين تتمحكوا فية و تقولوا زويل ابن مصر البار
و بتخيل لو كان زويل استمر فى مصر و ماسافرش امريكا كان ممكن يبقى فين دلوقتى
يا ريت كل واحد يتخيل و يقولى
لو كان د/زويل استمر فى مجتمعنا الفاسد كان ممكن يكون فين دلوقتى ؟؟؟
العوامى
