"أحلم وعنيك مفتحة" زجل لكل صاحب طموح كلمات عصام قمر
أحلم وعنيك مفتحة
وأدخل عيش جوة أحلامك
أحلم بكتير أد ما تقدر
وسيب الحبل لخيالك
مش هقولك تحلم بأيه
أنت الأدري بأمالك
ما تحطش لاحلامك حدود
شكل أحلامك بمزاجك
ولما تحس بابتسامة
ونشوي بتملي عليك كيانك
اصحي من أحلامك وفوق
د أنت بلغت الذروة ياذوق
شوف أحلامك كانت أيه
وأرسم ليها طريق تمشيه
وإياك تقول الوضع الحالي
كله مشاكل وكاني وماني
وحل اللي فات مش بالساهل
وسنين وأيام منها بنعاني
كسر كل العقبات قدامك
سلك الطريق لطموحاتك
خليك واثق من خطاويك
وأحلامك زاد خليها قدامك
إيمانك بيها هيقويك
وهيخليك تشعر بكيانك
وكل عقدة وليها حلال
شغل عقلك حلها في الحال
ولو وأنت ماشي إتكعبلت
أوعي تقول زهقت تعبت
إسترجع تاني صورة الحلم
هتلاقي نفسك علطول قدرت
تقف علي رجلك وتواصل
وبإذن الله لهدفك واصل
ولولا أحلام اللي قبلك كانوا
مكانش تقدم اليوم بقي حاصل
,,,,,,,,,,,,,,,,,,,,,,,,
كلمات عصام الدين محمد
